നടന്‍ കോഴിക്കോട് നാരായണന്‍ നായർ ബിജെപിയില്‍ ചേർന്നു: പാർട്ടി അംഗത്വം സ്വീകരിച്ചു

കോഴിക്കോട്: മുതിർന്ന സിനിമ താരം കോഴിക്കോട് നരായണന്‍ നായർ ബി ജെ പിയില്‍ ചേർന്നു. കോഴിക്കോട്ടെ പാർട്ടി ആസ്ഥാനമായ മാരാർജി ഭവനില്‍ നടന്ന പാർട്ടി മെമ്പർഷിപ്പ് ക്യാമ്പയിന്‍ ജില്ലാ തല ഉദ്ഘാടന പരിപാടിയിലൂടെയാണ് സിനിമ താരത്തിന്റെ ബി ജെ പി പ്രവേശനം. പാർട്ടി സംസ്ഥാന ജനറല്‍ സെക്രട്ടറി എംടി രമേശ്, കോഴിക്കോട് ജില്ലാ പ്രസിഡന്റ് വികെ സജീവന്‍ തുടങ്ങിയവർ ചടങ്ങില്‍ പങ്കെടുത്തു.

നാടക രംഗത്ത് നിന്നും മലയാള സിനിമയിലേക്ക് എത്തിയ വ്യക്തിയാണ് കോഴിക്കോട് നാരായണന്‍ നായർ. മുന്നൂറിലധികം സിനിമകളിൽ അദ്ദേഹം അഭിനയിച്ചിട്ടുണ്ട്. 1970 ല്‍ പുറത്തിറങ്ങിയ ആഭിജാത്യമാണ് ആദ്യ ചിത്രം.

അതേസമയം, സംസ്ഥാനത്തെ ബി ജെ പി മെമ്പർഷിപ്പ് ക്യാമ്പയിന് കഴിഞ്ഞ ദിവസം തുടക്കമായിരുന്നു. സംസ്ഥാന അദ്ധ്യക്ഷൻ കെ.സുരേന്ദ്രൻ തിരുവനന്തപുരത്ത് മെമ്പർഷിപ്പ് ക്യാമ്പയിൻ ഉദ്ഘാടനം ചെയ്തു. ലോകസഭാ തിരഞ്ഞെടുപ്പോടെ ഒരു കാര്യം കേരള ജനത മനസ്സിലാക്കി. രണ്ടു മുന്നണികളെയും മാറ്റി പുതിയ ശക്തി കേരളത്തിൽ ഉദയം ചെയ്തിരിക്കുകയാണ്. കേരളത്തിൽ ഇനി ബി ജെ പിയുടെ യുഗമാണ്. മോദി സർക്കാരിനും ബി ജെ പിക്കുമെതിരെ ഇരുമുന്നണികളും നടത്തുന്ന പ്രചാരണങ്ങളെല്ലാം വ്യാജമാണെന്ന് കേരള ജനതയ്ക്ക് ലോകസഭാ തിരഞ്ഞെടുപ്പോടെ മനസ്സിലായെന്നും ക്യാമ്പയിന്‍ ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു.

കേന്ദ്രത്തിലെ പത്ത് വർഷത്തെ ബി ജെ പി ഭരണം കൊണ്ട് കേരളത്തിന് വലിയ നേട്ടമാണുണ്ടായത്. കേരളത്തിൽ 50ലക്ഷം പേരെ ബി ജെ പി അംഗങ്ങളാക്കും. ദേശീയ തലത്തിൽ നിലവിലുള്ള 21 കോടി അംഗങ്ങളേക്കാൾ 10 കോടി പുതിയ അംഗങ്ങളെ ചേർക്കാനാണ് ബി.ജെ.പി ലക്ഷ്യം വച്ചിരിക്കുന്നത്. കെ.സുരേന്ദ്രൻ വട്ടിയൂർക്കാവ് മണ്ഡലത്തിലെ 127ാം ബൂത്തിലാണ് സമ്പർക്കത്തിനിറങ്ങിയത്. സംസ്ഥാനത്തെ എല്ലാ ബൂത്തുകളിലും അംഗത്വവിതരണം ആരംഭിച്ചു. കൂടുതൽ ജനവിഭാഗങ്ങളെ കൂടെ ചേർക്കാനുള്ള പ്രവർത്തനങ്ങളാണ് ഈ മെമ്പർഷിപ്പ് ഡ്രൈവിലൂടെ പാർട്ടി ലക്ഷ്യമിടുന്നത്.

ഭാരതീയ വിചാര കേന്ദ്രം ഓഡിറ്റോറിയത്തിൽ നടന്ന ഔദ്യോഗിക മെമ്പർഷിപ്പ് ക്യാമ്പയിൻ ചടങ്ങ് മുൻ കേന്ദ്രമന്ത്രി വി.മുരളീധരൻ ഉദ്ഘാടനം ചെയ്തു. സാമൂഹ്യ-സാംസ്കാരിക രംഗത്തെ നിരവധി പേർ ചടങ്ങിൽ ബിജെപി മെമ്പർഷിപ്പ് സ്വീകരിച്ചു. ചടങ്ങിൽ സംബന്ധിച്ചു. സംസ്ഥാന അദ്ധ്യക്ഷൻ കെ.സുരേന്ദ്രൻ അദ്ധ്യക്ഷത വഹിച്ചു.

സംസ്ഥാന ജനറൽസെക്രട്ടറി പി.സുധീർ, സംസ്ഥാന ഉപാദ്ധ്യക്ഷൻമാരായ സി.ശിവൻകുട്ടി, വിടി രമ, സംസ്ഥാന സെക്രട്ടറിമാരായ എസ്.സുരേഷ്, കരമന ജയൻ, ജെആർ പദ്മകുമാർ, ജില്ലാ പ്രഭാരി അശോകൻ കുളനട, ജില്ലാ പ്രസിഡന്റ് വിവി രാജേഷ്, ന്യൂനപക്ഷ മോർച്ച ദേശീയ ഉപാദ്ധ്യക്ഷൻ ഡോ.അബ്ദുൾ സലാം എന്നിവർ സംബന്ധിച്ചു. ഒക്ടോബർ 10 വരെ നീണ്ടുനിൽക്കുന്ന മെമ്പർഷിപ്പ് ഡ്രൈവിൽ കേരളത്തിൽ 50 ലക്ഷത്തോളം പേരെ അംഗങ്ങളാക്കാനാണ് ബിജെപി ലക്ഷ്യമിടുന്നത്.