തക്കാളിക്ക് പകരം പുളി ഉപയോഗിക്കേണ്ടി വരുമോ, കുതിച്ചുയര്‍ന്ന് പച്ചക്കറി വില

കണ്ണൂര്‍: പച്ചക്കറികള്‍ക്കും, അനാദി സാധനങ്ങളുടെയും വില കുതിച്ചുയരുന്നു. പച്ചക്കറികള്‍ക്ക് രണ്ടാഴ്ചക്കിടെ 20 രൂപയോളമാണ് വര്‍ധിച്ചത്. ദിനേനെ വര്‍ധിച്ചു വരുന്ന പെട്രോള്‍ ഡീസല്‍ വിലയും സാധനങ്ങളുടെ വിലക്കയറ്റത്തിന് പ്രധാന കാരണമാകുന്നുണ്ടെന്നാണ് കച്ചവടക്കാര്‍ പറയുന്നത്. കഴിഞ്ഞയാഴ്ച 20 രൂപക്ക് വില്‍പ്പന നടത്തിയിരുന്ന തക്കാളിക്ക് ഇന്നത്തെ വില 60 രൂപയാണ്. 22, 23 രൂപക്ക് വില്‍പ്പന നടത്തിയിരുന്ന ഉള്ളി ഇന്ന് 40 രൂപക്ക് വില്‍പ്പന നടത്തേണ്ട അവസ്ഥയാണ് കച്ചവടക്കാര്‍ക്ക്.

തക്കാളി, ഉള്ളി കൂടാതെ പയറിനും വില വര്‍ധിച്ചിട്ടുണ്ട്. 50 രൂപക്കാണ് പയര്‍ വില്‍പ്പന നടത്തുന്നത്. കേരളത്തിലേക്ക് തക്കാളി എത്തികൊണ്ടിരുന്നത് കര്‍ണാടകയിലെ മൈസൂര്‍, ബാംഗ്ലൂര്‍ എന്നിവിടങ്ങളില്‍ നിന്നാണ്. ഇപ്പോള്‍ കേരളത്തിലേക്ക് തക്കാളിയെത്തിക്കുന്നത് മഹാരാഷ്ട്രയില്‍ നിന്നുമാണ്. കര്‍ണാടകയില്‍ മഴ കാരണം കൃഷി കുറഞ്ഞതും തക്കാളി ഉല്‍പാദിപ്പിക്കാന്‍ സാധിക്കാത്തതും വില കൂടാന്‍ കാരണമായി.

പൂണെയില്‍ നിന്നുമാണ് കേരളത്തിലേക്ക് ഉള്ളി എത്തുന്നത്. മഴകാരണം പൂണെയിലും ഉള്ളി ലഭ്യത കുറഞ്ഞത് കാരണം വില കൂടാന്‍ കാരണമായെന്നാണ് മൊത്തകച്ചവടക്കാര്‍ പറയുന്നത്. കൂടാതെ സമീപ സംസ്ഥാനങ്ങളിലേക്ക് പച്ചക്കറി കയറ്റിവിടുന്നത് മൂലം കേരളത്തിലേക്കുള്ള പച്ചക്കറി ലഭ്യത കുറഞ്ഞ് വരികയാണ്. ഇതും വില കൂടാന്‍ കാരണമായെന്നാണ് കച്ചവടക്കാര്‍ പറയുന്നു ഉരുളക്കിഴങ്ങിനും വില കൂടുതലാണ്. 25 രൂപയാണ് ഉരുളക്കിഴങ്ങിന്റെ വില. ബീന്‍സ് പയര്‍ എന്നിവ കിട്ടാനില്ലാത്ത സ്ഥിതിയാണ് നിലവില്‍.

പച്ചക്കറികള്‍ക്ക് പുറമെ ചുവന്ന പരിപ്പ്, പഞ്ചസാര, കോഴിത്തീറ്റ, പിണ്ണാക്ക് എന്നിവയുടെ വിലയും വര്‍ധിച്ചിട്ടുണ്ട്. 100 രൂപയാണ് ചുവന്ന പരിപ്പിന്റെ വില. പഞ്ചസാരക്ക് 42 രൂപയും. ദിനേനെ വര്‍ധിക്കുന്ന പെട്രോള്‍ ഡീസല്‍ വില കാരണമാണ് ഇത്തരം സാധനങ്ങള്‍ക്ക് വില വര്‍ധിക്കാന്‍ കാരണമെന്നാണ് മൊത്ത കച്ചവടക്കാര്‍ പറയുന്നത്.

സാധനങ്ങളുടെ വില വര്‍ധനവ് മൂലം കൂടുതല്‍ ദുരിതം അനുഭവിക്കുന്നത്. ചെറുകിട കച്ചവടക്കാരും ഉള്‍നാടന്‍ ഗ്രാമങ്ങളില്‍ കച്ചവടം ചെയ്യുന്നവരുമാണ്. മൊത്തകച്ചവടക്കാരില്‍ നിന്ന് 55 രൂപ ഹോള്‍സെയില്‍ നിരക്കില്‍ തക്കാളി വാങ്ങി ഇവര്‍ക്ക് കച്ചവടം ചെയ്യേണ്ടി വരിക 60 മുതല്‍ 65 രൂപയ്ക്ക് വരെയായിരിക്കും. എന്നാല്‍ ഇത്രയും പൈസയീടാക്കുമ്പോള്‍ ഉപഭോക്താക്കള്‍ സാധനം വാങ്ങാത്ത സ്ഥിതിയുമുണ്ടാകുകയും കച്ചവടം നിര്‍ത്തേണ്ട അവസ്ഥയുമുണ്ടാകും. ഒരു ട്രേ തക്കാളിയില്‍ ഉപയോഗിക്കാന്‍ സാധിക്കാതെ ചീഞ്ഞ് പോയവയുമുണ്ടാകും. ഇത് എടുത്ത് കളയുമ്പോഴേക്കും കച്ചവടം ചെയ്യാനുണ്ടാവുക വളരെ കുറച്ച് മാത്രമായിരിക്കും. ഇതും കച്ചവടക്കാര്‍ക്ക് നഷ്ടമുണ്ടാക്കുന്നു.

പച്ചക്കറികള്‍ക്കും, അനാദി സാധനങ്ങള്‍ക്കും വില വര്‍ധിച്ചതോടെ ഹോട്ടല്‍ റസ്‌റ്റോറന്റ് മേഖലയലും പ്രതിസന്ധിയിലായിരിക്കുകയാണ്. കോവിഡ് കാരണം ആള്‍ക്കാര്‍ക്ക് ഹോട്ടലുകളില്‍ ഇരുന്ന് ഭക്ഷണം കഴിക്കാന്‍ പറ്റാത്ത സ്ഥിതിയായിരുന്നു. പിന്നീട് നിരന്തര പ്രതിഷേധം മൂലം സര്‍ക്കാര്‍ ഹോട്ടലുകളില്‍ ഇരുന്ന് ഭക്ഷണം കഴിക്കാനുള്ള അനുമതി നല്‍കിയതോടെ പ്രതിസന്ധി തരണം ചെയ്ത് കച്ചവടം തിരിച്ച്പിടിക്കുമ്പോഴേക്കുമാണ്, ഇടിത്തീ പോലെ സാധനങ്ങളുടെ വില ഉയര്‍ന്നതെന്ന് കണ്ണൂരിലെ പുലരി ഹോട്ടല്‍ ഉടമ വിപിന്‍ പറഞ്ഞു. പെട്ടെന്ന് സാധനങ്ങളുടെ വില കൂട്ടുകയെന്നത് പ്രയാസമാണെന്നും അദ്ദേഹം കൂട്ടിചേര്‍ത്തു. വിലക്കയറ്റം ഇങ്ങനെ തുടര്‍ന്നാല്‍ ഹോട്ടല്‍ അടച്ചിടേണ്ട അവസ്ഥയായിരിക്കും ഉണ്ടാവുകയെന്നും അദ്ദേഹം പറഞ്ഞു.

ഇന്ധന വി വര്‍ധനവും, പാചക വാതക വില വര്‍ധനവും, ഒപ്പം തന്നെ സാധനങ്ങളുടെ വില വര്‍ധനവും കൂടിയായപ്പോള്‍ സാധാരണക്കാരന് താങ്ങാവുന്നതിലും അപ്പുറമായിരിക്കുകയാണ്. തക്കാളിക്ക് പകരം പുളി ഉപയോഗിക്കേണ്ടി വരുമോ എന്ന ആശങ്കയിലാണ് പല കുടുംബവും.

English summary

Will you have to use tamarind instead of tomatoes, soaring vegetable prices