ബസിലെ മുൻഗണനാ സീറ്റുകൾ ആർക്ക്? മുൻഗണനാ ക്രമം എങ്ങനെ? എന്താണ് നിയമം ? അറിയേണ്ടതെല്ലാം..
Recommended Video
കോഴിക്കോട്: ദീർഘദൂര ബസുകളിൽ സ്ത്രീകൾക്ക് മുൻഗണനയുള്ള സീറ്റിൽ നിന്നു പുരുഷൻമാരെ എഴുന്നേൽപ്പിക്കാൻ നിയമപ്രകാരം വകുപ്പുണ്ടോ? ഏഴുന്നേൽപ്പിക്കാൻ പാടില്ലെന്ന് നിയമം ഉണ്ടെന്നാണ് സമൂഹ മാധ്യമങ്ങളിൽ ഉൾപ്പെടെ വ്യാപകമായി പ്രചരിക്കുന്നത്. സമൂഹ മാധ്യമങ്ങളിൽ വൻ പ്രചാരം ലഭിച്ചതോടെ ചില ഓൺലൈൻ മാധ്യമങ്ങളും ഇതു ഏറ്റെടുത്തിട്ടുണ്ട്.
എന്നാൽ ഈ വാർത്ത നിയമപരമല്ലെന്നും തെറ്റാണെന്നും മോട്ടോർ വാഹന വകുപ്പ് മുന്നറിയിപ്പ് നൽകുന്നു. ഇതു സംബന്ധിച്ച വിശദമായ പോസ്റ്റാണ് കേരള പോലീസിന്റെ ഔദ്യോഗിക ഫേസ്ബുക്ക് പേജിൽ വന്നിരിക്കുന്നത്.
25 ശതമാനം സീറ്റുകള് സ്ത്രീകള്ക്കായി സംവരണം ചെയ്തിട്ടുണ്ട്
ദീര്ഘദൂര ബസുകളില് സ്ത്രീകളുടെ സീറ്റില് ആളില്ലെങ്കില് പുരുഷന്മാര്ക്ക് യാത്രചെയ്യാം. പിന്നിട് സ്ത്രീകള് കയറിയാല് സീറ്റില് നിന്ന് പുരുഷന്മാര് എഴുന്നേറ്റ് നല്കണമെന്നാണ് നിയമം. കെഎസ്ആര്ടിസി വോള്വോ, എസി ബസുകള് ഒഴികെയുള്ള എല്ലാ കെഎസ്ആര്ടിസി ബസുകളിലും 25 ശതമാനം സീറ്റുകള് സ്ത്രീകള്ക്കായി സംവരണം ചെയ്തിട്ടുണ്ട്. എന്നാല് റിസര്വേഷന് സൗകര്യം ഉള്ള ബസുകള്ക്ക് ഇത് ബാധകമല്ല .
മുന്ഗണനാ ക്രമത്തിലുള്ള സീറ്റുകള്
മുന്ഗണനാ ക്രമത്തില് സംവരണം ചെയ്തിട്ടുള്ള സീറ്റുകളില് സര്വീസ് തുടങ്ങുന്ന സ്ഥലത്ത് വനിതകള് ഇല്ലെങ്കില് മാത്രം പുരുഷന്മാര്ക്ക് അനുവദിക്കാവുന്നതാണ്. യാത്രയ്ക്കിടയില് സ്ത്രീകള് ആവശ്യപ്പെടുകയാണെങ്കില് മുന്ഗണനാ ക്രമത്തിലുള്ള സീറ്റുകള് ഒഴിഞ്ഞു കൊടുക്കുവാന് പുരുഷന്മാരോട് കണ്ടക്ടര് ആവശ്യപ്പെടേണ്ടതാണെന്നും അത് വനിതകള്ക്ക് ലഭ്യമാക്കേണ്ടതാണെന്നുമാണ് കെഎസ്ആര്ടിസി ഉത്തരവ് നല്കിയിരിക്കുന്നത്. ബസുകളിലെ സംവരണ സീറ്റില് നിയമംലഘിച്ച് യാത്രചെയ്താല് പിഴയുള്പ്പെടെയുള്ള ശിക്ഷയുണ്ടാകുമെന്ന് മോട്ടോര്വാഹനവകുപ്പ് അറിയിച്ചു. നിയമം ലഘിച്ചാല് മോട്ടോര്വാഹനവകുപ്പ് 100 പിഴ ഈടാക്കും. എന്നിട്ടും സീറ്റില്നിന്ന് മാറാന് തയാറാകാതെ കണ്ടക്ടറോട് തര്ക്കിക്കുന്ന യാത്രക്കാരനെതിരേ കൃത്യനിര്വഹണം തടസപ്പെടുത്തിയതിന് ക്രിമിനല് നടപടി പ്രകാരം കേസെടുത്ത് അറസ്റ്റ് ചെയ്യാന് പോലീസിന് സാധിക്കും.
ബസിലെ സംവരണ സീറ്റുകള് ഇങ്ങനെയാണ്:
$ ബസുകളില് 5% സീറ്റ് അംഗപരിമിതര്ക്ക് (ആകെ സീറ്റില് രണ്ടെണ്ണം)
$ കാഴ്ചയില്ലാത്തവര്ക്ക് ഒരു സീറ്റ്
$ 20% സീറ്റ് മുതിര്ന്ന പൗരന്മാര്ക്ക് (10% സ്ത്രീകള്ക്ക്, 10% സീറ്റ് പുരുഷന്മാര്ക്ക്)
$ 25% സീറ്റുകള് സ്ത്രീകള്ക്ക് (ഇതില് 5% സീറ്റ് കൈക്കുഞ്ഞുമായി കയറുന്ന സ്ത്രീകള്ക്ക്)
$ ഒരു സീറ്റ് ഗര്ഭിണിക്ക് (സ്വകാര്യ, കെഎസ്ആര്ടിസി ബസുകളില് ഗര്ഭിണികള്ക്കു സീറ്റ് സംവരണം ചെയ്തിട്ടുണ്ട്. എല്ലാ ബസുകളിലും ഒരു സീറ്റെങ്കിലും ഗര്ഭിണികള്ക്കു നീക്കിവയ്ക്കണമെന്ന നിര്ദേശമുള്പ്പെടുത്തി കേരള മോട്ടോര് വാഹന നിയമം മനുഷ്യാവകാശ കമ്മിഷന്റെ ഉത്തരവുപ്രകാരം ഭേദഗതി ചെയ്തിരുന്നു)