കോഴിക്കോട് സമാന്തര ടെലിഫോണ്‍ എക്സ്ചേഞ്ച് വ്യാപകം: ശക്തമായ അന്വേഷണമെന്ന് ഡിസിപി

കോഴിക്കോട്: ജില്ലയില്‍ സമാന്തര ടെലിഫോണ്‍ എക്സചേഞ്ച് സംവിധാനം വ്യാപകമാണെന്ന് ഡിസിപി സ്വപ്നില്‍ എം മഹാജന്‍. ജില്ലയില്‍ ഏഴിടത്തായി സമാന്തര ടെലിഫോണ്‍ എക്സ്ചേഞ്ച് പ്രവർത്തിക്കുന്നുവെന്നാണ് ഡിസിപി വ്യക്തമാക്കുന്നത്. കഴിഞ്ഞ ദിവസം നടത്തിയ റെയ്‍ഡില്‍ ചിന്താ വളപ്പില്‍ നിന്നും ഒരാള്‍ പിടിയിലായിട്ടുണ്ട്. ഇയാളുമായി ബന്ധപ്പെട്ട രണ്ട് പേര്‍ ഒളിവിലാണ്. അറസ്റ്റിലായ ആളെ കുടുതല്‍ ചോദ്യം ചെയ്യുന്നതോടെ വിശദാംശങ്ങള്‍ പുറത്ത് വരുമെന്നും അദ്ദേഹം പറഞ്ഞു.

അറസ്റ്റിലായ വ്യക്തിയില്‍ നിന്നും 713 സിം കാര്‍ഡുകള്‍ പിടിച്ചെടുത്തിട്ടുണ്ട്. ഇത്രയും സിമ്മുകള്‍ ഇവര്‍ എങ്ങനെ വാങ്ങിയെന്നത് സംബന്ധിച്ച് വിശദമായ അന്വേഷണം നടത്തും. കേസില്‍ ഭീകരബന്ധമുള്‍പ്പടേയുള്ള കാര്യങ്ങളും പരിശോധിക്കും. ഇതിനായി പ്രത്യേക അന്വേഷണ സംഘത്തെ നിയമിച്ചതായും സ്വപ്നില്‍ എം മഹാജന്‍ അറിയിച്ചു.

രഹസ്യ വിവരത്തെ തുടര്‍ന്ന് ഇൻറലിജൻസ് ബ്യൂറോ (ഐ.ബി) നടത്തിയ പരിശോധനയിലാണ് സമാന്തര ടെലിഫോണ്‍ എക്‌സ്‌ചേഞ്ചുകൾ കോഴിക്കോട്ട് കണ്ടെത്തിയത്. കസബ പൊലീസ് പരിധിയിലെ ചിന്താവളപ്പിലെ യശോദ ബിൽഡിങ്ങിലാണ്​ ആദ്യ കേന്ദ്രം കണ്ടെത്തിയത്. നിയമവിരുദ്ധമായി വിദേശത്തേക്ക് ഉള്‍പ്പടെ വിളിക്കാവുന്ന സംവിധാനം ഇവിടെ ഉണ്ടായിരുന്നു. സംഭവത്തില്‍ കൊളത്തറ ശാരദാമന്ദിരം സ്വദേശി കച്ചേരിക്കുഴിൽ ആഷിഖ് മൻസിലിൽ ജുറൈസിനെയാണ് പൊലീസ് അറസ്റ്റ് ചെയ്തത്.

ഇദ്ദേഹത്തില്‍ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് പുതിയറ, മൂരിയാട്, മാങ്കാവ്, കുണ്ടായിത്തോട്, എന്നിവിടങ്ങളില്‍ പരിശോധന നടത്തിയത്. ഇവിടങ്ങളിൽ നിന്നും ചില ഉപകരണങ്ങളും നിരവധി സിം കാർഡുകളും കണ്ടെത്തി. അടുത്തിടെ ബംഗളൂരുവില്‍ സമാന്തര ടെലിഫോണ്‍ എക്സ്ചേഞ്ച് നടത്തി പിടിയിലായവര്‍ക്ക് മലയാളികളുമായി ബന്ധമുള്ളതായും സൂചനയുണ്ടായിരുന്നു.

English summary

seven parallel telephone exchanges in Kozhikode; There will be a strong investigation: dcp