വളാഞ്ചേരിയില്‍ യുവതിയെ കാണാതായ സംഭവത്തില്‍ വഴിത്തിരിവ്; വീടിനടുത്ത് മൃതദേഹം കുഴിച്ചിട്ട നിലയില്‍

മലപ്പുറം: വളാഞ്ചേരിയില്‍ യുവതിയെ കാണാതായ സംഭവത്തില്‍ വഴിത്തിരിവ്. യുവതിയുടെ വീടിന് സമീപത്ത് മൃതദേഹം കുഴിച്ചിട്ട നിലയില്‍ കണ്ടെത്തി. ഇത് കാണാതായ യുവതിയുടേതാണോ എന്ന് പരിശോധനകള്‍ക്ക് ശേഷമേ വ്യക്തമാകൂ. ചോറ്റൂര്‍ സ്വദേശി കബീറിന്റെ മകള്‍ സുബീറ ഫര്‍ഹത്തിനെ മാര്‍ച്ച് 10നാണ് കാണാതായത്. പതിവ് പോലെ വെട്ടിച്ചിറയിലെ ഡെന്റല്‍ ക്ലിനിക്കിലേക്ക് എന്ന് പറഞ്ഞ് വീട്ടില്‍ നിന്ന് ഇറങ്ങിയതാണ്. പിന്നീട് കണ്ടില്ല. ക്ലിനിക്കിലെത്തിയതുമില്ല.

തുടര്‍ന്നാണ് വീട്ടുകാര്‍ പരാതി നല്‍കിയത്. പോലീസ് വീടിന് സമീപത്തെ സിസിടിവി ദൃശ്യങ്ങള്‍ പരിശോധിച്ചിരുന്നു. യുവതി നടന്നുപോകുന്ന ദൃശ്യങ്ങള്‍ വ്യക്തമാണ്. പോലീസ് യുവതിയുടെ ഫോണില്‍ ബന്ധപ്പെടാന്‍ ശ്രമിച്ചെങ്കിലും കാര്യമുണ്ടായില്ല. വീട്ടുകാര്‍ ആദ്യം വിളിച്ച സമയം ഒരു തവണ ബെല്ലടിച്ചു. പിന്നീട് സ്വിച്ച് ഓഫ് ആകുകയായിരുന്നു.

പെണ്‍കുട്ടി ക്ലിനിക്കിലെത്തിയിട്ടില്ല എന്ന് പരിശോധനയില്‍ തെളിഞ്ഞിരുന്നു. എന്നാല്‍ വീട്ടില്‍ നിന്ന് ഇറങ്ങിയതിന് തെളിവുണ്ട്. തുടര്‍ന്ന് ഒന്നര മാസത്തോളമായി പോലീസ് അന്വേഷണം തുടരുന്നതിനിടെയാണ് വീടിന് സമീപം മണ്ണ് മാറ്റിയ നിലയില്‍ കണ്ടെത്തിയത്. തുടര്‍ന്ന് നടത്തിയ പരിശോധനയിലാണ് ഒരു മൃതദേഹം ലഭിച്ചു. ഇത് ആരുടേതാണ് എന്ന് വിശദമായ പരിശോധനയിലാണ് വ്യക്തമാകുക. മൃതദേഹം കോഴിക്കോട് മെഡിക്കല്‍ കോളജിലേക്ക് മാറ്റി.

English summary

Valanchery Woman Missing; Dead Body Found near house