സംഘപരിവാറിന്റെ തന്ത്രത്തിന്റെ ഭാഗമാണ് മോദിയുടെ വാക്കുകളെന്ന് വീക്ഷണം
ആര്.ശങ്കര് പ്രതിമാ അനാച്ഛാദന വിവാദം ആളിക്കത്തുമ്പോള് പ്രധാനമന്ത്രിയെ പഴിചാരി വീക്ഷണം മുഖപത്രവും എത്തി. ആര്.ശങ്കറിനെ ഹിന്ദുത്വവാദിയായി ചിത്രീകരിക്കുകയാണ് മോദി ചെയ്തതെന്ന് കോണ്ഗ്രസ് മുഖപത്രം വീക്ഷണം പറയുന്നു. യുക്തിയും സത്യവുമല്ലാത്ത കാര്യങ്ങള് പ്രധാനമന്ത്രി വിളിച്ചു കൂവുകയായിരുന്നുവെന്നും വീക്ഷണം പരിഹസിക്കുന്നു.
ആരോ കുറിച്ചു കൊടുത്ത പ്രസംഗം വിളിച്ചു കൂവുന്നത് പരിഹാസ്യമാണെന്നും വീക്ഷണം മുഖപത്രം പറയുന്നു. സംഘ പരിവാറിന്റെ തന്ത്രത്തിന്റെ ഭാഗമാണ് മോദിയുടെ വാക്കുകള്. ഇന്ത്യന് സ്വാതന്ത്ര്യ സമര ചരിത്രത്തിലോ രാഷ്ട്ര പുനര് നിര്മ്മാണ പ്രക്രിയയിലോ ഒരു ബന്ധവുമില്ലാത്ത സംഘപരിവാറിന്റെ ലക്ഷ്യം ഹിന്ദുത്വം പറഞ്ഞ് ദേശീയ നേതാക്കളെ തട്ടിയെടുക്കലാണെന്നും വീക്ഷണം കുറ്റപ്പെടുത്തുന്നു.
കള്ളം പറയാന് ശീലിച്ചയാള്ക്ക് സത്യത്തെ മറച്ചുപിടിക്കാന് കഴിയും. കള്ള പ്രചരണം നടത്തി രാജ്യത്ത് പ്രശ്നങ്ങള് സൃഷ്ടിക്കുന്ന സംഘപരിവാറിന്റെ കൂടെയാണ് മോദിയെന്നും വീക്ഷണം ആരോപിക്കുന്നു.
കള്ളം പറയാന് ശീലിപ്പിച്ചെടുത്ത ജിഹ്വയും കാപട്യം നിറഞ്ഞ ശരീര ഭാഷയും കൊണ്ട് ഹിമാലയം പോലെ ഉറച്ചു നില്ക്കുന്ന സത്യത്തെയാണ് മറച്ചു പിടിക്കാന് നരേന്ദ്രമോദി ശ്രമിക്കുന്നതെന്നാണ് മുഖ പ്രസംഗം വ്യക്തമാക്കുന്നത്. കള്ള പ്രചരണം കൊണ്ട് രാജ്യത്ത് തീ പിടര്ത്തുന്ന സംഘ പരിവാറിന്റെ തന്ത്രത്തിന്റെ ഭാഗമാണ് മോദിയുടെ വാക്കുകളെന്നും വീക്ഷണം കുറ്റപ്പെടുത്തുന്നു.