സത്യം ബിജു പുറത്തുവിട്ടത് ശരിയായില്ലെന്ന് വെള്ളാപ്പള്ളി

കൊച്ചി: നേതാക്കന്‍മാരെല്ലാം മന്ത്രി കെഎം മാണിയെ വിമര്‍ശിക്കുമ്പോള്‍ വേറൊരു നേതാവ് മാണിയെ പരോഷമായി അനുകൂലിക്കുകയാണ് ചെയ്തത്. എന്തായാലും ബിജു രമേശ് ചെയ്തത് ശരിയല്ലെന്നാണ് എസ്എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശന്‍ പറഞ്ഞത്. സത്യമാണെങ്കിലും ഇങ്ങനെ ആരെങ്കിലും സ്വകാര്യ സംഭാഷണങ്ങള്‍ പുറത്തു വിടുമോ. സ്വകാര്യ സംഭാഷണം ബിജു പുറത്തു വിട്ടത് ശരിയല്ലെന്ന നിലപാടാണ് വെള്ളാപ്പള്ളിക്കുള്ളത്.

ഇതിലൂടെ ബിജു രമേശിന്റെ സംസ്‌കാരശൂന്യതയാണ് വെളിവായതെന്നും വെള്ളാപ്പള്ളി പറയുന്നു. ബിജു സ്വീകരിച്ച നിലപാട് തെറ്റായിപ്പോയി. ബിജുവിനെ വിമര്‍ശിക്കുകയല്ലാതെ കെഎം മാണിക്കെതിരായി വെള്ളാപ്പള്ളി ഒന്നും പറഞ്ഞില്ല. രണ്ടു തോണിയില്‍ കാലിട്ടപോലെയാണ് വെള്ളാപ്പള്ളിയുടെ നിലപാട്.

ഇതിനിടയില്‍ ബാലകൃഷ്ണപിള്ളയ്ക്ക് ഒരു കൊട്ട് കൊടുക്കാനും വെള്ളാപ്പള്ളി മറന്നില്ല. അഴിമതിയെക്കുറിച്ച് പറയാന്‍ ബാലകൃഷ്ണപിള്ളയ്ക്ക് അവകാശമില്ലെന്നാണ് വെള്ളാപ്പള്ളി പറഞ്ഞത്. സര്‍ക്കാരിന്റെ ആനുകൂല്യമെല്ലാം പറ്റി സര്‍ക്കാരിനെ കരിവാരി തേയ്ക്കാനാണ് പിള്ള ശ്രമിക്കുന്നതെന്നും വെള്ളാപ്പള്ളി വ്യക്തമാക്കി.

ബാര്‍ കോഴ വിവാദത്തില്‍ തന്നെ വലിച്ചിഴച്ചത് ശരിയായില്ലെന്നും അദ്ദേഹം പറഞ്ഞു. ബാലകൃഷ്ണപിള്ളയുടെ ഇഷ്ടത്തിനനുസരിച്ച് പ്രതികരിക്കാനുള്ള ആളല്ല താനെന്നും വെള്ളാപ്പള്ളി പറഞ്ഞു. ബാര്‍ കോഴ വിവാദത്തില്‍ തെളിവുകള്‍ പുറത്തു വരാന്‍ പോകുന്നില്ലെന്ന് മുന്‍പ് വെള്ളാപ്പള്ളി പറഞ്ഞിരുന്നു. ബാറുടമകളോട് കാശ് വാങ്ങാത്ത ഒരു രാഷ്ട്രീയ നേതാവും ഇല്ലെന്നാണ് അദ്ദേഹം മുന്‍പ് പറഞ്ഞത്.

English summary

Vellappally Natesan said that personal phone details Biju Ramesh published was not good