കെട്ടിടനിര്മ്മാണ തൊഴിലാളികളുടെ മൊബൈല് മോഷണം തൊഴിലാക്കിയ പ്രതി പിടിയില്:
പാലക്കാട്: കെട്ടിടനിര്മ്മാണ തൊഴിലാളികളുടെ മൊബൈല് മോഷണം തൊഴിലാക്കിയ പ്രതി പിടിയില്. ചെര്പ്പുളശ്ശേരി സര്ക്കിള് ഇന്സ്പെക്ടറുടെ നിര്ദ്ദേശപ്രകാരം എസ്ഐമാരായ സികെ രാജേഷ്, റോയ് ജോര്ജ്ജ്, എഎസ്ഐ ബാലസുബ്രഹ്മണ്യം, എസ് സിപിഒ ബിനോയ്, സിപിഒമാരായ പ്രശാന്ത്, റഷീദ് എന്നിവരടങ്ങിയ സംഘമാണ് പ്രതിയെ പിടികൂടിയത്. നെല്ലായ പാറക്കല്തൊടി നിയാമുദ്ദീന് എന്ന ശിഹാബ് ആണ് പിടിയിലായത്. ഇന്നലെ ഉച്ചയോടെ ചെര്പ്പുളശ്ശേരി ബസ് സ്റ്റാന്റ് പരിസരത്ത് വെച്ചാണ് എസ്ഐയും സംഘവും പ്രതിയെ പിടികൂടിയത്.
ചെര്പ്പുളശ്ശേരി സ്റ്റേഷന് പരിധിയിലുള്ള മരമില്ലില് നിന്ന് മരം മോഷ്ടിച്ച കേസില് റിമാന്റിലായിരുന്ന പ്രതി കഴിഞ്ഞ മെയ് 30ന് ജാമ്യത്തിലിറങ്ങിയിരുന്നു. മോഷ്ടിച്ച മൊബൈലുകള് ചെര്പ്പുളശ്ശേരി, വല്ലപ്പുഴ, പെരിന്തല്മണ്ണ എന്നിവിടങ്ങളിലെ മൊബൈല് കടകളില് വില്ക്കുകയാണ് പ്രതി ചെയ്യുന്നത്. സംശയിക്കാതിരിക്കാന് കൃത്യമായ തിരിച്ചറിയല് രേഖയും ഷോപ്പുകളില് നല്കിയാണ് വില്പ്പന നടത്തിയത്. നാലോളം കേസുകളിലായി അഞ്ചിലധികം മൊബൈല് ഫോണുകള് പോലീസ് പിടിച്ചെടുത്തിട്ടുണ്ട്.