'മന്ത്രി നാടകം കളിച്ചു എന്ന് പറയുന്നവരോട്, ഇത്ര ക്രൂരത അരുത്, ആ സെൽഫിക്ക് പിന്നിൽ..' പ്രതികരിച്ച് നഴ്സ്

കണ്ണൂർ റെയിൽവേ സ്റ്റേഷനിൽ വെച്ച് കെ എസ് യു പ്രതിഷേധത്തിനിടെ പരിക്കേറ്റ ആരോഗ്യവകുപ്പ് മന്ത്രി വീണാ ജോർജിനെതിരെ വലിയ പ്രചാരണമാണ് കോൺഗ്രസ് നടത്തുന്നത്. വീണാ ജോർജിന്റേത് അഭിനയം ആണെന്നാണ് കോൺഗ്രസ് നേതാക്കളും അനുകൂലികളും സോഷ്യൽ മീഡിയയിലും മാധ്യമങ്ങളിലും ആരോപിക്കുന്നത്.

പരിയാരം മെഡിക്കൽ കോളേജിലെ ചികിത്സയ്ക്കിടെ നഴ്സുമാർക്കൊപ്പമുളള സെൽഫിയുടെ പേരിലും ആരോഗ്യമന്ത്രി വ്യാപകമായി വിമർശിക്കപ്പെടുകയും ട്രോൾ ചെയ്യപ്പെടുകയും ചെയ്യുന്നു. ഇതോടെ വിശദീകരണവുമായി പരിയാരം മെഡിക്കൽ കോളേജിലെ നഴ്സായ പിസി സ്മിത രംഗത്ത് വന്നിരിക്കുകയാണ്. ഇത്ര ക്രൂരത മന്ത്രിയോട് കാണിക്കരുതെന്നും അൽപം ദയ ആകാമെന്നും സ്മിത ഫേസ്ബുക്കിൽ കുറിക്കുന്നു.

''എത്ര ക്രൂരമാണ് ഈ ലോകം . ഇന്നലെ രാത്രിയാണ് പ്രിയപ്പെട്ട മിനിസ്റ്റർ വീണാ ജോർജ് വിദഗ്ധ പരിശോധനക്ക് പരിയാരം മെഡിക്കൽ കോളേജിൽ എത്തുന്നത് . എംആർഐ സ്കാൻ രാത്രി തന്നെ ചെയ്തു .കടുത്ത കഴുത്തു വേദന , ഉയർന്ന രക്തസമ്മർദം . രാത്രിയിൽ മിനിസ്റ്റർ ഭക്ഷണം കഴിച്ചില്ല . ഉറങ്ങിയത് രണ്ടു മണിക്കൂർ . കടുത്ത ശരീര വേദനക്കൊപ്പം മിനിസ്റ്റർ മാനസികമായി ഏറെ വിഷമം അനുഭവിക്കുന്നു എന്ന് ഞങ്ങൾക്ക് മനസ്സിലായി .

രാവിലെയും ഭക്ഷണം വേണ്ട എന്ന് പറഞ്ഞു . ഞങ്ങൾ നിർബന്ധിച്ചു ഒരു ഇഡലി കഴിപ്പിച്ചു .ആഹാരം കൊടുത്തതിനു ശേഷം കിടത്തുന്നതിനു മുൻപ് ഞങ്ങൾ ഐസിയുവിലെ സിസ്റ്റേഴ്സ് ഒരു ഫോട്ടോ എടുത്തോട്ടെ എന്ന് മിനിസ്റ്ററോട് ചോദിച്ചു. മിനിസ്റ്റർ ആകട്ടെ എന്ന് പറഞ്ഞു മിനിസ്റ്റർ അനുഭവിക്കുന്ന ശാരീരികവും മാനസികവുമായ വേദന, ശരീരത്തിനേറ്റ ക്ഷതം ഇവയൊക്കെ നേരിൽ കാണുന്ന ഞങ്ങൾ പ്രിയപ്പെട്ട മിനിസ്റ്ററോട് പറഞ്ഞു ഒന്നും വിഷമിക്കേണ്ട ഞങ്ങൾ എല്ലാവരും കൂടെ ഉണ്ട് . മിനിസ്റ്ററെ ചേർത്ത് പിടിച്ചൊരു ഫോട്ടോ അങ്ങനെ എടുത്തതാണ്. എന്റെ ഉൾപ്പടെ പിന്തുണ അറിയിക്കൽ കൂടിയാണത് .

മന്ത്രിയെന്നതിനു അപ്പുറം സഹോദരതുല്യം ആണ് ഞങ്ങളോട് ഇടപെട്ടത് . ഞങ്ങൾക്കും കുറഞ്ഞ മണിക്കൂറുകൾക്കുള്ളിൽ മിനിസ്റ്ററോട് അത്രയും അടുപ്പം ഉണ്ടായി . അതുകൊണ്ടാണ് ഈ ഫോട്ടോ എടുത്തത് . മിനിസ്റ്റർ അഭിനയിച്ചു, നാടകം കളിച്ചു എന്ന പ്രചാരണം മനുഷ്യത്വം ഇല്ലായ്മയാണ്. മിനിസ്റ്റർക്കെതിരെയുള്ള വ്യക്തിപരമായ പ്രചരണങ്ങളിലെ അസത്യം ഞങ്ങൾ നേരിട്ട് തിരിച്ചറിയുന്നു. ആക്ഷേപിക്കുന്നവരോട് , മന്ത്രി കാനുല ഇട്ടിട്ടുണ്ട് . ഭക്ഷണസമയം ഡിസ്കണക്ട് ചെയ്തതാണ്. സൂചി ഇട്ടിട്ടുണ്ട് . മുൻപ് ഇട്ടയിടത്തു നിറം മാറ്റം ഉണ്ടായതു കൊണ്ട് കൈത്തണ്ടയുടെ താഴെ ഭാഗത്താണ് ഇട്ടതു. ഇത്ര ക്രൂരത അരുത്. ദയവായി അല്പം ദയ കാണിക്കുക ''.