സ്വർണ വില 90,000ത്തിന് താഴേക്ക് പോകുമോ? ഈ ട്രെൻ്റ് തുടർന്നാൽ സംഭവിക്കുക ഇത്..വിശദീകരിച്ച് സ്വർണ വ്യാപാരി

സംസ്ഥാനത്ത് സ്വർണ വിലയിൽ വലിയ ചാഞ്ചാട്ടങ്ങളാണ് പ്രകടമാകുന്നത്. ഇന്നലെ രാവിലെ കുത്തനെ കൂടിയ വില ഉച്ചയോടെ വീണ്ടും കുതിച്ചുകയറി.രാവിലെ രണ്ടായിരത്തിലധികം രൂപയിടിഞ്ഞ് പവന് 102760 രൂപയായിരുന്നു വില. എന്നാല്‍ ഉച്ചയ്ക്ക് പവൻ വിലയിൽ 880 രൂപയുടെ വർധനവ് രേഖപ്പെടുത്തി. 103640 രൂപയാണ് പുതിയ പവന്‍ വില. ഗ്രാമിന് 12955 രൂപ നല്‍കണം. ഇതേ ട്രെന്‍ഡ് തുടര്‍ന്നാല്‍ വരുംദിവസങ്ങളിലും വില ഉയരുമോ അതോ വീണ്ടും വില താഴേക്ക് പതിക്കുമോയെന്നതാണ് ആഭരണപ്രേമികൾ ഉറ്റുനോക്കുന്നത്. ഇപ്പോഴിതാ അക്കാര്യത്തിൽ പ്രതികരിക്കുകയാണ് സ്വർണ വ്യാപാരിയായ അരുണ്‍ മാർക്കോസ്. സീ ന്യൂസ് മലയാളത്തോടാണ് അദ്ദേഹത്തിൻ്റെ പ്രതികരണം. വായിക്കാം.

' സ്വർണം വാങ്ങുന്നതിനെ സംബന്ധിച്ചുള്ള അന്വേഷണങ്ങൾ ഉണ്ടാകുന്നതിനപ്പുറത്തേക്ക് സ്വർണം വാങ്ങാനായിട്ട് ആളുകൾ ജ്വല്ലറികളിലേക്ക് എത്തി തുടങ്ങിയിട്ടില്ല. സ്വർണവില കൂടുതൽ താഴേക്ക് പോകും എന്നുള്ള ആശങ്ക ഉള്ളതിനാൽ സ്വർണം വിൽക്കുന്നതിനെ സംബന്ധിച്ചാണ് ആളുകൾ കൂടുതലായി തിരക്കുന്നതും ജ്വല്ലറികളിലേക്ക് എത്തുന്നതും .അതിന് പ്രധാന കാരണം സ്വർണവില വീണ്ടും താഴേക്ക് കൂപ്പുകൂത്തും എന്നുള്ള തരത്തിൽ നിലവിൽ വാർത്തകൾ ഒക്കെ വരുന്നതുകൊണ്ടാണ്. പൊതുവെ വില താഴാനായി കാത്ത് നിൽക്കുന്നൊരു ട്രൻ്റാണ് വിപണിയിൽ കാണുന്നത്.

വിൽക്കാനുള്ള ആളുകൾ വളരെ ആശങ്കപ്പെട്ട് വിളിക്കുന്നുണ്ട്. കാര്യങ്ങൾ തിരക്കുന്നുണ്ട് പക്ഷേ അവരും ഇനിയും കൂടിയാലോ എന്നുള്ള ഒരു കാരണം കൊണ്ട് മടിച്ചു നിൽക്കുന്ന ഒരു അവസ്ഥയാണ്. നിലവിലെ സാഹചര്യത്തിൽ ഒരു ലക്ഷം രൂപയ്ക്ക് താഴേക്ക് സ്വർണവില കൂപ്പ് കുത്താനുള്ള സാധ്യത കാണുന്നുണ്ട്. അത് എവിടെവരെ താഴേക്ക് പോകുമെന്ന് നമുക്ക് പറയാൻ സാധിക്കില്ല. ശരിക്കും ഈ സ്വർണവില കുറയാൻ ആരംഭിച്ചത് പശ്ചിമേഷ്യയിൽ യുദ്ധം ഉണ്ടായതോടെയാണ്. യുദ്ധം സംഭവിച്ചതോടെ ക്രൂഡ് ഓയിലിന്റെ വില വർദ്ധിക്കുന്ന ഒരു ട്രെൻഡ് വന്നു. എണ്ണ വില വർധിച്ചതോടെ ഡോളർ മൂല്യം ഉയർന്നു. ഇത് നിക്ഷേപകരെ സ്വർണത്തിൽ നിന്നും അകറ്റി.

പക്ഷേ ഇപ്പോൾ യുദ്ധം ഏകദേശം ഒരു സമാധാനത്തിന്റെ പാതയിലേക്ക് ഒക്കെ എത്തുന്ന ഒരു കാഴ്ച കാണുന്നുണ്ട്. ആ സമയത്ത് സ്വർണവില കൂടും എന്ന് പ്രതീക്ഷിച്ചിരുന്നു. എന്നാൽ സ്വർണവില കൂടുന്നതിനു പകരം കുറയുകയാണ്. അമേരിക്കൻ ഫെഡ് റിസർവ്വ് പലിശ നിരക്കിൽ എന്ത് മാറ്റം വരുത്തുമെന്നതാണ് വിപണി ഉറ്റുനോക്കുന്നത്. പലിശ നിരക്ക് കൂട്ടിയാൽ ഡോളർ മൂല്യം ഉയരും. ഇതോടെ നിക്ഷേപകരെല്ലാം കൂട്ടത്തോടെ ഡോളറിലേക്ക് നിക്ഷേപിക്കും. ഡോളർ മൂല്യം ഉയർന്ന് നിൽക്കുന്നത് മൂലമുണ്ടാകുന്ന മാറ്റം തന്നെയാണ് വിപണിയിൽ ഇപ്പോൾ സ്വർണത്തിന് സംഭവിച്ചുകൊണ്ടിരിക്കുന്നത്.

നിലവിൽ ഈ സാഹചര്യം തുടരുകയാണെങ്കിൽ സ്വർണ വില വീണ്ടും താഴേക്ക് കൂപ്പുകുത്തും. അതേസമയം ട്രെൻഡ് മാറാനായിട്ട് അധികം സമയം വേണ്ട. ട്രെൻഡ് അങ്ങോട്ടോ ഇങ്ങോട്ടോ മാറിയാൽ മാറ്റം ഉണ്ടാകും. സ്വർണത്തിലേക്ക് ആളുകൾ നിക്ഷേപിക്കും. ഡോളറിന് ഡിമാൻഡ് കുറഞ്ഞാൽ സ്വാഭാവികമായും സ്വർണ വില തിരിച്ചുകയറാനുള്ള സാധ്യത കാണുന്നുണ്ട് ', അരുണ്‍ മാർക്കോസ് പറഞ്ഞു.