മലപ്പുറത്ത് ആഗസ്റ്റ് 10 വരെ കടുത്ത നിയന്ത്രണം; ലംഘിക്കുന്ന കടകളുടെ ലൈസന്സ് റദ്ദാക്കും
മലപ്പുറം: ജില്ലയില് കോവിഡ് വ്യാപിക്കുന്ന സാഹചര്യത്തില് കൂടുതല് നിയന്ത്രണങ്ങള് ഏര്പ്പെടുത്തുമെന്ന് ജില്ലാ കലക്ടര് കെ.ഗോപാലകൃഷ്ണന് അറിയിച്ചു. കോവിഡ് ജില്ലാതല സമിതിയുടെയും ദുരന്തനിവാരണ അതോറിറ്റിയുടെയും യോഗത്തിലെ തീരുമാന പ്രകാരം ഇന്ന് മുതല് കണ്ടെയിന്മെന്റ് സോണ് ഒഴികെയുള്ള എല്ലാ പ്രദേശങ്ങളിലും കടകള് രാവിലെ ഏഴ് മുതല് വൈകീട്ട് ആറു വരെ മാത്രമേ പ്രവര്ത്തിക്കാന് പാടുള്ളൂ. ഹോട്ടലുകള്, തട്ടുകടകള് എന്നിവയില് രാത്രി എട്ടു വരെ ഭക്ഷണം പാഴ്സല് നല്കാം. ഇരുന്ന് കഴിക്കാന് പാടില്ല.
കണ്ടെയിന്മെന്റ് സോണില് നിലവിലുളള നിയന്ത്രണങ്ങള് തുടരും. ഇറച്ചി, മത്സ്യകടകളിലെ ജീവനക്കാര് മാസ്ക് ധരിക്കുന്നില്ലെന്ന വ്യാപകമായ പരാതിയുള്ളതിനാല് ഇവിടങ്ങളില് പൊലീസ്, ഭക്ഷ്യസുരക്ഷാ, ആരോഗ്യ വകുപ്പുകള് പരിശോധന നടത്തും. തുറന്ന് പ്രവര്ത്തിക്കുന്ന സ്ഥാപനങ്ങളുടെ അകത്തും പുറത്തും സാനിറ്റൈസര്, മാസ്ക്, സാമൂഹിക അകലം എന്നിവ നിര്ബന്ധമായും പാലിക്കണം. വീഴ്ചവരുത്തുന്ന സ്ഥാപനങ്ങളുടെ ലൈസന്സ് റദ്ദാക്കും. ആഗസ്റ്റ് 10 വരെ ഈ നിയന്ത്രണങ്ങള് തുടരും. കണ്ടെയിന്മെന്റ് സോണുകളില് നിലവിലുള്ള നിയന്ത്രണങ്ങള് തുടരുമെന്നും ജില്ലാ കലക്ടര് അറിയിച്ചു.
അതേസമയം, ജില്ലയില് 86 പേര്ക്ക് കൂടി ഇന്ന് കോവിഡ് 19 സ്ഥിരീകരിച്ചതായി കലക്ടര് അറിയിച്ചു. 67 പേര്ക്ക് സമ്പര്ക്കത്തിലൂടെയാണ് രോഗബാധ. ഇവരില് 34 പേര്ക്ക് രോഗബാധയുണ്ടായതിന്റെ ഉറവിടം കണ്ടെത്തിയിട്ടില്ല. രോഗം സ്ഥിരീകരിച്ചവരില് അഞ്ച് പേര് ഇതര സംസ്ഥാനങ്ങളില് നിന്നെത്തിയതും ശേഷിക്കുന്ന 14 പേര് വിവിധ വിദേശ രാജ്യങ്ങളില് നിന്നെത്തിയവരുമാണ്. ഇന്ന് 88 പേര് ജില്ലയില് രോഗമുക്തരായി. വിദഗ്ധ ചികിത്സക്കു ശേഷം ഇതുവരെ 1,239 പേരാണ് രോഗമുക്തരായി വീടുകളിലേക്ക് മടങ്ങിയത്.
Click it and Unblock the Notifications
Sign in with Google