പറഞ്ഞ വാക്ക് പാലിച്ച് സിപിഎം: കൂട്ടിക്കല് ദുരന്തത്തിന് ഇരയായ 25 കൂടുംബങ്ങള്ക്ക് വീട് ഒരുക്കി
കോട്ടയം: 2021 ലെ പ്രളയത്തില് സർവ്വതും നഷ്ടമായ കൂട്ടിക്കല് നിവാസികള്ക്ക് കൈത്താങ്ങുമായി സി പി എം. വീട് നഷ്ടപ്പെട്ടവർക്ക് പാർട്ടിയുടെ നേതൃത്വത്തില് വീട് നിർമ്മിച്ച് നല്കുമെന്ന് നേരത്തെ പ്രഖ്യാപിച്ചിരുന്നു. ഇതുപ്രകാരം 25 വീടുകൾ നിർമിച്ച് ഗുണഭോക്താക്കളെ നിശ്ചയിച്ചു. കൂട്ടിക്കൽ ടൗൺ വാർഡിൽ ഉൾപ്പെട്ട തേൻപുഴയിലാണ് ഒരേ പോലെയുള്ള 25 വീടുകളുടെ നിർമാണം പൂർത്തീകരിച്ചത്.
രണ്ടു മുറി, ഹാൾ, അടുക്കള, ശൗചാലയം, സിറ്റൗട്ട് എന്നിവയടങ്ങിയതാണ് ഓരോ വീടും. അർഹരായവരെ ശനിയാഴ്ച നറുക്കിട്ട് തിരഞ്ഞെടുക്കുകയായിരുന്നു. കാഞ്ഞിരപ്പള്ളി ഏരിയ കമ്മിറ്റിയുടെ കീഴിലുള്ള മുഴുവൻ പാർടി അംഗങ്ങളിൽ നിന്നുമുള്ള പണം ഉപയോഗിച്ചാണ് വീട് നിർമാണത്തിനുള്ള രണ്ടേക്കർ പത്ത് സെന്റ് സ്ഥലം വാങ്ങിയത്. സി പി എം കോട്ടയം ജില്ലാ കമ്മിറ്റിയാണ് വീട് നിർമ്മാണത്തിനുള്ള പണം കണ്ടെത്തിയത്.
ദുരിതത്തില് സി പി എം നല്കിയ വാക്ക് പാലിക്കപ്പെടുകയാണെന്ന് മന്ത്രി വിഎന് വാസവന് ഫേസ്ബുക്കില് കുറിച്ചു. വീടുകളുടെ ഔപചാരികമായ കൈമാറ്റം നവംബറിൽ മുഖ്യമന്ത്രി പിണറായി വിജയൻ നിർവഹിക്കുമെന്നും മന്ത്രി ഫേസ്ബുക്കില് കുറിച്ചു. മന്ത്രിയുടെ കുറിപ്പിന്റെ പൂർണ്ണ രൂപം ഇങ്ങനെ..
മലയോര മേഖലയായ കൂട്ടിക്കലിലെ ജനങ്ങളുടെ സ്വത്തും സമ്പാദ്യവുമെല്ലാം പ്രകൃതി കവർന്ന ദുരന്തത്തിന് രണ്ടാണ്ട് തികയുകയാണ്. 2021 ഒക്ടോബർ 16നാണ് കോട്ടയത്തിന്റെ കിഴക്കൻ മേഖലയിലും ഇടുക്കി ജില്ലയുടെ വിവിധ ഭാഗങ്ങളിലും ദുരന്തം പെരുമഴയായി പെയ്തിറങ്ങിയത്. തലചായ്ക്കാനുണ്ടായിരുന്ന കൂരയും ഇത്തിരി ഭൂമിയും അടക്കം ഉരുളെടുത്തപ്പോൾ മലയോര മേഖലയ്ക്ക് നഷ്ടമായത് 13 ജീവനുകൾ കൂടിയാണ്.
ഇടുക്കി ജില്ലയോട് ചേർന്ന മലയോര ഗ്രാമമാണ് കൂട്ടിക്കൽ. കനത്തപേമാരിയിലും ഉരുൾപൊട്ടലിലും നൂറ്റാണ്ടിലെ ഏറ്റവും വലിയ ദുരന്തത്തിനാണ് ആ മലയോരഗ്രാമം സാക്ഷ്യം വഹിച്ചത്. ഗ്രാമത്തിലെ പല പ്രദേശങ്ങളിലും ചെറുതും വലുതുമായ ഉരുൾപൊട്ടലുകളുണ്ടായി. വലിയ ഉരുൾപൊട്ടലില് വാർത്താവിനിമയ ഉപാധികളടക്കം തകർന്നതോടെ വിവരം പുറംലോകമറിയാൻ വൈകി. പലയിടത്തേക്കും രക്ഷാപ്രവർത്തകർക്ക് കടന്നുചെല്ലാനാവാത്ത വിധം റോഡുകളടക്കം തകർന്നു. അന്ന് ജനങ്ങൾ ഒന്നിച്ചാണ് ആ ദുരന്തമുഖത്തു നിന്ന് കരകയറിയത്.
അന്ന് അവർക്ക് നൽകിയ ഒരു വാഗ്ദാനം കൂടി പാലിക്കപ്പെടുകയാണ്. പ്രകൃതിയുടെ സംഹാരതാണ്ഡവത്തിനെതിരെ മനുഷ്യ സ്നേഹത്തിന്റെ ഉദാത്ത മാതൃകയുമായി സി.പി.എം സഹായ ഹസ്തവുമായി 25 വീടുകൾ നിർമ്മിച്ചു നൽകുകയാണ്. കഴിഞ്ഞ ദിവസം ആ വീടുകളുടെ ഗുണഭോക്താക്കളെ നറുക്കെടുപ്പിലൂടെ തിരഞ്ഞെടുത്തു. കൂട്ടിക്കൽ ടൗൺ വാർഡിൽ ഉൾപ്പെട്ട തേൻപുഴയിലാണ് ഒരേ പോലെയുള്ള 25 വീടുകളുടെ നിർമാണം പൂർത്തീകരിച്ചത്.
സി.പി.എം കാഞ്ഞിരപ്പള്ളി ഏരിയ കമ്മിറ്റിയുടെ കീഴിലുള്ള മുഴുവൻ പാർടി അംഗങ്ങളിൽ നിന്നുമുള്ള പണം ഉപയോഗിച്ചാണ് വീട് നിർമാണത്തിനുള്ള രണ്ടേക്കർ പത്ത് സെന്റ് സ്ഥലം വാങ്ങിയത്. കോട്ടയം ജില്ലാ കമ്മിറ്റി വർഗ ബഹുജന സംഘടനകളുടെ സഹകരണത്തോടെയാണ് വീടുകൾ പൂർത്തീകരിച്ചത്. വീടുകളുടെ ഔപചാരികമായ കൈമാറ്റം നവംബറിൽ മുഖ്യമന്ത്രി പിണറായി വിജയൻ നിർവഹിക്കും.
Click it and Unblock the Notifications
Sign in with Google