ഏറ്റുമാനൂര് നഗരസഭയും നാല് പഞ്ചായത്തുകളും കൊവിഡ് ക്ലസ്റ്ററായി പ്രഖ്യാപിച്ചു
കോട്ടയം; ഏറ്റുമാനൂര് മുനിസിപ്പാലിറ്റിയും നാലു പഞ്ചായത്തുകളും ഉള്പ്പെടുത്തി പുതിയ കോവിഡ് ക്ലസ്റ്റര് പ്രഖ്യാപിച്ച് കര്ശന നിയന്ത്രണങ്ങള് ഏര്പ്പെടുത്തി. ഏറ്റുമാനൂര് പച്ചക്കറി മാര്ക്കറ്റില് നടത്തിയ ആന്റിജന് പരിശോധനയില് കൂടുതല് രോഗികളെ കണ്ടെത്തിയ സാഹചര്യത്തില് ജില്ലാ ദുരന്ത നിവാരണ അതോറിറ്റിയുടെ അടിയന്തര യോഗത്തിലെ തീരുമാനം
മുനിസിപ്പാലിറ്റിയില് നിലവില് കണ്ടെയ്ന്മെന്റ് സോണുകളായ 4,27 വാര്ഡുകള് ഒഴികെയുള്ള എല്ലാ വാര്ഡുകളും കാണക്കാരി, മാഞ്ഞൂര് അയര്ക്കുന്നം. അതിരമ്പുഴ ഗ്രാമപഞ്ചായത്തുകളിലെ എല്ലാ വാര്ഡുകളും ചേര്ന്നതാണ് ക്ലസ്റ്റര്. ഇതോടെ ജില്ലയില് ആകെ അഞ്ചു കോവിഡ് ക്ലസ്റ്ററുകളായി. പാറത്തോട്, പള്ളിക്കത്തോട്-ചിറക്കടവ്, പായിപ്പാട്, ചങ്ങനാശേരി എന്നിവയാണ് നിലവിലുണ്ടായിരുന്ന ക്ലസ്റ്ററുകള്.
Recommended Video
അതേസമയം ജില്ലയിൽ ഇന്ന് 59 പേർക്കാണ് രോഗം സ്ഥിരീകരിച്ചത്. ഇതില് 48 പേര്ക്കും സമ്പര്ക്കത്തിലൂടെയാണ് രോഗം ബാധിച്ചത്. മറ്റു സംസ്ഥാനങ്ങളില്നിന്നെത്തിയ ഒന്പതു പേരും വിദേശത്തുനിന്നു വന്ന രെ രോഗബാധിതരില് ഉള്പ്പെടുന്നു.
ഇടുക്കി മെഡിക്കല് കോളേജ് ആശുപത്രിയില് ചികിത്സയില് കഴിഞ്ഞിരുന്ന ഒരാള് ഉള്പ്പെടെ 14 പേര് രോഗമുക്തരായി. നിലവില് 457 പേരാണ് ചികിത്സയില് കഴിയുന്നത്. ജില്ലയില് ഇതുവരെ ആകെ 927 പേര്ക്ക് രോഗം ബാധിച്ചു. 469 പേര് രോഗമുക്തരായി.
ഇപ്പോള് 9703 പേര് നിരീക്ഷണത്തില് കഴിയുന്നു. ഇതില് വിദേശത്തുനിന്ന് വന്ന 3322 പേരും മറ്റു സംസ്ഥാനങ്ങളില്നിന്ന് വന്ന 5491 പേരും രോഗം സ്ഥിരീകരിച്ചവരുടെ പ്രാഥമിക സമ്പര്ക്ക പട്ടികയിലുള്ള 754 പേരും സെക്കന്ഡറി കോണ്ടാക്ട് പട്ടികയിലുള്ള 136 പേരും ഉള്പ്പെടുന്നു.