ബ്ലാക്ക് ഫംഗസ്: കോഴിക്കോട് മെഡിക്കല്‍ കോളേജില്‍ ചികിത്സയിലായിരുന്ന രോഗി മരിച്ചു

കോഴിക്കോട്: സംസ്ഥാനത്ത് വീണ്ടും ബ്ലാക്ക് ഫംഗസ് മരണം. കോഴിക്കോട് വടകര ചോറോട് സ്വദേശി നാസര്‍ (56) ആണ് മരിച്ചത്. കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയാണ് മരണം.

കഴിഞ്ഞ ദിവസങ്ങളിലും സംസ്ഥാനത്ത് ബ്ലാക്ക് ഫംഗസ് മരണം റിപ്പോര്‍ട്ട് ചെയ്തിരുന്നു. കോട്ടയത്ത് ചികിത്സയിലായിരുന്ന 58 കാരിയും പാലക്കാട് ചികിത്സയിലായിരുന്ന 48കാരിയുമാണ് അടുത്തിടെ ബ്ലാക്ക് ഫംഗസ് ബാധിച്ച് മരിച്ചത്.

അതേസമയം, കേരളത്തില്‍ ബ്ലാക്ക് ഫംഗസ് രോഗം പല ജില്ലകളിലും റിപ്പോര്‍ട്ട് ചെയ്യുന്നുണ്ട്. അടുത്തിടെ തിരൂര്‍ സ്വദേശിയുടെ കണ്ണ് ബ്ലാക്ക് ഫംഗസ് ബാധയെ തുടര്‍ന്ന് എടുത്തു മാറ്റിയിരുന്നു.

കൊവിഡ് ഭേദമായ ശേഷമാണ് ഇദ്ദേഹത്തിന് ബ്ലാക്ക് ഫംഗസ് രോഗം ബാധിച്ചത്. പിന്നീട് കോഴിക്കോട്ടെ സ്വകാര്യ ആശുപത്രിയിലേക്ക് മാറ്റിയിരുന്നു കണ്ണ് എടുത്തു മാറ്റിയില്ലെങ്കില്‍ ശരീരത്തില്‍ വ്യാപിക്കാന്‍ ഇടയുണ്ട് എന്ന വിലയിരുത്തലിനെ തുടര്‍ന്നാണ് ശസ്ത്രക്രിയ ചെയ്തത്.

English summary

Black fungus: A patient who was undergoing treatment at Kozhikode Medical College died