സംസ്ഥാനത്ത് ഇന്ന് കൂടുതല് രോഗികള് മലപ്പുറത്ത്; രോഗ മുക്തരുടെ എണ്ണത്തില് ആശ്വാസം
മലപ്പുറം: ജില്ലയില് വ്യാഴാഴ്ച 4,746 പേര്ക്ക് കോവിഡ് 19 വൈറസ് ബാധ സ്ഥിരീകരിച്ചതായി ജില്ലാ മെഡിക്കല് ഓഫീസര് ഡോ. കെ. സക്കീന അറിയിച്ചു. സംസ്ഥാനത്ത് ഏറ്റവും കൂടുതല് രോഗികള് ഇന്ന് മലപ്പുറത്താണ്. 37.14 ശതമാനമാണ് ജില്ലയിലെ ടെസ്റ്റ് പോസിറ്റീവിറ്റി നിരക്ക്. വ്യാഴാഴ്ച 5,729 പേരാണ് രോഗമുക്തരായത്. ഇതോടെ ജില്ലയില് വിദഗ്ധമായ ആരോഗ്യ പരിചരണത്തിനു ശേഷം കോവിഡ് വിമുക്തരായവരുടെ എണ്ണം രണ്ട് ലക്ഷം കവിഞ്ഞു. ജില്ലയില് ഇതുവരെ 2,50,670 പേര്ക്കാണ് കോവിഡ് സ്ഥിരീകരിച്ചത്. ഇതില് 2,00,878 പേരാണ് രോഗമുക്തരായതെന്ന് ജില്ലാ മെഡിക്കല് ഓഫീസര് വ്യക്തമാക്കി.
വ്യാഴാഴ്ച രോഗബാധ സ്ഥിരീകരിച്ചവരില് 4,538 പേര് രോഗികളുമായി നേരിട്ടുള്ള സമ്പര്ക്കത്തിലൂടെ വൈറസ് ബാധിതരായവരാണ്. 120 പേര്ക്ക് വൈറസ്ബാധയുണ്ടായതിന്റെ ഉറവിടം കണ്ടെത്താനായിട്ടില്ല. ആരോഗ്യ രംഗത്ത് പ്രവര്ത്തിക്കുന്ന ഒരാള്ക്കും വിദേശ രാജ്യങ്ങളില് നിന്ന് തിരിച്ചെത്തിയ നാല് പേര്ക്കും ഇതര സംസ്ഥാനങ്ങളില് നിന്നെത്തിയ 83 പേര്ക്കും രോഗബാധ സ്ഥിരീകരിച്ചിട്ടുണ്ട്.
65,640 പേരാണ് ജില്ലയില് ഇപ്പോള് നിരീക്ഷണത്തില് കഴിയുന്നത്. 49,245 പേരാണ് ചികിത്സയിലുള്ളത്. കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളില് 1,554 പേരും കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററുകളില് 269 പേരും 178 പേര് കോവിഡ് സെക്കന്ഡ് ലൈന് ട്രീറ്റ്മെന്റ് സെന്ററുകളിലുമാണ്. തദ്ദേശഭരണ സ്ഥാപനങ്ങള്ക്കു കീഴിലുള്ള പ്രത്യേക താമസ കേന്ദ്രങ്ങളായ ഡൊമിസിലിയറി കെയര് സെന്ററുളില് 781 പേരും ശേഷിക്കുന്നവര് വീടുകളിലും മറ്റുമായും നിരീക്ഷണത്തില് കഴിയുന്നു. ജില്ലയില് ഇതുവരെ 772 പേരാണ് കോവിഡ് ബാധിതരായി മരിച്ചത്.
Click it and Unblock the Notifications
Sign in with Google