വീണ ജോര്‍ജ്ജ് ഇന്ത്യാവിഷന്‍ വിട്ടു... ഇനി ടിവി ന്യൂവില്‍

കൊച്ചി: പ്രമുഖ മാധ്യമ പ്രവര്‍ത്തകയായ വീണ ജോര്‍ജ്ജ് ഇന്ത്യാവിഷന്‍ വിട്ട് ടിവി ന്യൂവില്‍ ചേര്‍ന്നുവെന്ന് റിപ്പോര്‍ട്ട്. ഇന്ത്യാവിഷനില്‍ ചീഫ് ന്യൂസ് എഡിറ്റര്‍ ആയിരുന്നു വീണ ജോര്‍ജ്ജ്.

മലയാളത്തില്‍ ഏറ്റവും ആദ്യം തുടങ്ങിയ വാര്‍ത്താ ചാനലാണ് ഇന്ത്യാവിഷന്‍. ഏറ്റവും ഒടുവില്‍ തുടങ്ങിയത് ടിവി ന്യൂവും. മാനേജ്‌മെന്റുമായുള്ള പ്രശ്‌നങ്ങളും ശമ്പള പ്രശ്‌നവും കാരണം ഇന്ത്യാവിഷനിലെ പ്രമുഖര്‍ വിട്ട് പോയപ്പോഴും ചാനലിനൊപ്പം നിന്ന വ്യക്തി ആയിരുന്നു വീണ ജോര്‍ജ്ജ്.

കടുത്ത സാമ്പത്തിക പ്രതിസന്ധിയെ തുടര്‍ന്ന് ടിവി ന്യൂ അടച്ചുപൂട്ടലിന്റെ വക്കിലായിരുന്നു. ചാനലിലെ പല മാധ്യമ പ്രവര്‍ത്തകരും ശമ്പളം ലഭിക്കാത്തതിനെ തുടര്‍ന്ന് രാജിവക്കുകയും ചെയ്തിരുന്നു. ശേഷിക്കുന്ന ജീവനക്കാര്‍ സമരവുമായി മുന്നോട്ട് പോവുകയായിരുന്നു.

അതിനിടയിലാണ് ടിവി ന്യൂ റീ ലോഞ്ച് ചെയ്യാന്‍ മാനേജ്‌മെന്റ് തീരുമാനിച്ചത്. ഇതിന്റെ ഭാഗമായി കൂടുതല്‍ മാധ്യമ പ്രവര്‍ത്തകരെ മറ്റ് സ്ഥാപനങ്ങളില്‍ നിന്ന് ആകര്‍ഷകമായ ശമ്പളം നല്‍കി കൊണ്ടുവരാനും ശ്രമങ്ങള്‍ നടക്കുന്നുണ്ട്.

വീണ ജോര്‍ജ്ജിന് പ്രതിമാസം ഒരു ലക്ഷത്തിലധികമാണ് ടിവി ന്യൂ ശമ്പളം നല്‍കുന്നതെന്നാണ് വിവരം. ആറ് മാസത്തെ ശമ്പളം മുന്‍കൂറായി നല്‍കിയിട്ടുണ്ടെന്നും റിപ്പോര്‍ട്ടുകളുണ്ട്.

English summary

Veena George resigned from Indiavision, joins TV New.