അബുദാബിയില് നിന്നും കരിപ്പൂരിലെത്തിയ നാല് പേര്ക്ക് കൊവിഡ് ലക്ഷണങ്ങള്, ആശുപത്രിയിൽ പ്രവേശിപ്പിച്ചു
കോഴിക്കോട്: പ്രവാസികളെ നാട്ടിലെത്തിക്കുന്ന വന്ദേഭാരത് ദൗത്യത്തിന്റെ ഭാഗമായി അബുദാബിയില് നിന്ന് കരിപ്പൂരെത്തിയ നാല് പേര്ക്ക് കൊവിഡ് ലക്ഷണം. ഇവരടക്കം ഒന്പത് പേരെ ഇന്ന് ആശുപത്രിയില് പ്രവേശിപ്പിച്ചു. ദൗത്യത്തിന്റെ രണ്ടാം ഭാഗമായുള്ള ആദ്യ വിമാനം രണ്ടേ കാലോടെയാണ് കരിപ്പൂരിലെത്തിയത്. 180 പ്രവാസികളുമായി അബുദാബിയില് നിന്നാണ് വിമാനം പുറപ്പെട്ടത്. ഇതില് 9 പേരെയാണ് ഇപ്പോള് ആശുപത്രിയിലേക്ക് മാറ്റിയത്. നാല് പേര്ക്ക് കൊവിഡ് ലക്ഷണങ്ങള് കാണിച്ചതോടെ പ്രത്യേക ചികിത്സ കേന്ദ്രത്തില് ഐസലേഷനില് പ്രവേശിപ്പിച്ചു. മൂന്ന് പേര് മലപ്പുറം സ്വദേശികളും ഒരാള് കോഴിക്കോട് സ്വദേശിയുമാണ്.
മലപ്പുറം സ്വദേശിയെ മഞ്ചേരി മെഡിക്കല് കോളേജിലും കോഴിക്കോട് സ്വദേശിയെ കോഴിക്കോട് മെഡിക്കല് കോളേജിലുമാണ് പ്രവേശിപ്പിച്ചത്. മറ്റ വിമാനയാത്രക്കാര്ക്കൊപ്പം വിമാനത്താവളത്തില് പ്രവേശിപ്പിക്കാതെ റണ്വേയില് നിന്ന് നേരിട്ട് 108 ആബുലന്സ് വഴി ആശുപത്രിയില് എത്തിക്കുകയായിരുന്നു. വവൃക്ക രോഗത്തിന് ചികിത്സ തേടുന്ന മലപ്പുറം സ്വദേശിയെയും മറ്റ് രോഗങ്ങളുള്ള രണ്ട് കോഴിക്കോട് സ്വദേശിയെയും മെഡിക്കല് കോളേജില് പ്രവേശിപ്പിച്ചു.
അതേസമയം, കഴിഞ്ഞ ദിവസം കേരളത്തില് 11 പേര്ക്കാണ് കൊവിഡ്-19 സ്ഥിരീകരിച്ചത്. തൃശൂര് ജില്ലയില് നിന്നുള്ള 4 പേര്ക്കും കോഴിക്കോട് ജില്ലയില് നിന്നുള്ള 3 പേര്ക്കും പാലക്കാട്, മലപ്പുറം ജില്ലകളില് നിന്നുള്ള 2 പേര്ക്കുമാണ് രോഗം സ്ഥിരീകരിച്ചത്. ഇതില് 11 പേരും സംസ്ഥാനത്തിന് പുറത്ത് നിന്നും വന്നവരാണ്. ഇവരില് 7 പേര് വിദേശ രാജ്യങ്ങളില് നിന്നും 2 പേര് വീതം തമിഴ്നാട്, മഹാരാഷ്ട്ര സംസ്ഥാനങ്ങളില് നിന്നും വന്നതാണ്.
അതേസമയം രോഗം സ്ഥിരികരിച്ച് ചികിത്സയില് ആയിരുന്ന 4 പേരുടെ പരിശോധനാഫലം നെഗറ്റീവ് ആയി. വയനാട്, കണ്ണൂര് ജില്ലകളില് നിന്നും 2 പേരുടെ വീതം പരിശോധനാ ഫലമാണ് നെഗറ്റീവ് ആയത്. ഇതോടെ 87 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 497 പേര് ഇതുവരെ കോവിഡില് നിന്നും മുക്തി നേടി.എയര്പോര്ട്ട് വഴി 2911 പേരും സീപോര്ട്ട് വഴി 793 പേരും ചെക്ക് പോസ്റ്റ് വഴി 50,320 പേരും റെയില്വേ വഴി 1021 പേരും ഉള്പ്പെടെ സംസ്ഥാനത്ത് ആകെ 55,045 പേരാണ് എത്തിയത്.
സംസ്ഥാനത്തെ വിവിധ ജില്ലകളിലായി 56,981 പേര് നിരീക്ഷണത്തിലാണ്. ഇവരില് 56,362 പേര് വീടുകളിലും 619 പേര് ആശുപത്രികളിലും നിരീക്ഷണത്തിലാണ്. 182 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. ഇതുവരെ 43,669 വ്യക്തികളുടെ (ഓഗ്മെന്റഡ് സാമ്പിള് ഉള്പ്പെടെ) സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് ലഭ്യമായ 41,814 സാമ്പിളുകളുടെ പരിശോധനാഫലം നെഗറ്റിവ് ആണ്. ഇതുകൂടാതെ സെന്റിനല് സര്വൈലന്സിന്റെ ഭാഗമായി ആരോഗ്യ പ്രവര്ത്തകര്, അതിഥി തൊഴിലാളികള്, സാമൂഹിക സമ്പര്ക്കം കൂടുതലുള്ള വ്യക്തികള് മുതലായ മുന്ഗണനാ ഗ്രൂപ്പുകളില് നിന്ന് 4764 സാമ്പിളുകള് ശേഖരിച്ചതില് 4644 സാമ്പിളുകള് നെഗറ്റീവ് ആയി.