പരപ്പനങ്ങാടിയില് മത്സ്യബന്ധനത്തിനിടെ തോണി മറിഞ്ഞു മത്സ്യതൊഴിലാളി മരിച്ചു
മലപ്പുറം: പരപ്പനങ്ങാടിയില് മത്സ്യബന്ധനത്തിനിടെ തോണി മറിഞ്ഞു 57വയസ്സുകാരന് മരിച്ചു. പരപ്പനങ്ങാടി സദ്ദാംബീച്ച് കെ ടി നഗറിലെ വിക്കിരിയന് കാസ്മിക്കുട്ടി (57 )യാണു മരിച്ചത്. ചെറുതോണിയുമായി മത്സ്യബന്ധനത്തിനിറങ്ങവെ തീരക്കടലില് പെടുന്നനെ ഉണ്ടായ കടലാക്രമണത്തില്പ്പെടുകയായിരുന്നു. ഇന്നലെ പുലര്ച്ചെയാണു അപകടമുണ്ടായത്. രണ്ടുപേര് ജോലിക്കുപോകുന്ന തോണി കടലില് ഇറക്കിയ ഉടനെ തിരമാല വന്നിടിക്കുകയും തോണി മറിയുകയുമായിരുന്നു.
കൂടെയുണ്ടായിരുന്ന ചീരങ്ങന് ഹസ്സന്ബാവ(52)രക്ഷപ്പെട്ടു. ചീരങ്ങന് ഹസ്സന്ബാവ കാസ്മിക്കുട്ടിയെ രക്ഷപെടുത്താന് ശ്രമിച്ചെങ്കിലും സംഭവ സ്ഥലത്ത് വെച്ച് തന്നെ മരണപ്പെടുകയായൊരുന്നു. ചീരങ്ങന് ഹസ്സന്ബാവക്ക് തോണിയില് പിടികിട്ടിയതിനാലാണ് രക്ഷപ്പെട്ടത്. പെടുന്നനെ ഉണ്ടായ കടലാക്രമണമാണ് അപകടത്തിന് കാരണമായതെന്നു ഹസ്സന് ബാവ പറഞ്ഞു. ചീരങ്ങന് ഹസ്സന്ബാവയും കാസ്മിക്കുട്ടി ഒരുമിച്ചായിരുന്നു മത്സ്യബന്ധനത്തിന് പോകാറുള്ളത്.
ഭാര്യ:കുഞ്ഞിമോള്. മക്കള്: റിയാസ്, നൗഫല്, ജലീല്, മന്സൂര്, നജാഫ്, ജുബൈരിയത്ത്. മരുമക്കള്: ആബിദ് ചാലിയം, ഹസീന, മാരിയത്ത്, സുനീറ, അഫ്സീറ, സുഫിയാനത്ത്.