തദ്ദേശ തിരഞ്ഞെടുപ്പ്; പത്രികാ സമര്പ്പണം നാളെ മുതല്; എന്തൊക്കെ രേഖകള് വേണം
മലപ്പുറം: തദ്ദേശ സ്ഥാപനങ്ങളിലെ പൊതുതെരഞ്ഞെടുപ്പ് വിജ്ഞാപനമിറങ്ങുന്ന നവംബര് 12 മുതല് നാമനിര്ദ്ദേശ പത്രിക സമര്പ്പിക്കാം.തദ്ദേശ സ്ഥാപനത്തിലെ വരണാധികാരിയുടേയോ ഉപവരണാധികാരിയുടേയോ മുമ്പാകെയാകണം പത്രിക സമര്പ്പണം. അവധി ഒഴികെയുള്ള ദിവസങ്ങളില് പകല് 11 നും ഉച്ചയ്ക്ക് ശേഷം മൂന്നിനും ഇടക്കുള്ള സമയത്ത് പത്രിക നല്കാം. നവംബര് 12 മുതല് 19 വരെയാണ് പത്രിക സമര്പ്പണത്തിനുള്ള സമയപരിധി. നാമനിര്ദ്ദേശ പത്രികയോടൊപ്പം സ്ഥാനാര്ത്ഥികള് 2 എന്ന ഫോറവും പൂരിപ്പിച്ച് നല്കണം. ഓരോ ദിവസവും ലഭിക്കുന്ന നാമനിര്ദ്ദേശങ്ങളുടെ പട്ടികയോടൊപ്പം 2എ ഫോറവും വരണാധികാരികള് പ്രസിദ്ധപ്പെടുത്തും.
ഒരു തദ്ദേശസ്ഥാപനത്തില് മത്സരിക്കുന്നയാള് ആ സ്ഥാപനത്തിലെ ഏതെങ്കിലും ഒരു വാര്ഡിലെ വോട്ടറായിരിക്കണം. പത്രികസമര്പ്പിക്കുന്ന തിയതിയില് 21 വയസ്സ് പൂര്ത്തിയാകുകയും വേണം. സ്ഥാനാര്ത്ഥിയെ നാമനിര്ദ്ദേശം ചെയ്യുന്നയാള് അതേ വാര്ഡിലെ ഒരു വോട്ടര് ആയിരിക്കണമെന്നാണ് നിബന്ധന. സംവരണ വാര്ഡില് മത്സരിക്കുന്നവര് ആ സംവരണ വിഭാഗത്തില്പ്പെട്ട ആളായിരിക്കണം. പട്ടികജാതി പട്ടിക വിഭാഗത്തില്പ്പെട്ടവര് വില്ലേജ് ഓഫീസറില് നിന്നുള്ള ജാതിസര്ട്ടിഫിക്കറ്റ് കൂടി ഹാജരാക്കണം. സ്ഥാനാര്ത്ഥികള്ക്ക് ഒരു സ്ഥാപനത്തിലെ ഒന്നിലധികം വാര്ഡുകളില് മത്സരിക്കാന് അനുമതിയില്ല. എന്നാല് ത്രിതല പഞ്ചായത്തുകളില് ഒന്നിലധികം തലങ്ങളില് മത്സരിക്കുന്നതിന് തടസ്സമില്ല.
പത്രികാ സമര്പ്പണത്തോടൊപ്പം സെക്യൂരിറ്റി നിക്ഷേപമായി ഗ്രാമപഞ്ചായത്തിന് 1000 രൂപയും ബ്ലോക്ക് പഞ്ചായത്തിനും നഗരസഭയ്ക്കും 2000 രൂപയും, ജില്ലാപഞ്ചായത്തിനും കോര്പ്പറേഷനും 3000 രൂപയുമാണ് അടയ്ക്കേണ്ടത്. പട്ടികജാതി പട്ടികവിഭാഗത്തില്പ്പെട്ടവര് പകുതി തുക നിക്ഷേപമായി നല്കിയാല് മതി. ട്രഷറിയിലോ തദ്ദേശസ്ഥാപനത്തിലോ ഒടുക്കിയ രസീതോ ക്യാഷോ ഡെപ്പോസിറ്റായി നല്കാം. മൂന്ന് ഘട്ടങ്ങളായിട്ടാണ് വോട്ടെടുപ്പ് നടക്കുക. മൂന്നാം ഘട്ടം ഡിസംബര് 14നാണ്. 16ന് വോട്ടെണ്ണും. പത്രിക സമര്പ്പണം ആരംഭിക്കുന്നതോടെ പ്രചാരണം ചൂടുപിടിക്കും.
Click it and Unblock the Notifications
Sign in with Google