ഫ്‌ളക്‌സ് കീറിയെന്ന് ആരോപണം; ഡിവൈഎഫ്‌ഐ പ്രവര്‍ത്തകന് ക്രൂരമര്‍ദ്ദനം, കുറ്റസമ്മതം നടത്തിച്ച് എസ്ഡിപിഐ

Updated: Thursday, June 23, 2022, 15:30 [IST]

കോഴിക്കോട്: എസ് ഡി പി ഐയുടെ ഫ്‌ളക്‌സ് കീറിയെന്ന് ആരോപിച്ച് ഡി വൈ എഫ് ഐ പ്രവര്‍ത്തകന് ക്രൂര മര്‍ദ്ദനം. കോഴിക്കോടാണ് സംഭവം. ബാലുശേരി സ്വദേശിയായ ജിഷ്ണു രാജിനെയാണ് ഒരു സംഘം എസ് ഡി പി ഐ പ്രവര്‍ത്തകര്‍ മര്‍ദ്ദിച്ചത്. അതിക്രൂരമായ മര്‍ദ്ദനമാണ് ഏറ്റതെന്നാണ് വിവരം. തുടര്‍ന്ന് പരസ്യമായി കുറ്റസമ്മതം നടത്തിച്ച് വീഡിയോകളും ചിത്രീകരിച്ചു.

ഗുരുതരമായി പരിക്കേറ്റ ജിഷ്ണുവിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ആക്രമി സംഘത്തില്‍ എസ് ഡി പി ഐ- ലീഗ് പ്രവര്‍ത്തകരാണ് ഉള്‍പ്പെട്ടിട്ടുള്ളതെന്ന് പൊലീസ് അറിയിച്ചു. ഇന്നലെ രാത്രി ഒന്നരയോടെയാണ് കോട്ടൂര്‍ പാലോളിയില്‍ വച്ചായിരുന്നു മര്‍ദ്ദനമേറ്റത്.

എസ് ഡി പി ഐയുടെ ഫ്‌ളക്‌സ് ഈ പ്രദേശത്തുണ്ടായിരുന്നു. ഇത് കീറിയെന്ന് ആരോപിച്ച് മര്‍ദ്ദിക്കുകയായിരുന്നു. മര്‍ദ്ദനമേറ്റ ജിഷ്ണു അവശനിലയിലായിരുന്നു. മര്‍ദനത്തിന് ശേഷം ജിഷ്ണുവിന്റെ ഒരു വിഡിയോയും ഈ അക്രമികള്‍ ചിത്രീകരിച്ചിട്ടുണ്ട്. കുറ്റസമ്മതം നടത്തുന്ന വിഡിയോ ആണ് ഈ അക്രമികള്‍ ചിത്രീകരിച്ചിരിക്കുന്നത്. ഫ്ലക്സ് കീറിയത് താനാണെന്നും പ്രദേശത്തെ സിപിഎം ഡി വൈ എഫ് ഐ പ്രവര്‍ത്തകര്‍ പറഞ്ഞത് പ്രകാരമാണ് അത് കീറിയതെന്നുമാണ് ഈ വിഡിയോയില്‍ പറയുന്നത്.