ബാധ ഒഴിപ്പിയ്ക്കുന്നതിനിടെ യുവതി മരിച്ച സംഭവത്തില് മന്ത്രവാദി അറസ്റ്റില്
പത്തനംതിട്ട: ബാധ ഒഴിപ്പിയ്ക്കുന്നതിനിടെ യുവതി കൊല്ലപ്പെട്ട സംഭവത്തില് മന്ത്രവാദി അറസ്റ്റില്. മുഹമ്മദ് സിറാജുദ്ദീന് എന്ന സിദ്ധനാണ് പത്തനംതിട്ടയില് നിന്ന് അറസ്റ്റിലായത്. ബാധയൊഴിപ്പിയ്ക്കുന്നതിന്റെ പേരില് കൊല്ലം കരുനാഗപ്പള്ളി സ്വദേശിനി ഹസീന(26)യെ ചവിട്ടി കൊന്നതിനാണ് സിദ്ധന് അറസ്റ്റിലായത്.
സിദ്ധന്റെ ചവിട്ടേറ്റ് നട്ടെല്ല് തകര്ന്ന് വയറില് രക്തം നിറഞ്ഞാണ് ഒരു കുഞ്ഞിന്റെ അമ്മ കൂടിയായ ഹസീന മരിയ്ക്കുന്നത്. മാനസികാരോഗ്യപ്രശ്നമുള്ള യുവതിയെ ചവിട്ടിയും അടിച്ചും കൊന്നെന്നാണ് കേസ്. കേസില് ഹസീനയുടെ പിതാവും സിദ്ധന്റെ സഹായിയും നേരത്തെ അറസ്റ്റിലായിരുന്നു.
മന്ത്രവാദിയെ കുടുംബത്തിന് പരിചയപ്പെടുത്തിയ പിതാവിന്റെ സുഹൃത്ത് കബീര് കേസില് രണ്ടാം പ്രതിയാണ്. മന്ത്രവാദിയായ സിറാജുദ്ദീന് ഒട്ടേറെ കേസുകളില് പ്രതിയാണ്. യുവതിയെ ഭക്ഷണവും വെള്ളവും നല്കാതെ മന്ത്രവാദത്തിന്റെ പേരില് മര്ദ്ദിയ്ക്കുകയായിരുന്നെന്ന് പ്രദേശവാസികള് പറയുന്നു.
മന്ത്രവാദിയുടം ചവിട്ടേറ്റ് അബോധാവസ്ഥയിലായ യുവതി മരിയ്ക്കുകയായിരുന്നു. നട്ടെല്ലിനേറ്റ ക്ഷതമാണ് മരണത്തിന് കാരണമെന്ന് പോസ്റ്റ്മോര്ട്ടത്തില് വ്യക്തമായിരുന്നു. മന്ത്രവാദത്തിനിടെയാണ് യുവതി മരിച്ചതെന്ന് ചൂണ്ടിക്കാട്ടി നാട്ടുകാര് പൊലീസില് പരാതി നല്കിയിരുന്നു.