യെച്ചൂരിക്ക് നല്‍കിയ കുറിപ്പ് തയ്യാറാക്കിയത് വിഎസിന്റെ മകന്‍?

By Desk

Updated: Thursday, May 26, 2016, 18:46 [IST]

തിരുവനന്തപുരം: വിഎസ് അച്യുതാനന്ദന്‍ സീതാറാം യെച്ചൂരിയ്ക്ക് നല്‍കിയ കുറിപ്പ് തയ്യാറാക്കിയത് വിഎസിന്റെ മകന്‍ അരുണ്‍ കുമാര്‍ ആണോ? മനോരമ ഓണ്‍ലൈന്‍ റിപ്പോര്‍ട്ട് ചെയ്യുന്നത് അങ്ങനെയാണ്. എന്നാല്‍ ഇത് സംബന്ധിച്ച് സ്ഥിരീകരണം ഒന്നും പുറത്ത് വന്നിട്ടില്ല.

സീതാറാം യെച്ചൂരി വിഎസിന് കുറിപ്പ് നല്‍കിയെന്നും അതില്‍ പറയുന്നത് ഇന്നയിന്ന കാര്യങ്ങളാണെന്നും വാര്‍ത്ത നല്‍കിയത് മനോരമ തന്നെ ആയിരുന്നു. എന്നാല്‍ താന്‍ വിഎസിന് കുറിപ്പൊന്നും നല്‍കിയില്ലെന്ന് സീതാറാം യെച്ചൂരി തന്നെയാണ് പിന്നീട് വ്യക്തമാക്കിയത്.

വിഎസിന് മന്ത്രിസഭയുടെ ഉപദേശക പദവിയും ക്യാബിനറ്റ് റാങ്കും നല്‍കും. ഇടതുമുന്നണി ചെയര്‍മാനാക്കും എന്നീ കാര്യങ്ങളാണ് കുറിപ്പില്‍ ഉണ്ടായിരുന്നത് എന്നായിരുന്നു മനോരമ വാര്‍ത്ത. എന്നാല്‍ ഈ കുറിപ്പ് വിഎസ് തനിയ്ക്ക് തന്നതാണെന്ന് യെച്ചൂരി പ്രഖ്യാപിച്ചതോടെ മനോരമയുടെ വാര്‍ത്ത പൊളിഞ്ഞു.

പേഴ്‌സണല്‍ സ്റ്റാഫ് കൈമാറിയ കുറിപ്പ് വിഎസ് വായിച്ച് നോക്കിയതിന് ശേഷം തനിയ്ക്ക് നല്‍കുകയായിരുന്നു എന്നാണ് യെച്ചൂരി പറഞ്ഞിട്ടുള്ളത്. കുറിപ്പ് എഴുതി തയ്യാറാക്കിയത് വിഎസിന്റെ അറിവോടെയാണോ എന്ന് പോലും വ്യക്തമല്ല. എന്നാല്‍ വിഎസിന്റെ മകന്‍ അരുണ്‍ കുമാര്‍ എഴുതി നല്‍കിയ കുറിപ്പാണത് എന്നാണ് മനോരമയുടെ കണ്ടെത്തല്‍. പക്ഷേ അതിനെ സാധൂകരിയ്ക്കുന്ന തെളിവുകളൊന്നും തന്നെ വാര്‍ത്തയില്‍ പറയുന്നും ഇല്ല.