പാകിസ്താനിലേക്ക് പോകാന്‍ കൊതിക്കുന്ന കശ്മീരികളെ കൂട്ടക്കൊല ചെയ്യണമെന്ന് യുവമോര്‍ച്ച നേതാവ്...

പാലക്കാട്: കഴിഞ്ഞ ദിവസങ്ങളില്‍ പാകിസ്താനോടുള്ള സാധാരണ ഇന്ത്യക്കാരുടെ വികാരം എന്തായിരിക്കും എന്ന് ഊഹിക്കാം. സൈനിക താവളത്തിന് നേര്‍ക്ക് പാക് ഭീകരര്‍ നടത്തിയ ആക്രമണത്തില്‍ 17 സൈനികരാണ് കൊല്ലപ്പെട്ടത്.

പക്ഷേ, പാകിസ്താനിലേക്ക് പോകാന്‍ ആഗ്രഹിക്കുന്ന എല്ലാ കശ്മീരികളേയും കൂട്ടക്കൊല ചെയ്ത് കുഴിച്ച് മൂടണം എന്ന് പറയുന്നതില്‍ എന്ത് യുക്തിയാണ് ഉള്ളത്. എന്തുകൊണ്ടാണ് ഇപ്പോഴും ചിലരെങ്കിലും പാകിസ്താനിലേക്ക് പോകാന്‍ ആഗ്രഹിക്കുന്നത് എന്നതല്ലേ കണ്ടെത്തേണ്ടത്.

യുവ മോര്‍ച്ച് പാലക്കാട് ജില്ല മുന്‍ വൈസ് പ്രസിഡന്റ് ആയ സന്ദീപ് വാര്യരുടെ ഫേസ്ബുക്ക് പോസ്റ്റിലാണ് അങ്ങനെയുള്ളവരെ കൂട്ടക്കൊല ചെയ്യണം എന്ന് ആഹ്വാനം ചെയ്യുന്നത്. കേന്ദ്ര സര്‍ക്കാരിന് കീഴിലെ ഓള്‍ ഇന്ത്യ ഹാന്‍ഡ്‌ലൂം ബോര്‍ഡ് അംഗമാണ് സന്ദീപ് എന്നാണ് അദ്ദേഹത്തിന്റെ ഫേസ്ബുക്ക് അക്കൗണ്ട് പറയുന്നത്.

'പാകിസ്താനിലേക്ക് പോകാന്‍ ആഗ്രഹിക്കുന്ന കശ്മീരികളെ കൂട്ടക്കൊല ചെയ്ത് കുഴിച്ചുമൂടുകയാണ് ഏക പോംവഴി. ഒരു മൂവായിരമോ നാലായിരമോ എണ്ണത്തിനെ കഴുത്തില്‍ ടയര്‍ ഇട്ട് കത്തിച്ച് കൊല്ലണം. ബാക്കി ഉള്ളവര്‍ തന്നെ ഒതുങ്ങി മര്യാദക്കാരാവും. അനുഭവം ഗുരു'- ഇതായിരുന്നു സന്ദീപ് വാര്യരുടെ ഫേസ്ബുത്ത് പോസ്റ്റ്.

സന്ദീപിന്റെ പോസ്റ്റിനെ അനുകൂലിച്ചും പ്രതികൂലിച്ചും പലരും രംഗത്ത് വന്നു. പ്രതികൂലിച്ച് വരുന്നവരുടെ എണ്ണം കൂടി. സ്‌ക്രീന്‍ ഷോട്ടുകള്‍ പല ഫേസ്ബുക്ക് ചര്‍ച്ചാ വേദികളിലും എത്തി. ഇതോടെ ആ ഫേസ്ബുക്ക് പോസ്റ്റ് തന്നെ അപ്രത്യക്ഷമായി..

English summary

Morch Palakkad Former District Vice President Snadeep Varier wrote that a genocide of Pakistan aspiring Kashmiri's will end the issue. Later he deleted his FB Post.