ഗാന്ധിയെ ബിയറാക്കിയാല്‍ വാഷിങ്ടണിനെ ചെരുപ്പാക്കും... അതാണ് മലയാളി

തിരുവനന്തപുരം: മലയാളിക്ക് പണ്ടേ അമേരിക്കക്കാരെ അത്രക്ക് താത്പര്യമില്ലാത്തതാണ്. അപ്പോഴാണ് ഒരു അമേരിക്കന്‍ മദ്യ കമ്പനി രാഷ്ട്രപിതാവിന്റെ പേരും ചിത്രവും വച്ച് ബിയര്‍ പുറത്തിറക്കിയത്. പിന്നെ മലയാളികള്‍ വെറുതേയിരിക്കുമോ...?

എന്തായാലും അമേരിക്കന്‍ പ്രസിഡന്റിന്റെ പേരിലോ അവരുടെ രാഷ്ട്ര പിതാവിന്റെ പേരിലോ ബിയര്‍ ഉണ്ടാക്കാനൊന്നും മലയാളിയെ കിട്ടില്ല. പക്ഷേ തിരിച്ചൊരു പണി കൊടുക്കുന്പോള്‍ അത് അത്യുഗ്രന്‍ ആകണമെന്ന് മലയാളിക്ക് നിര്‍ബന്ധമുണ്ട്.

ഗാന്ധിജിയുടെ പേരില്‍ ബിയര്‍ ഉണ്ടാക്കിയാല്‍, അമേരിക്ക അവരുടെ രാഷ്ട്ര പിതാവായി കാണുന്ന ജോര്‍ജ്ജ് വാഷിങ്ടണിനിട്ട് തന്നെ നമ്മള്‍ പണി കൊടുക്കും. ചെരുപ്പിന്റെ രൂപത്തില്‍ പണികൊടുക്കാനാണ് തീരുമാനം.

ജോര്‍ജ്ജ് വാഷിങ്ടണിന്റെ ചിത്രം പതിച്ച ചെരുപ്പാണ് കോയമ്പത്തൂര്‍ കേന്ദ്രീകരിച്ച് ചെരുപ്പ് വ്യവസായം നടത്തുന്ന ഒരു മലയാളി നിര്‍മിക്കാനൊരുങ്ങുന്നത്. വെറുതേ ചെരുപ്പ് നിര്‍മിച്ച് പ്രതികാരം തീര്‍ക്കുകയല്ല ലക്ഷ്യം. റിപ്പബ്ലിക് ദിനത്തില്‍ അമേരിക്കന്‍ പ്രസിഡന്റ് ബരാക് ഒബാമ ഇന്ത്യയില്‍ വരുന്നുണ്ടല്ലോ... അപ്പോള്‍ ദില്ലിയിലെ അമേരിക്കന്‍ എംബസിക്ക് മുന്നില്‍ ചെരുപ്പ് പ്രദര്‍ശിപ്പിക്കും. ഒബാമ കാണട്ടെ നമ്മുടെ പ്രതിഷേധം.

ആകെ 100 ജോഡി ചെരുപ്പുകളാണ് നിര്‍മിക്കുന്നത്. അമേരിക്കന്‍ പ്രസിഡന്റിന്റേയും, വൈസ് പ്രസിഡന്റിന്റേയും, സ്പീക്കറുടേയും ചീഫ് ജസ്റ്റിസിന്റേയും ഓഫീസുകളിലേക്ക് ചെരുപ്പുകള്‍ അയച്ച് കൊടുക്കും. അമേരിക്കയിലെ പ്രതിപക്ഷ നേതാവിനും അമ്പത് സ്റ്റേറ്റുകളുടെ ഗവര്‍ണര്‍മാര്‍ക്കും അയക്കും. അമേരിക്കന്‍ കോണ്‍ഗ്രസില്‍ ഇന്ത്യന്‍ ബന്ധമുള്ള രണ്ട് അംഗങ്ങള്‍ക്കും ചെരുപ്പ് അയക്കുന്നുണ്ട്.

ന്യൂ ഇംഗ്ലണ്ട് ബ്ര്യൂവിങ് കമ്പനിയാണ് ഗാന്ധി ബോട്ട് ബിയര്‍ പുറത്തിറക്കിയത്. ഈ കമ്പനിക്കും ചെരുപ്പ് അയച്ച് കൊടുക്കും.

English summary

Washington slipper to avenge 'Gandhi-Bot' beer