വിഎസ് സംസ്ഥാന സമിതിയ്ക്ക് പുറത്തോ?

തിരുവനന്തപുരം: പാര്‍ട്ടി കോണ്‍ഗ്രസിന് ശേഷം സിപിഎം സംസ്ഥാന സമിതി യോഗം ഏപ്രില്‍ 25 ന് ചേരുകയാണ്. പാര്‍ട്ടി സംസ്ഥാന സമ്മേളനത്തിന് ശേഷം ഒഴിച്ചിട്ട ഒരു സീറ്റില്‍ വിഎസ് സംസ്ഥാന സമിതിയില്‍ എത്തുമോ എന്നാണ് ഏവരും ചോദിയ്ക്കുന്ന ചോദ്യം.

കേന്ദ്ര കമ്മിറ്റിയില്‍ നിന്ന് ഒഴിവാക്കപ്പെട്ട വിഎസ് സംസ്ഥാന സമിതിയില്‍ തിരിച്ചെത്തും എന്നായിരുന്നു ഏവരുടേയും പ്രതീക്ഷ. എന്നാല്‍ വിഎസ് സംസ്ഥാന സമിതിയില്‍ എത്തില്ലെന്നാണ് ഒടുവില്‍ ലഭിയ്ക്കുന്ന വിവരം.

അടുത്ത ദിവസം നടക്കുന്ന സംസ്ഥാന സമിതി യോഗത്തില്‍ ദേശീയ സെക്രട്ടറി സീതാറാം യെച്ചൂരിയും പോളിറ്റ് ബ്യൂറോ അംഗം എസ് രാമചന്ദ്രന്‍ പിള്ളയും പങ്കെടുക്കുന്നുണ്ട്. പോളിറ്റ് ബ്യൂറോ കമ്മീഷന്റെ റിപ്പോര്‍ട്ട് വന്നതിന് ശേഷം മതി വിഎസിനെ സംസ്ഥാന സമിതിയില്‍ ഉള്‍പ്പെടുത്തണോ വേണ്ടയോ എന്ന ചര്‍ച്ചയെന്നാണത്രെ കേന്ദ്ര നേതൃത്വത്തിന്റെ ധാരണ.

വിഎസ് അച്യുതാനന്ദന്‍ ഇപ്പോള്‍ കേന്ദ്ര കമ്മിറ്റിയിലെ പ്രത്യേക ക്ഷണിതാവ് മാത്രമാണ്. കേന്ദ്ര കമ്മിറ്റി അംഗമായിരുന്നെങ്കില്‍ സംസ്ഥാന സമിതിയിലും സെക്രട്ടേറിയറ്റിലും പങ്കെടുക്കാമായിരുന്നു. എന്നാല്‍ പ്രത്യേക ക്ഷണിതാവിന് അത്തരം അവാകശങ്ങള്‍ ഒന്നും ഉള്ളതായി പാര്‍ട്ടി ഭരണഘടനയില്‍ പറയുന്നില്ല.

അതുകൊണ്ട് തന്നെ വിഎസിനെ സംസ്ഥാന സമിതി യോഗങ്ങളില്‍ പങ്കെടുപ്പിയ്ക്കണം എന്ന ഒരു ധാരണ ഉണ്ടായാലും അത്ഭുതപ്പെടാനില്ല. സീതാറാം യെച്ചൂരി വിഎസിന് വേണ്ടി ഇക്കാര്യത്തില്‍ തീരുമാനമെടുക്കുമോ എന്നും കണ്ടറിയാം.

English summary

VS Achuthanandan may not be included in CPM state committee soon.