സന്നിധാനത്ത് സംഘർഷത്തിന് നേതൃത്വം നൽകിയത് യുവമോർച്ച നേതാവ് ആർ രാജേഷ്?

സന്നിധാനം: സന്നിധാനത്ത് അപ്രതീക്ഷിതമായി ഉണ്ടായ പ്രതിഷേധത്തിന് നേതൃത്വം നൽകിയത് യുവമോർച്ച നേതാവെന്ന് റിപ്പോർട്ട്. താൻ ഒരു ഭക്തനാണെന്നും ശരണം വിളിച്ചതിനാണ് തന്നെ അറസ്റ്റ് ചെയ്തതെന്നും അദ്ദേഹം മാധ്യമങ്ങളോട് പറഞ്ഞിരുന്നു. താൻ ഒരു സംഘടനയുടെയും നേതാവല്ലെന്നും അദ്ദേഹം വ്യക്തമാക്കിയിരുന്നു. എറണാകുളം പെരുമ്പാവൂർ സ്വദേശിയാണ് ഇയാൾ.

രാജേഷ് അടക്കമുള്ളവരുടെ നേതൃത്വത്തിലാണ് വലിയ നടപ്പന്തലിൽ പ്രതിഷേധം നടന്നത്. ഇരുന്നൂറോളം പേരാണ് പ്രതിഷേധവുമായി അപ്രതീക്ഷിതമായി വലിയ നടപ്പന്തലിൽ എത്തിയത്. നിരോധനാജ്ഞ നിലവിലുള്ള സ്ഥലമാണ് കൂട്ടമായി നിൽക്കരുതെന്ന് പറഞ്ഞിട്ടും പ്രതിഷേധക്കാർ പിരിഞ്ഞ് പോകാൻ തയ്യാറായില്ല. തുടർന്ന് ഇവരെ പോലീസ് അറസ്റ്റ് ചെയ്യുകയായിരുന്നു. ഏത് സ്റ്റേഷനിലേക്കാണ് ഇവരം കൊണ്ടുപോയതെന്ന് വ്യക്തമല്ല.

മാളികപ്പുറത്തിന് സമീപത്ത് നിന്നാണ് പ്രതിഷേധം തുടങ്ങിയത്. നെയ്യഭിഷേകത്തിന് നേരത്തെ ബുക്ക് ചെയ്തവര്‍ക്ക് വിരിവെക്കാനും മറ്റും പോലീസ് സൗകര്യമൊരുക്കിയിരുന്നു. ബുക്ക് ചെയ്യാത്തവരില്‍ സംശയം തോന്നുന്നവരെ പോലീസ് നീക്കം ചെയ്യാന്‍ ശ്രമിച്ചതാണ് പ്രതിഷേധത്തിന് കാരണമെന്നാണ് സൂചന. അതേസമയം ഞങ്ങള്‍ പ്രതിഷേധം നടത്തുകയല്ല. തങ്ങൾ ഭക്തരാണെന്നും നട അടക്കുന്നത് വരെ നാമജപം നടത്താന്‍ ഞങ്ങള്‍ക്ക് അവകാശമുണ്ടെന്നുമാണ് ഇവര്‍ പോലീസിനോട് പറഞ്ഞത്.

English summary

Yuva orcha leader lead protest in Sannidanam