നിശ്ചയത്തലേന്ന് വരനെ കാണാതായി: കാണാതായത് തലേന്ന് വധുവിന് അണിയിക്കാന്‍ മോതിരം വാങ്ങാന്‍ പോയപ്പോള്‍!

By Desk

Updated: Monday, June 25, 2018, 20:22 [IST]

കോഴിക്കോട്: വിവാഹ നിശ്ചയ തലേന്ന് വധുവിന് അണിയിക്കാന്‍ മോതിരം വാങ്ങാന്‍ പോയ യുവാവിനെ കാണാനില്ലെന്ന് പരാതി. കുന്ദമംഗലം ചെത്തുക്കടവ് (എം.ഐ.ഇ) സുജയ് നിവാസില്‍ ജയപ്രകാശന്‍റെ മകന്‍ പി.ജെ ലിജീഷ് (28) നെ കണാനില്ലെന്നാണ് പരാതി. ശനിയാഴ്ച ഉച്ചക്ക് വിവാഹ നിശ്ചയത്തിന് വധുവിന് അണിയിക്കാനുള്ള മോതിരം വാങ്ങാന്‍ വീട്ടില്‍ നിന്ന് ഇറങ്ങിയതാണ്. പിന്നീട് വീട്ടില്‍ തിരിച്ചെത്തിയിട്ടില്ല എന്നാണ് പരാതി.

തടമ്പാട്ടുതാഴം സ്വദേശിയായ യുവതിയുമായി ഇയാളുടെ വിവാഹം ഞായറാഴ്ച നിശ്ചയിക്കാനിരിക്കുകയായിരുന്നു. കുന്ദമംഗലം പോലീസ് കേസെടുത്ത് അന്വേഷണം ആരംഭിച്ചു. സബ് ഇന്‍സ്പെക്ടര്‍ വിശ്വനാഥനാണ് അന്വേഷണ ചുമതല. ശനിയാഴ്ച മൂന്നു മണിക്ക് ഇയാളുടെ മൊബൈല്‍ ഫോണ്‍ മൂട്ടോളി ടവറിന് സമീപം ഉപയോഗിച്ചതായി പോലീസ് കണ്ടെത്തിയിട്ടുണ്ട്. ഇയാളെ കുറിച്ച് എന്തെങ്കിലും വിവരം ലഭിക്കുന്നവര്‍ കുന്ദമംഗലം പോലീസ് സ്റ്റെഷനുമായി ബന്ധപ്പെടണം. ഫോണ്‍: 0495 2800256. 178 സെന്റി മീറ്റര്‍ ഉയരവും, ഇരു നിറവും, ഇടത് തള്ള വിരലിന്‍റെ അടിയില്‍ കറുത്ത പുള്ളി, ഇടത്തെ ചൂണ്ടുവിരലില്‍ മുറിയുടെ കല എന്നിവയാണ് അടയാളം. വീട്ടില്‍ നിന്ന് പോവുമ്പോള്‍ മെറൂണ്‍ ടി ഷര്‍ട്ടാണ് ധരിച്ചിരുന്നത്.