മദ്യപനായ മകനെ അച്ഛനമ്മമാര്‍ കൊന്നു

കൊല്ലം: സ്ഥിരം മദ്യപനായ മകനെ അച്ഛനും അമ്മയും ചേര്‍ന്ന് കൊന്നു. രണ്ട് പേരും പോലീസിന്റെ പിടിയിലായി.കൊല്ലം ജില്ലയിലെ ശാസ്താംകോട്ടക്കടുത്താണ് സംഭവം.

കുന്നത്തൂര്‍ കരിന്തോട്ടുവയിലെ ഷിബു ആണ് കൊല്ലപ്പെട്ടത്. അച്ഛന്‍ ബാബുവിനേയും അമ്മ കുഞ്ഞുമോളേയും കഴിഞ്ഞ ദിവസം കൊട്ടാരക്കര ഡിവൈഎസ്പിയുടെ നേതൃത്വത്തില്‍ അറസ്റ്റ് ചെയ്തു.

ഷിബുവിന്റെ മദ്യപാനം കൊണ്ട് കുടുംബം പൊറുതി മുട്ടി ഇരിക്കുകയായിരുന്നു. ഷിബുവിന്റെ അതിക്രമങ്ങള്‍ സഹിക്കാതെ ഭാര്യ പിണങ്ങിപ്പോയിട്ട് അധിക കാലം ആയിട്ടില്ല. ഇവര്‍ക്ക് രണ്ട് മക്കളുണ്ട്. രണ്ട് പേരും ഷിബുവിന്റെ വീട്ടില്‍ തന്നെയാണ് താമസിക്കുന്നത്.

ഡിസംബര്‍ 4 ന് രാത്രിയില്‍ ആണ് ഷിബു കൊല്ലപ്പെട്ടത്. രാത്രിയില്‍ മദ്യപിച്ച് ലക്കുകെട്ടാണത്രെ ഷിബു വീട്ടിലെത്തിയത്. കയ്യില്‍ പിന്നേയും മദ്യം കരുതിയിരുന്നു. ഈ മദ്യം അമ്മ തന്നെ ഗ്ലാസ്സില്‍ പകര്‍ന്ന് നല്‍കണം എന്നാവശ്യപ്പെട്ടാണ് പ്രശ്‌നം തുടങ്ങിയത്.

മദ്യം ഒഴിച്ചു നല്‍ക്കാന്‍ അമ്മ വിസമ്മതിച്ചതോടെ ഷിബു അക്രമാസക്തനായി. വീടിന് പുറത്തിറങ്ങി കിണറ്റില്‍ ചാടി ആത്മഹത്യ ചെയ്യാനും ഇയാള്‍ ശ്രമിച്ചു. ഒരു തരത്തില്‍ വീടിനകത്തേക്ക് പിടിച്ചുകൊണ്ടെങ്കിലും ഷിബു വീണ്ടും അക്രമാസക്തനാവുകയായിരുന്നുവത്രെ. മദ്യക്കുപ്പി പൊട്ടിച്ച് സ്വന്തം തലയില്‍ മുറിവേല്‍പിച്ച ഷിബുവിനെ അച്ഛന്‍ ബാബു വിലക്കി. ഇതോടെ ബാബുവിന് നേരെയായി ആക്രമണം.

ഒടുവില്‍ നിവൃത്തിയില്ലാതെ മരക്കഷ്ണം കൊണ്ട് ഷിബുവിനെ മര്‍ദ്ദിക്കുകയായിരുന്നു എന്നാണ് ബാബു പറഞ്ഞത്. ബോധ രഹിതനായി നിലത്ത് വീണ ഷിബു അല്‍പസമയത്തിനകം മരിക്കുകയും ചെയ്തു. പിന്നീട് ബാബുവും കുഞ്ഞുമോളും കൂടി മൃതദേഹം റോഡില്‍ തള്ളുകയായിരുന്നു.

English summary

Father and mother arrested for killing their drunkard son at Sasthamkotta.