കനത്ത മഴ: കോഴിക്കോട് ജില്ലയില് 15 ക്യാമ്പുകള് തുറന്നു, ക്യാമ്പുകളിലേക്ക് മാറ്റിയത് 418 പേരെ
കോഴിക്കോട്: കനത്ത മഴയില് കോഴിക്കോട് ജില്ലയിലെ വിവിധ ഭാഗങ്ങളില് നാശനഷ്ടങ്ങള്. ജില്ലയിലെ താഴ്ന്ന പ്രദേശങ്ങളില് മിക്കവയും വെള്ളത്തിനടിയിലായി. വെള്ളക്കെട്ട് രൂക്ഷമായതിനെ തുടര്ന്ന് കോഴിക്കോട് നഗരത്തില് മാവൂര് റോഡില് മണിക്കൂറുകളോളം ഗതാഗതം തടസ്സപ്പെട്ടു. പയ്യോളി, കൊയിലാണ്ടി, പേരാമ്പ്ര പ്രദേശങ്ങളില് മരങ്ങള് കടപുഴകി വീണു. വൈകുന്നേരത്തോടെ മഴക്ക് അല്പം ശമനം ഉണ്ടായിട്ടുണ്ട്, കനത്ത മഴ തുടരുന്ന സാഹചര്യത്തില് വിവിധ ഇടങ്ങളിലായി 15 ക്യാമ്പുകള് തുറന്നു. കോഴിക്കോട് താലൂക്കില് 14 ക്യാമ്പും കൊയിലാണ്ടി താലൂക്കില് ഒരു ക്യാമ്പുമാണ് തുറന്നത്. 418 പേരാണ് വിവിധ ക്യാമ്പുകളില് താമസിക്കുന്നത്. കോഴിക്കോട് താലൂക്കില് 14 സ്ഥലങ്ങളിലാണ് ക്യാമ്പ് തുറന്നത്. 115 കുടുംബങ്ങളെ മാറ്റിപ്പാര്പ്പിച്ചിട്ടുണ്ട്. 173 പുരുഷന്മാരും 166 സ്ത്രീകളും 61 കുട്ടികളുമുള്പ്പെടെ 400 പേരാണ് താമസിക്കുന്നതെന്നും ജില്ലാ ഭരണകൂടം അറിയിച്ചു.
കച്ചേരി, പുതിയങ്ങാടി, പന്തീരങ്കാവ്, നെല്ലിക്കോട്, ചേവായൂര്, വളയനാട്, കസബ, കുറ്റിക്കാട്ടൂര്, വേങ്ങേരി വില്ലേജുകളിലാണ് ക്യാമ്പ് തുറന്നത്. താമരശേരി താലൂക്കില് ഒരു വീട് പൂര്ണമായും രണ്ട് വീടുകള് ഭാഗികമായി തകര്ന്നു. രാരോത്ത് വില്ലേജിലെ വെളിമണ്ണ വെള്ളച്ചാലില് മറിയയുടെ വീടാണ് പൂര്ണമായി തകര്ന്നത്. ശിവപുരം വില്ലേജിലെ കരിമ്പാ പൊയില് ബാലന് നായര്, കിഴക്കോത്ത് വില്ലേജിലെ വാസു നായര് എന്നിവരുടെ വീടുകളാണ് ഭാഗികമായി തകര്ന്നത്. വീടിന് സമീപത്തെ മതിലിടിഞ്ഞ് വീണാണ് വാസു നായരുടെ വീട് ഭാഗികമായി തകര്ന്നത്.
കൊയിലാണ്ടി താലൂക്കില് വീടുകളില് വെള്ളം കയറിയതിനെ തുടര്ന്ന് കോതമംഗലം ജി.എല്പി സ്കൂളില് ഒരു ക്യാമ്പ് തുറന്നു. ഏഴ് കുടുംബങ്ങളില് നിന്നുള്ള 18 പേരാണ് ക്യാമ്പിലുള്ളത്. പത്ത് പുരുഷന്മാരും എട്ട് സ്ത്രീകളുമാണുള്ളത്. വടകര താലൂക്കില് ആളുകളെ ക്യാമ്പിലേക്ക് മാറ്റേണ്ട സാഹചര്യമുണ്ടായാല് അതിനുള്ള ഒരുക്കങ്ങള് പൂര്ത്തിയായതായി തഹസില്ദാര് അറിയിച്ചു.
വെള്ളം ഉയര്ന്നാല് ആളുകളെ മാറ്റിപ്പാര്പ്പിക്കാന് ആവശ്യത്തിന് ബോട്ട് സൗകര്യവും ഒരുക്കിയിട്ടുണ്ട്. മലയോര പ്രദേശങ്ങള് ഉള്പ്പെടെയുള്ള ഇടങ്ങളില് പ്രകൃതിക്ഷോഭം ഉണ്ടായാല് രക്ഷപ്രവര്ത്തനങ്ങള്ക്ക് ഫയര് ആന്ഡ് റെസ്ക്യൂ, പോലീസ് വിഭാഗങ്ങള് സജ്ജമാണ്. ജലനിരപ്പ് ഉയരാന് സാധ്യതയുള്ളതിനാല് ആളുകള് ജലാശയങ്ങളില് ഇറങ്ങുന്നത് ഒഴിവാക്കണം. പഞ്ചായത്തുകള്ക്ക് ഇതുസംബന്ധിച്ച നിര്ദ്ദേശം നല്കി. മണ്ണിടിച്ചില് സാധ്യതയുള്ള ഇടങ്ങളില് നിന്നും ആളുകള് മാറി താമസിക്കാന് തയ്യാറാവണം. അത്യാവശ്യ കാര്യങ്ങള്ക്കല്ലാതെ വാഹനങ്ങളുമായി ആളുകള് നഗരത്തില് പ്രവേശിക്കുന്നത് ഗതാഗത തടസ്സം സൃഷ്ടിക്കുന്നതിനാല് സ്വയം നിയന്ത്രണങ്ങള് സ്വീകരിക്കണം.
താലൂക്കുകളില് കണ്ട്രോള് റൂമുകള് തുറന്നു.
Recommended Video
കോഴിക്കോട് -0495 2372966, കൊയിലാണ്ടി- 0496 2620235, വടകര- 0496 2522361, താമരശ്ശേരി- 0496 2223088, ജില്ലാ ദുരന്ത നിവാരണ കണ്ട്രോള് റൂം- 0495 2371002. ടോള്ഫ്രീ നമ്പര് - 1077.
Click it and Unblock the Notifications
Sign in with Google