ഫീസ് സ്വീകരിച്ചില്ല; പരീക്ഷ എഴുതാൻ കഴിയില്ലെന്ന മനോ വിഷമം; വിദ്യാർത്ഥിനി തൂങ്ങി മരിച്ചു

Updated: Sunday, January 30, 2022, 22:09 [IST]

പാലക്കാട്: വീടിനുള്ളിൽ 20 കാരിയെ തൂങ്ങി മരിച്ച നിലയിൽ കണ്ടെത്തി. പാലക്കാട് റെയിൽവേ കോളനിക്ക് സമീപം ഉമ്മിനിയിലാണ് വിദ്യാർത്ഥിനി തൂങ്ങി മരിച്ചത്. പാലക്കാട് എം ഇ എസ് കോളജിലെ മൂന്നാം വർഷ വിദ്യാർത്ഥിനി ബീനയാണ് മരണപ്പെട്ടത്.

ഫീസടയ്ക്കാൻ കഴിയാത്തതിൽ മനംനൊന്താണ്‌ പെൺകുട്ടി ആത്മഹത്യ ചെയ്തതെന്ന് സഹോദരൻ ബിജു പറയുന്നു. അമ്മ ഇന്നലെ ഫീസടയ്ക്കാൻ കോളേജിൽ എത്തിയിരുന്നു.

എന്നാൽ, കോളേജ് അധികൃതർ ഫീസ് വാങ്ങാൻ തയ്യാറായില്ല. കുട്ടിയുടെ അമ്മയോട് സർവകലാശാലയെ സമീപിക്കണമെന്ന് കോളേജിൽ നിന്ന് ആവശ്യപ്പെട്ടു. പരീക്ഷ എഴുതാൻ കഴിയില്ലെന്ന മനോ വിഷമത്തിലാണ് സഹോദരി തൂങ്ങി മരിച്ചതെന്നും ബിജു പറഞ്ഞു. സുബ്രഹ്മണ്യൻ - ദേവകി ദമ്പതികളുടെ മകൾ മരണപ്പെട്ട ബീന.