പന്തീരങ്കാവ് ഗാർഹിക പീഡനം: പ്രതി രാഹുലിന്റെ സുഹൃത്ത് രാജേഷ് അറസ്റ്റിൽ

Updated: Friday, May 17, 2024, 14:50 [IST]

കോഴിക്കോട്: പന്തീരങ്കാവ് ഗാർഹിക പീഡനക്കേസിൽ പ്രതി രാഹുലിന്റെ സുഹൃത്ത് രാജേഷ് അറസ്റ്റിലായി. ജർമ്മനിയിലേക്ക് കടന്ന പ്രതിയെ രാജ്യം വിടാൻ സഹായിച്ചത് രാജേഷാണെന്ന വിലയിരുത്തലിലാണ് അറസ്റ്റ്. ഇന്ന് വൈകീട്ട് 5 മണിക്കുള്ളിൽ ചോദ്യം ചെയ്യലിന് ഹാജരാകണമെന്ന് കാണിച്ചുകൊണ്ട് രാഹുലിന്റെ അമ്മയ്ക്കും സഹോദരിക്കും പോലീസ് വീണ്ടും നോട്ടീസ് നൽകി. സംഭവത്തിൽ കേസ് എടത്ത് പോലീസ് അന്വേഷണം ഊർജ്ജിതമാക്കിയതിന് പിന്നാലെയായിരുന്നു രാഹുൽ ജർമ്മനിയിലേക്ക് രക്ഷപ്പെട്ടത്.

നവവധുവിനെ ക്രൂരമായി മർദ്ദിച്ച സംഭവത്തിലാണ് ഇയാൾക്കെതിരെ പോലീസ് കേസെടുത്തത്. രാഹുലിനെ കണ്ടെത്താൻ ദിവസങ്ങൾ നീണ്ടതിരച്ചിൽ നടത്തിയ പ്രത്യേക അന്വേഷണം സംഘമാണ് പ്രതി രാജ്യം വിട്ടെന്ന കാര്യം സ്ഥിരീകരിച്ചത്.

പ്രതിക്കായി ലുക്കൗട്ട് നോട്ടീസ് പുറത്തിറക്കാനുള്ള നടപടികൾ പുരോഗമിക്കവെയാണ് രാഹുൽ ജർമനിയിൽ എത്തിയ കാര്യം സ്ഥിരീകരിച്ചത്. താൻ വിദേശത്ത് എത്തിയെന്ന് അറിയിച്ച് ഇയാൾ ചെയ്ത വീഡിയോ ഇന്നലെ പുറത്തുവന്നിരുന്നു. ഇത് കേന്ദ്രീകരിച്ച് നടത്തിയ അന്വേഷണത്തിലാണ് രാഹുലിന്റെ സുഹൃത്ത് രാജേഷിനെ അറസ്റ്റ് ചെയ്തത്.

‍‍രാഹുലിന് രാജ്യം വിടാനുള്ള എല്ലാ ഒത്താശയും ചെയ്തത് ഇയാളാണെന്ന് പോലീസ് പറയുന്നു. പെൺകുട്ടിക്ക് രാഹുലിൽ നിന്ന് ക്രൂര മർദ്ദനം ഏൽക്കേണ്ടി വന്ന ദിവസം രാജേഷ് വീട്ടിൽ ഉണ്ടായിരുന്നെന്നും ജർമ്മനിയിൽ എത്തിയ ശേഷം രാഹുൽ രാജേഷുമായും സഹോദരിയുമായും വാട്സാപ്പ് വഴി സംസാരിച്ചതിന്റെ തെളിവുകളും പോലീസിന് കിട്ടി. ഇതിന് പിന്നാലെയാണ് ഇയാളെ അറസ്റ്റ് ചെയ്തത്.

രാഹുൽ വിദേശത്തേക്ക് കട‍ന്നതായി സൂചന ലഭിച്ചതിന് പിന്നാലെ രാഹുലിനെ നാട്ടിലെത്തിക്കാൻ ഉള്ള ശ്രമങ്ങളും പോലീസ് ആരംഭിച്ചിരുന്നു. ഇതിന് ആയി ഇന്റർ പോളിന്റെ സഹായം തേടും. രാഹുലിനെ സംബന്ധിച്ചുള്ള വിവരങ്ങൾ ഐ ബിയ്ക്കും പോലീസ് കൈമാറി. ഇയാളുടെ ഇന്ത്യയിലെ ബാങ്ക് അക്കൗണ്ടുകൾ മരവിപ്പിച്ചിരുന്നു. ജർമനിയിലെ എയറോനോട്ടിക്കൽ എഞ്ചിനീയറായ രാഹുലിന്റെ വിദേശത്തുള്ള അക്കൗണ്ട് മരവിപ്പിക്കാനുള്ള ശ്രമങ്ങളും പോലീസ് ആരംഭിച്ചതായാണ് ലഭിക്കുന്ന വിവരം.

പ്രതി രാജ്യം വിട്ടത് കേസ് ആദ്യം അന്വേഷിച്ച പോലീസ് ഉദ്യോഗസ്ഥരുടെ വീഴ്ച മൂലമാണെന്ന് പെൺകുട്ടിയുടെ പിതാവ് ആരോപിക്കുന്നു. ആദ്യം അന്വേഷിച്ചവർ യഥാർത്ഥത്തിൽ പ്രതിയെ രക്ഷപ്പെടാൻ ഒരുക്കി നൽകുകയാണ് ചെയ്തതെന്നും അന്ന് എഫ് ഐ ആർ ഇട്ട് അറസ്റ്റ് ചെയ്തിരുന്നെങ്കിൽ പ്രതി രക്ഷപ്പെടുന്ന സാഹചര്യം ഉണ്ടാകുമായിരുന്നില്ലെന്നും ക്രൂരമായി മർദ്ദനത്തിന് ഇരയായ പെൺകുട്ടിയെ കണ്ടിട്ട് ചോദിക്കാൻ പോലും അന്നത്തെ സി ഐ ശ്രമിച്ചില്ലെന്ന് ഇപ്പോഴത്തെ അന്വേഷണം ശരിയായ ദിശയിലാണെന്ന് പ്രതീക്ഷയുണ്ടെന്നും യുവതിയുടെ പിതാവ് പറഞ്ഞു.