ഭക്ഷ്യവിഷബാധയേറ്റ് നഴ്സ് മരിച്ച സംഭവം: ഒളിവിൽ ആയിരുന്ന മലബാർ കുഴിമന്തി ഹോട്ടലുടമ അറസ്റ്റിൽ

Updated: Sunday, January 15, 2023, 20:26 [IST]

കോട്ടയം ∙ ഭക്ഷ്യവിഷബാധയേറ്റു കോട്ടയം മെഡിക്കൽ കോളജിലെ സ്റ്റാഫ് നഴ്സ് രശ്മി രാജ് (33) മരിച്ച സംഭവത്തിൽ സംക്രാന്തിയിലെ പാർക്ക് മലബാർ (മലബാർ കുഴിമന്തി) ഹോട്ടൽ ഉടമ അറസ്റ്റിലായി. കാസർകോട് കോയിപ്പടി കോടിയമ്മ കൊളറങ്ങള ലത്തീഫ് (37) ആണ് അറസ്റ്റിലായത്. സംഭവത്തിനു പിന്നാലെ, ഹോട്ടൽ ഉടമ ഒളവിൽ പോയിരുന്നു.

ഇയാളെ കണ്ടെത്താൻ ജില്ലാ പൊലീസ് മേധാവി കെ.കാർത്തിക്കിന്റെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ച് തിരച്ചിൽ നടക്കുക ആയിരുന്നു. കർണാടകയിലെ ബെംഗളൂരുവിന് അടുത്ത് കമ്മനഹള്ളിയിൽനിന്നുമാണ് പ്രതിയെ പിടികൂടിയത്.

ഗാന്ധിനഗർ സ്റ്റേഷൻ എസ്എച്ച്ഒ കെ.ഷിജി, എസ്ഐ എം.സി.പവനൻ, സിപിഒമാരായ പ്രവിനോ, സുനിൽ, വിജയലാൽ, രാഗേഷ് എന്നിവരാണ് അന്വേഷണ സംഘത്തിലുണ്ടായിരുന്നത്. ഹോട്ടലിലെ പാചകക്കാരൻ സിറാജുദ്ദീൻ നേരത്തേ അറസ്റ്റിലായിരുന്നു. ഒളിവിൽ പോയ ഹോട്ടലിലെ ചീഫ് കുക്കായിരുന്നു സിറാജുദ്ദീൻ. സിറാജുദ്ദീനെ കാടാമ്പുഴയിൽ നിന്ന് ആയിരുന്നു പിടികൂടിയത്.

അ തേസമയം ഹോട്ടൽ ഉടമയെ കോടതിയിൽ ഹാജരാക്കി. കഴിഞ്ഞ മാസം 28ന് ആണ് രശ്മി ഈ ഹോട്ടലിൽ നിന്ന് കുഴിമന്തിയും അൽഫാമും കഴിച്ചത്. ഇതിന് പിന്നാലെ യുവതിക്ക് ശാരീരിക അസ്വസ്ഥത ഉണ്ടായി. അസ്വസ്ഥതയ്ക്കു പിന്നാലെ സ്വകാര്യ ആശുപത്രിയിലും പിന്നീട് കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിക്കുകയായിരുന്നു. ഗുരുതരാവസ്ഥയിൽ വെന്റിലേറ്ററിൽ പ്രവേശിപ്പിച്ച രശ്മി മരണപ്പെട്ടുകയായിരുന്നു. ഇതേ ഹോട്ടലിൽ നിന്ന് ഭക്ഷണം കഴിച്ച 21 പേർക്കും ഭക്ഷ്യവിഷബാധയേറ്റിരുന്നു.

പരാതിയിടെ തുടർന്ന് ഭക്ഷ്യ സുരക്ഷ വിഭാഗം ഹോട്ടൽ അടപ്പിച്ചിരുന്നു. നഴ്‌സ് മരിച്ച സംഭവത്തിന് പിന്നാലെ ഭക്ഷ്യ സുരക്ഷ വിഭാഗം സംസ്ഥാനത്ത് ഉടനീളം ഹോട്ടലുകളിൽ പരിശോധന കർശനമാക്കിയിരുന്നു. 14 ജില്ലകളിലും വ്യാപകമായി പരിശോധനകൾ നടത്താൻ ഭക്ഷ്യസുരക്ഷാ കമ്മീഷണർക്ക് നിർദ്ദേശം നൽകിയതായി ആരോഗ്യ വകുപ്പ് മന്ത്രി വീണാ ജോർജ് അറിയിച്ചിരുന്നു.

അതേസമയം, സംസ്ഥാനത്തു പച്ച മുട്ട ഉപയോഗിച്ചുള്ള മയൊണൈസ് ഉൽപാദനം, സംഭരണം, വിൽപന എന്നിവ നിരോധിച്ചു ഭക്ഷ്യസുരക്ഷാ വകുപ്പ് ഉത്തരവിട്ടിട്ടുണ്ട്. വെജിറ്റബിൾ മയൊണൈസോ അല്ലെങ്കിൽ പാസ്ചറൈസ് ചെയ്ത മുട്ട ചേർത്ത മയൊണൈസോ ഉപയോഗിക്കാം. ഭക്ഷ്യസുരക്ഷാ നിയമപ്രകാരം അടിയന്തര പ്രധാന്യത്തോടെ ആണ് ഉത്തരവു. പച്ച മുട്ട ഉപയോഗിച്ചു തയാറാക്കിയ മയൊണൈസ് അപകടകരം മാണെന്ന് കണ്ടെത്തിയിരുന്നു. പച്ച മുട്ട പാസ്ചറൈസ് ചെയ്യാതെ മയൊണൈസ് തയാറാക്കിയാൽ സാൽമൊണെല്ല ബാക്ടീരിയ പെരുകാനും രോഗബാധയുണ്ടാകാനും സാധ്യതയുണ്ടെന്നും ലാബ് പരിശോധനകളിൽ മയൊണൈസിൽ രോഗാണുക്കൾ കണ്ടെത്തിയിരുന്നു.