'സ്ലോമോഷൻ ഡാൻസ് ഇനി ജയിലിൽ ആവാം'; പ്രണയം നടിച്ച് പീഡനം, വ്‌ളോഗർ ജുനൈദ് അറസ്റ്റിൽ

മലപ്പുറം: സോഷ്യൽ മീഡിയ വഴി പരിചയപ്പെട്ട യുവതിയെ പ്രണയം നടിച്ച് വിവാഹ വാ​ഗ്ദാനം നൽകി പീഡിപ്പിച്ചെന്ന കേസിൽ വ്ലോ​ഗർ അറസ്റ്റിൽ. വഴിക്കടവ് സ്വദേശി ചോയ്തല വീട്ടിൽ ജുനൈദിനെയാണ് മലപ്പുറം പോലീസ് സ്റ്റേഷൻ എസ് എച്ച് ഒ പി വിഷ്ണുവിന്റെ നേതൃത്വത്തിലുള്ള സംഘം ബെം​ഗളൂരുവിൽ നിന്ന് അറസ്റ്റ് ചെയ്തത്.

പ്രതി യുവതിയുമായി സോഷ്യൽ മീഡിയ വഴി പരിചയപ്പെടുകയും പ്രണയം നടിക്കുകയും വിവാഹം ചെയ്യാമെന്ന് വാ​ഗ്ദാനം നൽകുകയും ചെയ്ത ശേഷം രണ്ട് വർഷത്തോളമായി മലപ്പുറത്തും പരിസര പ്രദേശങ്ങളിലെ വിവിധ ലോഡ്ജുകളിലും ഹോട്ടലുകളിലും വെച്ച് പീഡിപ്പിക്കുകയും ന​ഗ്ന ഫോട്ടോകൾ പകർത്തുകയും ഇത് സോഷ്യൽ മീഡിയ വഴി പുറത്ത് വിടുമെന്ന് പറഞ്ഞ് യുവതിയെ ഭീഷണിപ്പെടുത്തകയും ചെയ്യുകയുമായിരുന്നു.

യുവതിയുടെ പരാതിയിൽ കേസെടുത്ത മലപ്പുറം പോലീസ് നടത്തിയ അന്വേഷണത്തിലാണ് കേസിൽ വിദേശത്തേക്ക് കടന്നുകളഞ്ഞ പ്രതിയെ ബെം​ഗളൂരു എയർപോർട്ട് പരിസരത്തി വെച്ച് പോലീസ് അറസ്റ്റ് ചെയ്തത്. മലപ്പുറം പോലീസ് ഇൻസ്പെക്ടർ പി വിഷ്ണുവിന്റെ നമേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. എസ് ഐ പ്രിയൻ എസ് കെ, എ എസ് ഐ തുളസി, പോലീസുകാരായ ദ്വിദീഷ്,മനുദാസ് രാമചന്ദ്രൻ എന്നിവരും സംഘത്തിൽ ഉണ്ടായിരുന്നു. നിയമ നടപടികൾക്ക് ശേഷം പ്രതിയെ ഇന്ന് മലപ്പുറം ‌ജുഡീഷ്യൽ ഫസ്റ്റ് കോടതിയിൽ ഹാജരാക്കും.

അതേ സമയം ഇയാളുടെ അറസ്റ്റ് വിവരം അറിഞ്ഞതിന് പിന്നാലെ ഇൻസ്റ്റ​ഗ്രാം അക്കൗണ്ടിലെ വീഡിയോകൾക്ക് താഴെ കമന്റുകൾ വന്നുകൊണ്ടിരിക്കുകയാണ്. ഇനി കുറച്ചു നാൾ ജയിലിൽ ചപ്പാത്തിക്കുള്ള മാവ് ഉരുട്ടാം, സ്ലോ മോഷനൊക്കെ ഇനി ജയിലിന്റെ ഉള്ളിൽ വെച്ചാകാം അണ്ണാ എന്നിങ്ങനെ പോകുന്നു കമന്റുകൾ.