ഇത് ഇടതുപക്ഷ വിജയം: കള്ള പ്രചരണങ്ങളെ തലയുയർത്തി നേരിട്ട ചങ്കൂറ്റത്തിന്റെ വിജയം: പി ശ്രീരാമകൃഷ്ണന്‍

മലപ്പുറം: പൊന്നാനിയിലെ ഇടത് സ്ഥാനാര്‍ത്ഥി നന്ദകുമാറിന്‍റെ വിജയത്തിന് പിന്നാലെ പ്രതികരണവുമായി സ്പീക്കര്‍ പി ശ്രീരാമകൃഷ്ണന്‍. ഈ കഴിഞ്ഞ അഞ്ച് വർഷ കാലയളവിൽ ഒന്നിനു പുറകെ ഒന്നായി വന്ന പ്രതിസന്ധികളിലെല്ലാം ജനങ്ങളൊന്നായി നിന്ന ഹൃദയപക്ഷത്തിന്റെ വിജയമാണ് ഇതെന്നായിരുന്നു പി ശ്രീരാമകൃഷ്ണന്‍ ഫേസ്ബുക്കിലൂടെ പ്രതികരിച്ചത്. കള്ള പ്രചരണങ്ങളെ തലയുയർത്തി നിന്ന് നേരിട്ട ചങ്കൂറ്റത്തിന്റെ വിജയമാണ്. അധികാര കസേരകളിൽ അള്ളിപിടിച്ചിരിക്കാതെ അവസരങ്ങൾ കൈമാറി പുതിയ ഊർജ്ജവും ആശയങ്ങളും സ്വാഗതം ചെയ്യുന്ന സജീവ രാഷ്ട്രീയത്തിന്റെ വിജയമാണ് ഇതെന്നും അദ്ദേഹം കൂട്ടിച്ചേര്‍ക്കുന്നു. അദ്ദേഹത്തിന്‍റെ ഫേസ്ബുക്ക് കുറിപ്പിന്‍രെ പൂര്‍ണ്ണ രൂപം ഇങ്ങനെ..

ഇതാണ് ജനാധിപത്യത്തിന്റെ വിജയം.
തങ്ങൾക്ക് ചുറ്റുമുള്ള രാഷ്ട്രീയ- സാമൂഹിക ചലനങ്ങളെ തൊട്ടറിഞ്ഞ്, വിശകലനം ചെയ്ത്, സ്വതന്ത്രമായ തീരുമാനമെടുക്കാൻ ഒരു ജനത പ്രാപ്തരാകുമ്പോഴാണ് അവിടെ ജനാധിപത്യം ശക്തി പ്രാപിക്കുന്നത്.
കേവലമായ നാട്യങ്ങളിലോ പൊള്ളയായ വാഗ്ദാനങ്ങളിലോ അന്തസ്സാരശൂന്യമായ നിലപാടുകളിലോ ഒളിയമ്പു പോലെ മറഞ്ഞു നിന്നെയ്യുന്ന അപവാദശരങ്ങളിലോ പെട്ടു പോകുന്നതല്ല മലയാളികളുടെ രാഷ്ട്രീയ ജാഗ്രത.
അതിലുപരി കേരളമെന്നും സഹവർത്തിത്വത്തിന്റെ നാടാണ്. അവിടെ വർഗ്ഗീയതയ്ക്ക് വളരാൻ ഇടം കിട്ടില്ല. വരട്ടു പാരമ്പര്യവാദളേക്കാൾ പുരോഗമനാശയങ്ങൾക്ക് വേരോട്ടമുള്ള മണ്ണാണിത്.

ഇത് ഇടതുപക്ഷത്തിന്റെ വിജയമാണ്. ഈ കഴിഞ്ഞ അഞ്ച് വർഷ കാലയളവിൽ ഒന്നിനു പുറകെ ഒന്നായി വന്ന പ്രതിസന്ധികളിലെല്ലാം ജനങ്ങളൊന്നായി നിന്ന ഹൃദയപക്ഷത്തിന്റെ വിജയമാണ്. കള്ള പ്രചരണങ്ങളെ തലയുയർത്തി നിന്ന് നേരിട്ട ചങ്കൂറ്റത്തിന്റെ വിജയമാണ്. അധികാര കസേരകളിൽ അള്ളിപിടിച്ചിരിക്കാതെ അവസരങ്ങൾ കൈമാറി പുതിയ ഊർജ്ജവും ആശയങ്ങളും സ്വാഗതം ചെയ്യുന്ന സജീവ രാഷ്ട്രീയത്തിന്റെ വിജയമാണ്.

പുതിയ തലമുറയിൽ കേരള രാഷ്ട്രീയം അർപ്പിക്കുന്ന വിശ്വാസത്തിന്റെ വിജയമാണ്. വാക്കു മാറാത്ത ഉത്തരവാദിത്ത ബോധത്തിന്റെയും ജനകീയ പദ്ധതികളുടേയും വികസന മുന്നേറ്റങ്ങളുടേയും തുടർച്ചയ്ക്ക് ജനങ്ങൾ നൽകുന്ന പിന്തുണയാണ് ഈ വിജയം. ആത്യന്തികമായ ജയം സത്യത്തിനാണ് എന്നതിനുള്ള തെളിവാണ് ഈ വിജയവും തെരഞ്ഞെടുപ്പിനു ശേഷം വന്ന കുഴൽ പണ തട്ടിപ്പിന്റെ വാർത്തയുമടക്കമുള്ളവ. സ്വതന്ത്രമായി ചിന്തിച്ച്, സത്യത്തിനൊപ്പം നിന്ന കേരളീയ ജനയുടെ രാഷ്ട്രീയ ജാഗ്രതയ്ക്ക് അഭിവാദ്യങ്ങൾ.

English summary

Ponnani Election Result: P Shiramakrishnan responds to the victory in Ponnani