"രണ്ടുമാസം കൂടി ഉറങ്ങിക്കോളൂ, പിന്നെ പ്രതിപക്ഷത്തിരിക്കാം"; DYFI-യെ ട്രോളി അബിൻ വർക്കി

കേരളത്തിൽ വരാനിരിക്കുന്ന ഭരണമാറ്റത്തെ സൂചിപ്പിച്ചുകൊണ്ട് ഡിവൈഎഫ്ഐയെയും എൽഡിഎഫ് സർക്കാരിനെയും രൂക്ഷമായ ഭാഷയിൽ പരിഹസിച്ച് യൂത്ത് കോൺഗ്രസ് നേതാവ് അബിൻ വർക്കി. ഇനിയുള്ള രണ്ട് മാസം കൂടി ഡിവൈഎഫ്ഐക്ക് സുഖമായി ഉറങ്ങാമെന്നും, അതുകഴിഞ്ഞാൽ അവർക്ക് പ്രതിപക്ഷത്തിരുന്ന് സമരം ചെയ്യേണ്ടി വരുമെന്നുമാണ് അബിൻ വർക്കിയുടെ പരിഹാസം.

കഴിഞ്ഞ ഒമ്പത് വർഷമായി ഡിവൈഎഫ്ഐ സംസ്ഥാനത്ത് ഉറക്കത്തിലായിരുന്നുവെന്ന് അബിൻ വർക്കി ആരോപിച്ചു. ജനങ്ങളെ ബാധിക്കുന്ന വിഷയങ്ങളിൽ സംഘടന പ്രതികരിക്കുന്നില്ലെന്നും അദ്ദേഹം കുറ്റപ്പെടുത്തി. "ഡിവൈഎഫ്ഐ പ്രവർത്തകരോട് ഇപ്പോൾ 'ഗുഡ് നൈറ്റ്' എന്ന് മാത്രമേ പറയാനുള്ളൂ. രണ്ടുമാസം കൂടി കഴിഞ്ഞാൽ ഭരണമാറ്റം സംഭവിക്കും. അന്ന് നിങ്ങൾ പ്രതിപക്ഷത്ത് വരും, അന്ന് മുതൽ നിങ്ങൾക്ക് തെരുവിൽ സമരം ചെയ്യാം," അദ്ദേഹം പരിഹസിച്ചു.

വി.ഡി. സതീശനെ തടയാൻ നോക്കേണ്ട

പ്രതിപക്ഷ നേതാവ് വി.ഡി. സതീശനെതിരെ ഡിവൈഎഫ്ഐ നടത്തുന്ന നീക്കങ്ങളെയും അദ്ദേഹം രൂക്ഷമായി വിമർശിച്ചു. സതീശനെ തടയാമെന്നത് ഡിവൈഎഫ്ഐയുടെ വെറും വ്യാമോഹം മാത്രമാണെന്ന് അബിൻ വർക്കി പറഞ്ഞു. യൂത്ത് കോൺഗ്രസിനെയും കെഎസ്‌യുവിനെയും വിരട്ടാമെന്ന് ആരും കരുതേണ്ട. അത്തരം നീക്കങ്ങൾക്കെതിരെ തങ്ങൾ കയ്യും കെട്ടി നോക്കി നിൽക്കില്ലെന്ന് മുന്നറിയിപ്പ് നൽകിയ അദ്ദേഹം, വിരട്ടാൻ നോക്കുന്നവർ ആ വെള്ളം വാങ്ങി വെക്കുന്നതാകും നല്ലതെന്നും കൂട്ടിച്ചേർത്തു.

മന്ത്രി വീണാ ജോർജിനെതിരെ രൂക്ഷവിമർശനം

ആരോഗ്യ മേഖലയിലെ വീഴ്ചകൾ ചൂണ്ടിക്കാട്ടി ആരോഗ്യ മന്ത്രി വീണാ ജോർജിനെതിരെയും അബിൻ വർക്കി ആഞ്ഞടിച്ചു. സംസ്ഥാനത്തെ സർക്കാർ ആശുപത്രികളിൽ സാധാരണക്കാർക്ക് സമാധാനത്തോടെ പോകാൻ കഴിയാത്ത അവസ്ഥയാണുള്ളത്. മന്ത്രിക്ക് അല്പമെങ്കിലും ധാർമ്മികതയുണ്ടെങ്കിൽ ഉടൻ രാജി വെച്ച് ഒഴിയണം. ജനവിരുദ്ധ നയങ്ങളുമായി മുന്നോട്ടുപോകുന്ന ഈ സർക്കാരിനെതിരെ വരും ദിവസങ്ങളിൽ സമരം കൂടുതൽ ശക്തമാക്കുമെന്നും അദ്ദേഹം വ്യക്തമാക്കി. കേരള രാഷ്ട്രീയത്തിൽ വരും ദിവസങ്ങളിൽ യൂത്ത് കോൺഗ്രസ്-ഡിവൈഎഫ്ഐ പോര് കൂടുതൽ ശക്തമാകുമെന്ന സൂചനയാണ് അബിൻ വർക്കിയുടെ വാക്കുകൾ നൽകുന്നത്.