കൊവിഡ് വ്യാജപ്രചരണങ്ങളില്‍ അതിവേഗ നടപടി; പൊലീസിനെ അഭിനന്ദിച്ച് വിഎന്‍ വാസവന്‍

Updated: Friday, April 30, 2021, 17:50 [IST]

കോട്ടയം: സമൂഹ മാധ്യമങ്ങളിലൂടെയുള്ള വ്യാജ സന്ദേശ പ്രചരണത്തിനെതിരെ സമയോചിതമായ ഇടപെടല്‍ നടത്തിയ പോലീസിനെ അഭിനന്ദിച്ച് സിപിഎം കോട്ടയം ജില്ലാ സെക്രട്ടറി വിഎന്‍ വാസവന്‍. കോട്ടയം ജില്ലയിലെ കോവിഡ് വ്യാപനവുമായി ബന്ധപ്പെട്ട് ഒരു വ്യാജ സന്ദേശം പൊതുജനങ്ങളെ പരിഭ്രാന്തരാക്കുന്ന രീതിയിൽ സമൂഹമാധ്യമങ്ങളിലൂടെ പ്രചരിപ്പിക്കപ്പെട്ടിരുന്നു. ഉടന്‍ തന്നെ വസ്തുത അന്വേഷിക്കുകയും, പ്രചരിക്കുന്ന വാർത്ത വ്യാജമാണെന്ന് ബോധ്യപ്പെടുകയും ചെയ്തതിനെ തുടർന്ന് ഈ വിവരം ബഹുമാനപ്പെട്ട മുഖ്യമന്ത്രിയുടെ ശ്രദ്ധയിൽപ്പെടുത്തുകയും ഉണ്ടായെന്നും അദ്ദേഹം ഫേസ്ബുക്കില്‍ കുറിക്കുന്നു. വിഎന്‍ വാസവന്‍റെ ഫേസ്ബുക്ക് കുറിപ്പിന്‍റെ പൂര്‍ണ്ണ രൂപം ഇങ്ങനെ..

സമയോചിതമായ ഇടപെടൽ. സമൂഹ മാധ്യമങ്ങളിലൂടെയുള്ള വ്യാജ സന്ദേശ പ്രചരണത്തിനെതിരെ പോലീസ് കേസെടുത്തു.

കോട്ടയം ജില്ലയിലെ കോവിഡ് വ്യാപനവുമായി ബന്ധപ്പെട്ട് ഒരു വ്യാജ സന്ദേശം പൊതുജനങ്ങളെ പരിഭ്രാന്തരാക്കുന്ന രീതിയിൽ സമൂഹമാധ്യമങ്ങളിലൂടെ പ്രചരിക്കുന്നത് ഇന്നലെ ശ്രദ്ധയിൽപ്പെട്ടിരുന്നു. ഉടൻ തന്നെ ഇതിന്റെ വസ്തുത അന്വേഷിക്കുകയും, പ്രചരിക്കുന്ന വാർത്ത വ്യാജമാണെന്ന് ബോധ്യപ്പെടുകയും ചെയ്തതിനെ തുടർന്ന് ഈ വിവരം ബഹുമാനപ്പെട്ട മുഖ്യമന്ത്രിയുടെ ശ്രദ്ധയിൽപ്പെടുത്തുകയും ഉണ്ടായി.

കൂടാതെ ഇതുമായി ബന്ധപ്പെട്ട യഥാർത്ഥ വസ്തുത ഫെയ്സ്ബുക്ക് പേജിലൂടെ ലൈവായി നൽകുകയും ചെയ്തിരുന്നു. ബഹുമാനപ്പെട്ട മുഖ്യമന്ത്രിയുടെ നിർദേശത്തെ തുടർന്ന് ജില്ലാ കളക്ടറും ജില്ലാ പോലീസ് മേധാവിയും സംയുക്തമായി പ്രസ്തുത പ്രചരണങ്ങൾ വ്യാജമാന്നെന്നും വാർത്ത സൃഷ്ടിച്ച വർക്കെതിരെയും , പ്രചരിപ്പിച്ച വർക്കെതിരെയും ഡിസാസ്റ്റർ മാനേജ്മെന്റ് ആക്ട് പ്രകാരവും വിവിധ പോലീസ് വകുപ്പുകളും ചേർത്ത് കേസ് രജിസ്റ്റർ ചെയ്തതായും അറിയിച്ചു. ഇതു പോലുള്ള വ്യാജ വാർത്തകൾ പ്രചരിപ്പിക്കുന്നവർക്കെതിരെ നിയമാനുസൃത നടപടികൾ സ്വീകരിക്കണമെന്നും അതോടൊപ്പം സമൂഹം ഇത്തരത്തിലുള്ള സാമൂഹ്യ വിരുദ്ധ ശക്തികളെ ഒറ്റപ്പെടുത്തുകയും വേണമെന്ന് അഭ്യർത്ഥിക്കുന്നു.