തൃശൂർ മാത്രമല്ല, 2026 ഓടെ കേരളം പിടിക്കാനുള്ള ഓട്ടത്തിലാണ് ബിജെപി: കെ സുരേന്ദ്രന്‍

കോഴിക്കോട്: 2026 ഓടെ കേരളം പിടിക്കാനുള്ള ഓട്ടത്തിലാണ് ബി ജെ പിയെന്ന് പാർട്ടി സംസ്ഥാന അധ്യക്ഷന്‍ കെ സുരേന്ദ്രന്‍. 'തൃശ്ശൂരിൽ ബി ജെ പി ജയിച്ചതും 20 ശതമാനം വോട്ട് പിടിച്ചതും പൂരം കലക്കിയാണെന്ന ചിന്തയിലാണെങ്കിൽ എൽ ഡി എഫും യു ഡി എഫും അങ്ങനെ തന്നെ തുടരണം. 2026 ഓടെ കേരളം പിടിക്കാനുള്ള ഓട്ടത്തിലാണ് ബി ജെ പി' കോഴിക്കോട് നടത്തിയ വാർത്താ സമ്മേളനത്തില്‍ കെ സുരേന്ദ്രന്‍ പറഞ്ഞു.

സംസ്ഥാന സർക്കാറിനും മുഖ്യമന്ത്രിക്കുമെതിരെ രൂക്ഷമായ വിമർശനവും അദ്ദേഹം ഉയർത്തി. കേരളത്തിലെ ക്രമസമാധാന നില പൂർണമായും തകർന്നു. ഈ സാഹചര്യത്തില്‍ സർക്കാരിന് അധികാരത്തിൽ തുടരാനുള്ള ധാർമ്മിക അവകാശവും യോഗ്യതയും ഇല്ല. ഇനി ഒരു മിനിറ്റ് പോലും മുഖ്യമന്ത്രി പദവിയില്‍ തുടരാതെ മുഖ്യമന്ത്രി രാജിവെച്ച് പുറത്ത് പോകുകയാണ് വേണ്ടതെന്നും അദ്ദേഹം പറഞ്ഞു.

ആഭ്യന്തര സുരക്ഷയുമായി ബന്ധപ്പെട്ട ഗുരുതരമായ ആശങ്കകളും സർക്കാരിനെതിരായ ആരോപണങ്ങളുടെ ഗുരുതരമായ സ്വഭാവവും അദ്ദേഹം കോഴിക്കോട് നടത്തിയ പത്രസമ്മേളനത്തില്‍ ഉയർത്തിക്കാട്ടി. പുതിയ ജനവിധി തേടേണ്ടതിൻ്റെ ആവശ്യകതയും സുരേന്ദ്രൻ ഊന്നിപ്പറഞ്ഞു, ആരോപണങ്ങൾ സർക്കാരിൻ്റെ എല്ലാ തലങ്ങളിലും ഉള്ള വിശ്വാസ്യതയിൽ നിഴൽ വീഴ്ത്തുന്നതായും അദ്ദേഹം ആരോപിച്ചു.

സംസ്ഥാനത്തിൻ്റെ ആഭ്യന്തര സുരക്ഷയെ ബാധിക്കുന്ന ആരോപണങ്ങളാണ് മുഖ്യമന്ത്രിക്ക് നേരായി ഉയർന്നിരിക്കുന്നത്. സംസ്ഥാനത്തെ ബാധിക്കുന്ന വിഷയങ്ങൾ ഉന്നയിച്ച് ഭരണകക്ഷിയിലെ പിവി അൻവർ എം എൽ എ തന്നെ ഇത്രയും ഗുരുതരമായ ആരോപണങ്ങൾ ഉയർന്നിട്ടും ഒരു അന്വേഷണവും നടക്കുന്നില്ല.മുഖ്യമന്ത്രിയുടെ മൗനാനുവാദത്തോടെയാണ് ഇതെല്ലാം നടക്കുന്നത്. അൻവറിൻ്റെ ആരോപണങ്ങൾ ഒരു സാധാരണ പൗരനെതിരെയല്ല, മറിച്ച് മുഖ്യമന്ത്രി, അദ്ദേഹത്തിൻ്റെ പൊളിറ്റിക്കൽ സെക്രട്ടറി, മന്ത്രി മരുമകൻ, എഡിജിപി ഉൾപ്പെടെയുള്ള ഉന്നത ഉദ്യോഗസ്ഥർക്കെതിരെയാണ്.

ഗുരുതരമായ ആരോപണങ്ങൾ നേരിടുമ്പോഴും അൻവറിനെതിരെ നിർണായക നടപടിയില്ലാത്തത് ആശയക്കുഴപ്പമുണ്ടാക്കുന്നു. അൻവറിൻ്റെ ആരോപണങ്ങൾ അടിസ്ഥാനരഹിതമാണെങ്കിൽ മുഖ്യമന്ത്രിയും പാർട്ടിയും നിയമനടപടി സ്വീകരിക്കാത്തത് എന്തുകൊണ്ടെന്ന ചോദ്യം ഇവിടെ ഉയർുന്നുണ്ട്. പ്രത്യേകിച്ചും അൻവറിനെതിരായ മുഖ്യമന്ത്രിയുടെ അവകാശവാദങ്ങൾ ശരിയാണെങ്കിൽ, സ്വർണ്ണക്കടത്ത് നടത്തിയെന്ന് ആരോപിക്കപ്പെടുന്ന ഒരു എം എൽ എയെ ഇത്രയും കാലം സംരക്ഷിച്ചത് ആരാണ് എന്ന പ്രസക്തമായ ചോദ്യമുണ്ടെന്നും കെ സുരേന്ദ്രന്‍ പറഞ്ഞു.

മുഖ്യമന്ത്രിയും പിവി അൻവറും തമ്മിൽ നിലനിൽക്കുന്ന പിണക്കം ഏതെങ്കിലും ആശയപരമായ നിലപാടിൻ്റെ അടിസ്ഥാനത്തിലല്ല. ഇത്തരം തർക്കങ്ങൾ പാർട്ടിയുടെ മൂല്യങ്ങളെ മോശമായി പ്രതിഫലിപ്പിക്കുന്നുതിനോടൊപ്പം ഒരു രാഷ്ട്രീയ പാർട്ടിക്ക് എത്രത്തോളം അധഃപതിക്കാൻ കഴിയുമെന്നതിന്റെ ഉദാഹരണമായി നിലവിലെ സാഹചര്യം മാറി. എംവി ഗോവിന്ദന്‍ രാജിവെച്ച് പുറത്ത് പോകുകയാണ് വേണ്ടതെന്നും അദ്ദേഹം പറഞ്ഞു.