'ലീഗിലും താലിബാനോ': മാതൃഭൂമി ചാനല്‍ ചര്‍ച്ചയ്ക്കെതിരെ രൂക്ഷ വിമര്‍ശനവുമായി വനിതാ ലീഗ് നേതാവ്

കോഴിക്കോട്: എം എസ് എഫിന്‍റെ വനിതാ വിഭാഗമായ ഹരിതയിലെ വിഷയവുമായി ബന്ധപ്പെട്ട് മാതൃഭൂമി ചാനല്‍ കഴിഞ്ഞ ദിവസം നടത്തിയ ചര്‍ച്ചയ്ക്കെതിരെ വിമര്‍ശനവുമായി വനിതാ ലീഗ്‌ സംസ്ഥാന പ്രസിഡന്റ് സുഹറ മമ്പാട്‌ . 'ലീഗിലും താലിബാനോ?' എന്ന തലക്കെട്ടോടെ നടത്തിയ ചര്‍ച്ചയക്കെതിരെയാണ് സുഹറ മമ്പാടിന്‍റെ വിമര്‍ശനം. മഹത്തായ ഒരു പ്രസ്ഥാനത്തെ താലിബാനോട്‌ ചേർത്ത്‌ ഉപമിക്കാൻ ലജ്ജ തോന്നുന്നില്ലെയെന്ന് ഫേസ്ബുക്ക് കുറിപ്പിലൂടെ സുഹ്റ മമ്പാട് ചോദിക്കുന്നു.

സാമ്രാജ്യത്തത്തിനെതിരെ സമരം ചെയ്ത്‌ എല്ലാം നഷ്ടപ്പെട്ട ഒരു ജനസമൂഹത്തെ ഇന്ന് ഈ കാണുന്ന വികാസങ്ങളിലൊക്കെ കൊണ്ടെത്തിച്ച ഈ മഹാ പ്രസ്ഥാനത്തെ വേട്ടപ്പട്ടികൾക്കും ചെന്നായ്ക്കൾക്കും‌ ഇതുപോലെ കടിച്ചു കീറാൻ ഇട്ടുകൊടുക്കരുതെന്നും അവര്‍ പറയുന്നു. അവരുടെ കുറിപ്പിന്‍റെ പൂര്‍ണ്ണ രൂപം ഇങ്ങനെ..

ലീഗിലും താലിബാനോ ? ഇന്നലെ മാതൃഭൂമി ചാനലിലെ വേണു നടത്തിയ ചർച്ചയുടെ ക്യാപഷനാണിത്‌. നിങ്ങൾ ഏത്‌ പ്രസ്ഥാനത്തെയാണു താലിബാനുമായി കൂട്ടി കെട്ടുന്നത്‌ എന്നറിയാമോ ?. ഇതാ ഈ കാണുന്ന സ്‌കൂളുകളും കോളേജുകളുമൊക്കെയുണ്ടാക്കി ഇത്രമാത്രം പെൺകുട്ടികൾക്ക്‌ വിദ്യാഭ്യാസം നൽകിയ വലിയ പരിവർത്തനമുണ്ടാക്കിയ ലീഗിനെ !. നിങ്ങൾകാണുന്നില്ലെ ഈ കലാലയങ്ങളിലൊക്കെ പെൺകുട്ടികൾ ചിരിച്ചുല്ലസിച്ച്‌ നിറഞ്ഞു നിൽക്കുന്നത്‌ ?.

എന്നിട്ട്‌ മഹത്തായ ഈ പ്രസ്ഥാനത്തെ താലിബാനോട്‌ ചേർത്ത്‌ ഉപമിക്കാൻ ലജ്ജ തോന്നുന്നില്ലേ. സാമ്രാജ്യത്തത്തിനെതിരെ സമരം ചെയ്ത്‌ എല്ലാം നഷ്ടപ്പെട്ട ഒരു ജനസമൂഹത്തെ ഇന്ന് ഈ കാണുന്ന വികാസങ്ങളിലൊക്കെ കൊണ്ടെത്തിച്ച നമ്മുടെ ഈ മഹാ പ്രസ്ഥാനത്തെ എന്തിന്റെ പേരിലാണെങ്കിലും വേട്ടപ്പട്ടികൾക്കും ചെന്നായ്ക്കൾക്കും‌ ഇതുപോലെ കടിച്ചു കീറാൻ ഇട്ടുകൊടുക്കരുത്‌.

അറുപതുകളിൽ ജനിച്ച്‌ എഴുപതുകളിൽ വളർന്ന ഞങ്ങൾക്ക്‌ തൊട്ടു മുൻപത്തെ തലമുറക്ക്‌ കിട്ടാത്തതു പലതും കിട്ടിത്തുടങ്ങിയിരുന്നു പുതിയ സ്കൂളുകളും കോളേജുകളും പിന്നെ യൂണിവേഴ്സിറ്റിയും. അതു നൽകിയ സി എച്ച്‌ മനസ്സിൽ ഒരു ആവേശമായി കുടികൊണ്ടു ലീഗ്‌ ഹൃദയ താളമായി.‌ ഞങ്ങൾ പഠിച്ചു ഞങ്ങളുടെ മക്കളും പേരമക്കളും പഠിച്ചു ഇന്നവർ ഉയരങ്ങൾ കീഴടക്കുന്ന യാത്രയിലാണ്.

താലിബാൻ എന്നല്ല ഏത്‌ സംഘടനക്കും ലോകത്ത്‌ എങ്ങും ജനാധിപത്യ രാഷ്ട്രീയത്തുനും മാതൃകയാക്കാവുന്ന തുല്ല്യതിയില്ലാത്ത രാഷ്ട്രീയ - വിദ്യാഭ്യാസ നവോത്ഥാന പ്രസ്ഥാനമാണ് മുസ്‌ലിം ലീഗ്‌. ആട്ടിൻ കുട്ടികളെ തമ്മിലടിപ്പിച്ച്‌ ചോരകുടിക്കാൻ കാത്തുനിൽക്കുന്ന ചെന്നായ്ക്കളാണു നമുക്ക്‌ ചുറ്റും അത്‌ മാധ്യമങ്ങളായാലും ലീഗ്‌ വിരോധികളായാലും അങ്ങിനെ തന്നെ.

നിങ്ങളോട്‌ ഇപ്പോൾ സോഷ്യൽ മീഡിയക്കകത്തും പുറത്തും സ്നേഹം നടിക്കുന്ന ലീഗ്‌ വിരോധികളെല്ലാം ചെന്നായ്ക്കൾ താന്നെയാണ്. അങ്ങിനെ ചോരകുടിക്കാം എന്ന് ചെന്നായ്ക്കൾ ആരും വ്യാമോഹിക്കേണ്ട. ചേർന്ന് നിൽക്കാൻ ആഗ്രഹിക്കുന്ന 'എന്റെ കുട്ടികളെയെല്ലാം' ചേർത്ത്‌ നിർത്തും അത്‌ ആൺകുട്ടികളായാലും പെൺകുട്ടികളായാലും- സുഹ്റ മമ്പാട് എഴുത്ത് അവസാനിപ്പിക്കുന്നു.

English summary

Women's League leader Suhra Mambadu sharply criticizes Mathrubhumi channel prime time debate