ഒടുവില്‍ മുഹമ്മദ് യാസീന്‍ ഹാജര്‍: ആശങ്ക പരിഹരിച്ച് ഫലം പ്രസിദ്ധീകരിച്ചു

കോഴിക്കോട്: ദിവസങ്ങള്‍ നീണ്ട ആശങ്കയ്ക്ക് ഒടുവില്‍ മുഹമ്മദ് യാസിന്‍ എന്ന പത്താംക്ലാസ് വിദ്യാര്‍ത്ഥിക്ക് ആശ്വാസം. അധ്യാപകരുടെ അശ്രദ്ധയെ തുടര്‍ന്ന് എസ് എസ് എല്‍ സി പരീക്ഷയില്‍ ഒരു വിഷയത്തിന് ഹാജരായില്ലെന്ന രേഖപ്പെടുത്തിയ റിസല്‍ട്ട് പുറത്ത് വന്നതോടെയായിരുന്നു മുഹമ്മദ് യാസിന്‍റെ തുടര്‍ പഠനം ആശങ്കയിലായത്. മേപ്പയ്യൂർ ഗവ.ഹയർസെക്കൻഡറി സ്കൂള്‍ വിദ്യാര്‍ത്ഥിയായ മുഹമ്മദ് യാസിന്‍ ഇംഗ്ലീഷ് പരീക്ഷയ്ക്ക് ഹാജരായില്ലെന്നായിരുന്നു രേഖപ്പെടുത്തിയത്.

വിദ്യാര്‍ത്ഥിയുടെ ആശങ്ക വാര്‍ത്തയായതോടെ വിഷയത്തില്‍ വിദ്യാഭായ വകുപ്പ് ഇടപെട്ടു. സ്കൂള്‍ അധികൃതര്‍ വിദ്യാഭ്യാസ വകുപ്പുമായി മന്ത്രി വി ശിവന്‍ കുട്ടിയുമായി ബന്ധപ്പെടുകയായിരുന്നു. തുടര്‍ന്ന് പ്രശ്നം പരിഹരിച്ച് പുതിയ മാര്‍ക്ക് ലിസ്റ്റ് യാസിന് നല്‍കുകയും ചെയ്തു. പരീക്ഷ ദിവസം അധ്യാപകരില്‍ നിന്നും ഉണ്ടായ അശ്രദ്ധയാണ് യാസിന്‍റെ പരീക്ഷ ഫലത്തില്‍ ആശങ്കയുണ്ടാക്കിയത്.

കോവിഡ് രോഗിയുമായി സമ്പര്‍ക്കമുണ്ടായിരുന്നതിനാല്‍ ആദ്യദിവസങ്ങളിൽ പ്രത്യേക മുറിയിലായിരുന്നു യാസിന്‍ പരീക്ഷ എഴുതിയത്. എന്നാൽ ഇംഗ്ലിഷ് പരീക്ഷയുടെ ദിവസം കുട്ടി മറ്റു കുട്ടികൾക്കൊപ്പം ക്ലാസ്മുറിയിലാണ് ഇരുന്നത്. പ്രത്യേക മുറിയിൽ കുട്ടി എത്താതിരുന്നതിനെ തുടർ‍ന്നാണ് ഹാജർ രേഖപ്പെടുത്താതിരുന്നതെന്നായിരുന്നു സ്കൂൾ അധികൃതരുടെ വിശദീകരണം.

ഇത് സംബന്ധിച്ച് അന്ന് തന്നെ പിതാവ് പരാതി ഉന്നയിച്ചപ്പോള്‍ ഫലം വരുമ്പോള്‍ പ്രശ്നം പരിഹരിക്കപ്പെടുമെന്നായിരുന്നു അധ്യപകര്‍ പറഞ്ഞത്. എന്നാല്‍ ജുലൈ 13 ന് ഫലം വന്നപ്പോള്‍ യാസിന്‍ ഹാജരായില്ല എന്ന് തന്നെ രേഖപ്പെടുത്തുകയായിരുന്നു.

English summary

Error corrected: Muhammad Yaseen's 10th class result has been published