രണ്ട് മണിക്കൂർ കടയ്ക്ക് മുന്നിൽ ഇരുന്നു; മടങ്ങും മുമ്പ് കടയുടമയ്ക്ക് ആയിരം രൂപ നൽകി ഗവർണർ

Updated: Saturday, January 27, 2024, 14:53 [IST]

കൊല്ലം: നാടകീയമായ രംഗങ്ങളാണ് കൊല്ലം നിലമേൽ ഇന്ന് നടന്നത്. ഗവർണർ ആരിഫ് മുഹമ്മദ് ഖാനെതിരെ എസ് എഫ് ഐ പ്രവർത്തകർ കരിങ്കൊടി കാണിച്ചതിന് പിന്നാലെയാണ് പ്രശ്നങ്ങൾ തുടങ്ങിയത്. 50 ൽ അധികം എസ് എഫ് ഐ പ്രവർത്തകർ ആണ് ഗവർണർക്കെതിരെ പ്രതിഷേധവുമായി എത്തിയത്.

എന്നാൽ പ്രതിഷേധത്തിൽ പ്രകോപിതനായ ഗവർണർ കാറിൽ നിന്ന് പുറത്തിറങ്ങി റോഡരികിൽ കസേരയിട്ട് ഇരിക്കുകയായിരുന്നു. ഒരു കടയുടെ മുന്നിലാണ് ഗവർണർ കസേരയിട്ട് ഇരുന്ന് പ്രതിഷേധിച്ചത്. രണ്ട്‌ മണിക്കൂറോളം നീണ്ട പ്രതിഷേധം അവസാനിപ്പിച്ച് പോകുമ്പോൾ കച്ചവടക്കാരന് 1000 രൂപ നൽകിയാണ് ഗവർണർ മടങ്ങിയത്.

അത്രയും നേരം കച്ചവടം മുടങ്ങിയതിന് പകരമായാണ് കടയുടമയ്ക്ക് അദ്ദേഹം പണം നൽകിയത്. എന്നാൽ സംഭവത്തിൽ പരാതി ഇല്ലെന്നാണ് കടയുടമ പറഞ്ഞത്. പ്രതിഷേധിക്കാനുള്ള അവകാശം എല്ലാവർക്കും ഉണ്ടെന്നും കടയുടമ ഫിറോസ് പറഞ്ഞു.

പൈസ വേണ്ടെന്ന് ഫിറോസ് പറഞ്ഞെങ്കിലും ഗവർണർ ആയിരം രൂപ നൽകുകയായിരുന്നു. അദ്ദേഹം ഇവിടെ വന്ന് ഒരു കസേര ചോദിച്ച് ഇവിടെയിരുന്നു. രണ്ട് മണിക്കൂർ അദ്ദേഹം ഇവിടെയിരിക്കുമെന്ന് കരുതിയില്ല. ആ സമയത്ത് കച്ചവടം നടന്നില്ല. തുടർന്ന് വേണ്ടെന്ന് പറഞ്ഞിട്ടും നിർബന്ധിച്ച് പണം നൽകി. അദ്ദേഹത്തിന്റെ പേഴ്സണൽ സ്റ്റാഫാണ് പണം നൽകിയത്. 1000 രൂപ തന്നു, ഫിറോസ് ഏഷ്യാനെറ്റ് ന്യൂസിനോട് പറഞ്ഞു. രണ്ട് മണിക്കൂറത്തെ പ്രതിഷേധത്തിന് ശേഷം ഗവർണർ സദാന്ദപുരത്തെ പരിപാടി സ്ഥലത്തേക്ക് മടങ്ങിപ്പോയി.

അതേ സമയം, പ്രതിഷേധത്തിൽ നിന്ന് സുരക്ഷ ഒരുക്കിയില്ലെന്ന് ആരോപിച്ച് പോലീസിനെ ശകാരിച്ചതിന് പിന്നാലെയാണ് അദ്ദേഹം വാഹനത്തിൽ നിന്ന് ഇറങ്ങിയത്. പിന്നീട് അദ്ദേഹം വാഹനത്തിൽ കയറിയില്ല. ഇതിന് ശേഷമാണ് സമീപത്തെ കടയിൽ കയറി ഗവർണർ വെള്ളം കുടിക്കുകയും വീണ്ടും പോലീസിനെ ശകാരിക്കുകയും ചെയ്തു. ഇതിനിടെ പോലീസ് എസ് എഫ് ഐ പ്രവർത്തകരെ അറസ്റ്റ് ചെയ്ത് നീക്കി.

പ്രതിഷേധക്കാരെ സംരക്ഷിക്കുന്നത് പോലീസ് ആണെന്നും അവർക്കെതിരെ കേസെടുക്കാതെ വാഹനത്തിൽ കയറില്ലെന്നും പറഞ്ഞാണ് അദ്ദേഹം കാറിൽ കയറാതെ പ്രതിഷേധിച്ചത്. കരിങ്കൊടി കാണിക്കുന്നു എന്നറിഞ്ഞിട്ടും എന്ത് കൊണ്ട് എസ് എഫ് ഐ പ്രവർത്തകരെ കരുതൽ കസ്റ്റഡിയിൽ എടുത്തില്ല എന്ന് ഗവർണർ പോലീസിനോട് ചോദിച്ചു.

‌