യുഡിഎഫിനെതിരെ ആഞ്ഞടിച്ച് വീരേന്ദ്രകുമാര്‍

കോഴിക്കോട്: യുഡിഎഫ് തങ്ങളെ അവഗണിച്ചുവെന്ന് ജനത ദള്‍ യുണൈറ്റഡ് സംസ്ഥാന അധ്യക്ഷന്‍ എംപി വീരേന്ദ്ര കുമാര്‍. മുന്നണിയെ രൂക്ഷമായ ഭാഷയില്‍ വിമര്‍ശിച്ചെങ്കിലും ഇപ്പോള്‍ മുന്നണി വിടില്ലെന്നും അദ്ദേഹം പറഞ്ഞു.

യുഡിഎഫില്‍ നിന്ന് കടുത്ത അവഗണനയാണ് തങ്ങള്‍ നേരിടുന്നത്. ആര്‍എസ്പിയ്ക്ക് കിട്ടിയ പരിഗണന പോലും തങ്ങള്‍ക്ക് ലഭിച്ചില്ലെന്ന് വീരേന്ദ്ര കുമാര്‍ ആരോപിച്ചു.

ലോക്‌സഭ തിരഞ്ഞെടുപ്പില്‍ പാലക്കാട് സീറ്റില്‍ പരാജയപ്പെട്ടത് സംബന്ധിച്ച അന്വേഷണ റിപ്പോര്‍ട്ട് യുഡിഎഫ് പുറത്ത് വിടണം. നിയമസഭ തിരഞ്ഞെടുപ്പിലും ലോക്‌സഭ തിരഞ്ഞെടുപ്പിലും മതിയായ പരിഗണന ലഭിച്ചില്ല. ലോക്‌സഭ തിരഞ്ഞെടുപ്പില്‍ ആര്‍ക്കും വേണ്ടാത്ത സീറ്റ് ആണ് തങ്ങള്‍ക്ക് തന്നതെന്നും വീരേന്ദ്ര കുമാര്‍ ആരോപിച്ചു.

നിലവില്‍ മുന്നണി വിടില്ലെന്ന് പറഞ്ഞെങ്കിലും അതിന്റെ സൂചനകള്‍ വീരേന്ദ്ര കുമാറിന്റെ വാക്കുകളില്‍ ഉണ്ടായിരുന്നു. ഭാവി പരിപാടികള്‍ ദേശീയ നേതൃത്വവുമായി ആലോചിച്ച് തീരുമാനിയക്കും എന്നാണ് അദ്ദേഹം പറഞ്ഞത്.

തങ്ങള്‍ മുന്നണിയില്‍ ഉണ്ടായിരുന്നെങ്കില്‍ ഇപ്പോള്‍ എല്‍ഡിഎഫ് തന്നെ കേരളം ഭരിക്കുമായിരുന്നു. അവഗണനകളുടെ കാര്യത്തില്‍ തങ്ങള്‍ക്ക് ഒരു പരാതിയും ഇല്ലെന്നാണ് പലരും ധരിച്ചിരിക്കുന്നത്. അത് മാറ്റാനാണ് ഇപ്പോള്‍ എല്ലാ കാര്യങ്ങളും പറയുന്നതെന്നും അദ്ദേഹം പറഞ്ഞു.

English summary

Veerendrakumar criticise UDF for their negligence.