വീണ്ടും പ്രണയപ്പക? പൊലീസ് സ്റ്റേഷന് മുന്നില്‍ പെണ്‍കുട്ടിയെ കുത്തി മുന്‍ ആണ്‍സുഹൃത്ത്, സംഭവം കോട്ടയത്ത്

Updated: Thursday, October 27, 2022, 17:20 [IST]

കോട്ടയം: കോട്ടയത്ത് പെണ്‍കുട്ടിക്ക് നേരെ യുവാവിന്റെ ആക്രമണ ശ്രമം. ചങ്ങനാശ്ശേരി കറുകച്ചാല്‍ പൊലീസ് സ്റ്റേഷന് മുന്നില്‍ വെച്ച് ആണ് യുവതിക്ക് കുത്തേറ്റത്. മുന്‍ സുഹൃത്തായ യുവാവാണ് പെണ്‍കുട്ടിയെ ആക്രമിച്ചത്. പ്രണയപ്പകയാണോ ആക്രമണത്തിന് പിന്നില്‍ എന്ന് പൊലീസ് അന്വേഷിക്കുന്നുണ്ട്.

സംഭവവുമായി ബന്ധപ്പെട്ട് പാമ്പാടി പൂതക്കുഴി സ്വദേശി അഖിലിനെ പൊലീസ് കസ്റ്റഡിയിലെടുത്തു. പാമ്പാടി കുറ്റിക്കല്‍ സ്വദേശിനിക്ക് ആണ് കറുകച്ചാല്‍ പൊലീസ് സ്റ്റേഷന് മുന്നില്‍ വെച്ച് കുത്തേറ്റത്. വ്യാഴാഴ്ച രാവിലെ 11.30 ഓടെ ആയിരുന്നു അഖില്‍ പാമ്പാടി കുറ്റിക്കല്‍ സ്വദേശിനിയെ ആക്രമിച്ചത്.

പെണ്‍കുട്ടിയുടെ നെഞ്ചിലാണ് അഖില്‍ കുത്താന്‍ ശ്രമിച്ചത്. എന്നാല്‍ ഒഴിഞ്ഞ് മാറിയതോടെ കൈത്തണ്ടയില്‍ നിസാര പരിക്കേറ്റു. അഖിലുമായി പെണ്‍കുട്ടിക്ക് നേരത്തെ സൗഹൃദം ഉണ്ടായിരുന്നു. പിന്നീട് ഈ ബന്ധം പെണ്‍കുട്ടി ഉപേക്ഷിക്കുകയായിരുന്നു.

ഇതോടെ അഖില്‍ പെണ്‍കുട്ടിയെ നിരന്തരം ശല്യപ്പെടുത്താന്‍ തുടങ്ങി. അഖിലിന്റെ ശല്യപ്പെടുത്തല്‍ അസഹനീയമായതോടെ ആണ് പരാതി പറയാനായി മറ്റൊരു സുഹൃത്തിനൊപ്പം കറുകച്ചാല്‍ പൊലീസ് സ്റ്റേഷനിലേക്ക് പെണ്‍കുട്ടി എത്തിയത്.

ഇതിനിടെ പിറകിലൂടെ എത്തിയ അഖില്‍ പെണ്‍കുട്ടിയെ കുത്തുകയായിരുന്നു. കൈയില്‍ കരുതിയ കത്രിക കൊണ്ട് ആണ് അഖില്‍ ആക്രമിച്ചത്. ഒഴിഞ്ഞുമാറിയ പെണ്‍കുട്ടി പെണ്‍കുട്ടി പെട്ടെന്ന് പൊലീസ് സ്റ്റേഷനിലേക്ക് ഓടിക്കയറുകയായിരുന്നു.

ഇതിനിടെ പൊലീസെത്തി പ്രതിയെ കീഴടക്കി. പരിക്കേറ്റ യുവതിയെ ഉടന്‍ സമീപത്തെ ആശുപത്രിയിലെത്തിച്ച് ചികിത്സ നല്‍കുകയും ചെയ്ത്്. പെണ്‍കുട്ടിയുടെ കൈത്തണ്ടയില്‍ തുന്നലുണ്ട്. പിന്നീട് ഇവരെ വീട്ടിലേക്ക് പറഞ്ഞയച്ചു.