പോലീസുകാരനെ ഭാര്യാസഹോദരി കഴുത്തറുത്ത് കൊന്നു
തൊടുപുഴ: കഴുത്തറുത്ത് കൊന്നു എന്ന വാര്ത്ത കേട്ടാല് ഇപ്പോള് ആദ്യം ഓര്മ വരിക ഐസിസുകാരെയാണ്. എന്നാല് ഐസിസുകാര് മാത്രമല്ല കഴുത്തറുത്ത് കൊല്ലുന്നത്. ഇടുക്കിയിലെ കുളമാവില് നിന്നുള്ള വാര്ത്ത ഇങ്ങനെയാണ്.
സഹോദരിയുടെ ഭര്ത്താവിനെ യുവതി കഴുത്തറുത്ത് കൊന്നു. കൊല്ലപ്പെട്ടയാള് ഒരു പോലീസുകാരനും ആണ്.
കുളമാവ് പോലീസ് സ്റ്റേഷനിലെ സിവില് പോലീസ് ഓഫീസര് ആയിരുന്ന പാലുകുന്നില് രാജു ആണ് കൊല്ലപ്പെട്ടത്. രാജുവിന്റെ ഭാര്യയുടെ സഹോദരിയാണ് കൊലപാതകം നടത്തിയതെന്ന് പോലീസ് കണ്ടെത്തി. ഇവരെ അറസ്റ്റ് ചെയ്തു.
രാജുവിന്റെ മദ്യപാന ശീലം കൊണ്ട് കുടുംബം പൊറുതിമുട്ടി ഇരിക്കുകയായിരുന്നത്രെ. രണ്ട് വര്ഷമായി ഇയാള് ജോലിക്ക് വരാറുണ്ടായിരുന്നില്ലെന്ന് പോലീസ് തന്നെ വ്യക്തമാക്കുന്നു. മദ്യപിച്ച് വീട്ടിലെത്തി വഴക്കുണ്ടാക്കുന്നത് പതിവാക്കിയപ്പോഴാണ് ഭാര്യാ സഹോദരി ഇത്തരം ഒരു കടുംകൈ ചെയ്തത്.
കഴിഞ്ഞ ദിവസവും രാജു മദ്യപിച്ചാണ് വീട്ടിലെത്തിയത്. ഭാര്യയേയും മാതാവിനേയും ക്രൂരമായി മര്ദ്ദിക്കാന് തുടങ്ങി . ഇതോടെ സഹികെട്ട് ഭാര്യാ സഹോദരി വിറക് കഷ്ണമെടുത്ത് തലക്കടിക്കുകയായിരുന്നു. ബോധം കെട്ട് താഴെ വീണ രാജുവിന്റെ കഴുത്ത് കത്തികൊണ്ട് മുറിക്കുകയും ചെയ്തു .