കുപ്രസിദ്ധ അമ്പലമോഷ്ടാവ് ഭഗവാൻ രമേശ് പിടിയിൽ: അറസ്റ്റ് മോഷ്ടിക്കാനെത്തിയപ്പോള്‍, വേറെയും കേസുകള്‍!

പാലക്കാട്: കുപ്രസിദ്ധ അന്തർജില്ലാ അമ്പലമോഷ്ടാവ് തമിഴ്നാട്, ദിണ്ടിഗൽ, സെമ്പട്ടി സ്വദേശി രമേശ് എന്ന ഭഗവാൻ രമേശ് ( 29) നെയാണ് വാളയാർ SI അൻഷാദും ജില്ലാ ക്രൈം സ്ക്വാഡും ചേർന്ന് പിടികൂടിയത്.
കഴിഞ്ഞയാഴ്ച വാളയാർ, സത്രപ്പടിയിലുള്ള മാരിയമ്മൻ ക്ഷേത്രത്തിൽ നടന്ന മോഷണവുമായി ബന്ധപ്പെട്ട് അന്വേഷണം നടത്തി വരവെയാണ് ചൊവ്വാഴ്ച രാത്രി വീണ്ടും മോഷണത്തിനെത്തിയ രമേശ് പോലീസിന്റെ പിടിയിലായത്. പ്രതിയെ സ്റ്റേഷനിലെത്തിച്ച് വിശദമായി ചോദ്യം ചെയ്തതിൽ കഴിഞ്ഞ മൂന്നു മാസമായി പാലക്കാട് , മലപ്പുറം ജില്ലകളിൽ നടന്നു വന്ന നിരവധി അമ്പല മോഷണ കേസ്സുകൾക്ക് തുമ്പു ലഭിച്ചു.

1.വാളയാർ സത്രപ്പടി മാരിയമ്മൻ ക്ഷേത്രം, 2. വേനോലി ശ്രീ സത്യക്കോട് അയ്യപ്പക്ഷേത്രം, 3.പുതുശ്ശേരി, വടക്കേത്തറ ശ്രീ പുതുക്കുളങ്ങര ഭഗവതി ക്ഷേത്രം,4. അകത്തേത്തറ, കൽമാടം ശ്രീബാല അയ്യപ്പക്ഷേത്രം, 5. അകത്തേത്തറ വേട്ടക്കരുമൻ ക്ഷേത്രം, 6.ലക്കിടി ശ്രീ കിള്ളിക്കുറിശ്ശി മഹാദേവ ക്ഷേത്രം, 7.കൊപ്പം, പള്ളിപ്പുറം ചെമ്പറ ശ്രീ അങ്കമഹാകാളൻ ക്ഷേത്രം, 8.പെരുമടിയൂർ ശ്രീ നെടുങ്ങനാട്ട് മുത്തശ്ശിയാർ ക്കാവ് ക്ഷേത്രം, 9. യാക്കര, കണ്ണാടി ശ്രീ കൊറ്റുകുളങ്ങര ക്ഷേത്രം, 10. കുറ്റിപ്പുറം, തിരുനാവായ ശിവക്ഷേത്രം എന്നിവിടങ്ങളിലെ അമ്പല ഭണ്ഡാരങ്ങളും, അമ്പല ഓഫീസുകളും കുത്തിത്തുറന്ന് പണം മോഷ്ടിച്ചത് പ്രതി സമ്മതിച്ചു, ഏകളേശം ഒരു ലക്ഷത്തോളം രൂപ കളവ് ചെയ്ത് പ്രതി കൈക്കലാക്കിയതായി കണ്ടെത്തി. കൂടാതെ പണി പൂർത്തിയാകാത്ത വീടുകളിൽ നിന്നും ഇലക്ട്രിക് കേബിളുകളും മോഷ്ടിച്ച് വിറ്റതായി പ്രതി സമ്മതിച്ചു.

തമിഴ്നാട്ടിൽ നിന്നും 15 വർഷങ്ങൾക്കു മുമ്പ് അച്ഛനോടൊപ്പം കേബിൾ കുഴി കുഴിക്കുന്ന ജോലിക്കായി ആലുവയിലെത്തിയ രമേശ് പിന്നീട് കുപ്രസിദ്ധ മോഷ്ടാവ് കോതമംഗലം കുട്ടപ്പന്റെ ശിശ്യത്വം സ്വീകരിച്ച് അമ്പല മോഷണം തൊഴിലാക്കുകയായിരുന്നു.

ഭണ്ഡാരങ്ങളിലെ ചില്ലറക്കാശ് എടുക്കാറില്ല, റെയിൽവേ ട്രാക്കുകളിലൂടെ നടന്നാണ് രാത്രി അമ്പലങ്ങൾ കണ്ടെത്തി മോഷണം നടത്തുന്നത്. രമേശിനെതിരെ നേരത്തെ എറണാകുളം ജില്ലയിലെ പാലാരിവട്ടം, ആലുവ, പെരുമ്പാവൂർ , തൃശൂർ ജില്ലയിലെ ഇരിങ്ങാലക്കുട, കൊരട്ടി, കൊടകര, വടക്കേക്കാട് ,
പാലക്കാട് ജില്ലയിലെ മലമ്പുഴ, മങ്കര, ചാലിശ്ശേരി, മലപ്പുറം ജില്ലയിലെ ചങ്ങരംകുളം . കണ്ണൂർ ജില്ലയിലെ തലശ്ശേരി എന്നീ പോലീസ് സ്റ്റേഷനുകളിൽ കേസ്സുകൾ ഉണ്ട്. എറണാകുളം, ആലുവ, ഇരിങ്ങാലക്കുട, ചാവക്കാട്, തലശ്ശേരി, കണ്ണൂർ, പാലക്കാട്, ആലത്തൂർ, ഒറ്റപ്പാലം, വിയ്യൂർ എന്നീ ജയിലുകളിലായി 10 വർഷത്തോളം ജയിലിൽ കഴിഞ്ഞിട്ടുണ്ട്.

കഴിഞ്ഞ ജൂലൈ മാസത്തിലാണ് വിയ്യൂർ സെൻട്രൽ ജയിലിൽ നിന്നും ശിക്ഷ കഴിഞ്ഞ് ഇറങ്ങിയത്, ശേഷം വാളയാർ - കോയമ്പത്തൂർ അതിർത്തിയിൽ താമസിച്ച് കളവ് നടത്തി വരികയായിരുന്നു. മോഷണ മുതലുകൾ ആഡംഭര ജീവിതം നയിക്കുന്നതിനും, മദ്യത്തിനും, കഞ്ചാവിനുമാണ് ഉപയോഗിക്കുന്നത്.
പ്രതിയെ കഴിഞ്ഞ ദിവസം കോടതിയിൽ ഹാജരാക്കിയിരുന്നു. വാളയാർ SI. S. അൻഷാദ്, ജില്ലാ ക്രൈം സ്ക്വാഡ് SI. S. ജലീൽ, R. കിഷോർ, K. അഹമ്മദ് കബീർ, R. വിനീഷ്, R. രാജീദ്, S. ഷമീർ വാളയാർ പോലീസ് സ്റ്റേഷനിലെ SCP0 മാരായ ഷാജഹാൻ, ശങ്കരനാരായണൻ എന്നിവരടങ്ങിയ സംഘമാണ് പ്രതിയെ പിടികൂടിയത്.

English summary

man arrest on robbery case in palakkad