ശബരിമലയിൽ അരവണ സ്റ്റോക്ക് നിർമ്മാണം പുരോഗമിക്കുന്നു: ലക്ഷ്യം നട തുറക്കുന്നതിന് മുമ്പ് 40 ലക്ഷം ടിന്‍

പത്തനംതിട്ട: മണ്ഡല-മകരവിളക്ക് തീർത്ഥാടനത്തോട് അനുബന്ധിച്ച് ശബരിമലയിൽ അരവണ കരുതൽ സ്റ്റോക്ക് നിർമ്മാണം പുരോഗമിക്കുന്നു. ഒക്ടോബർ 18 ന് തന്നെ അരവണ നിർമ്മാണം ആരംഭിച്ചുവെന്നാണ് തിരുവിതാംകൂർ ദേവസ്വം ബോർഡ് പ്രസിഡന്റ് പി എസ് പ്രശാന്ത് വ്യക്തമാക്കിയത്. വൃശ്ചികം ഒന്നിന് (നവംബർ 16) നട തുറക്കുമ്പോൾ നിർമ്മാണം 40 ലക്ഷത്തിന് മുകളിൽ എത്തിക്കണം എന്നാണ് ദേവസ്വം ബോർഡ് ആഗ്രഹിക്കുന്നത്. ശബരിമലയില്‍ എത്താന്ന എല്ലാ ഭക്തർക്കും ആവശ്യമായ അരവണ - അപ്പം എന്നിവ ആവശ്യാനുസരണം നൽകുവാനള്ള പരിശ്രമമാണ് നടക്കുന്നതെന്നും പി എസ് പ്രശാന്ത് പറഞ്ഞു.

സന്നിധാനത്തെ ശബരിഗസ്റ്റ് ഹൗസിൻ്റെ നവീകരണ പ്രവർത്തനങ്ങളും ദ്രുതഗതിയിൽ പുരോഗമിച്ചുകൊണ്ടിരിക്കുകയാണ്. കഴിഞ്ഞ വർഷം ചില പരിമിതികളും പരാതികളും ശബരിഗസ്റ്റ് ഹൗസിലെ അക്കോമഡേഷനെക്കുറിച്ചുണ്ടായിരുന്നു. നവീകരണ പ്രവർത്തനങ്ങള്‍ അതിനൊരു ശാശ്വത പരിഹാരമാവുകയാണ്. സമ്പൂർണ്ണമായ നവീകരണ പ്രവർത്തനമാണ് ഗസ്റ്റ് ഹൗസിൽ നടക്കുന്നത്. 1994 ൽ ഉദ്ഘാടനം ചെയ്ത ശബരിഗസ്റ്റ് ഹൗസ് പൂർണ്ണമായും നവീകരിക്കുന്നത് മുപ്പത് വർഷങ്ങൾക്ക് ശേഷമാണെന്നും തിരുവിതാംകൂർ ദേവസ്വം ബോർഡ് പ്രസിഡന്റ് വ്യക്തമാക്കി.

അതേസമയം, ഈ തീർഥാടനകാലത്ത് ശബരിമലയിൽ റോപ്പ്‌വേയ്ക്ക് തുടക്കം കുറിക്കാനാകുമെന്നു ദേവസ്വം-സഹകരണ-തുറമുഖ വകുപ്പ് മന്ത്രി വി എൻ വാസവൻ കഴിഞ്ഞ ദിവസം വ്യക്തമാക്കിയിരുന്നു. ശബരിമല തീർഥാടനവുമായി ബന്ധപ്പെട്ട് എരുമേലിയിലെ ഒരുക്കങ്ങൾ സംബന്ധിച്ചു എരുമേലി ദേവസ്വം ഹാളിൽ ചേർന്ന അവലോകനയോഗത്തിനുശേഷം സംസാരിക്കുകയായിരുന്നു മന്ത്രി.

സമീപ ഭാവിയിൽ റോപ്‌വേ യാഥാർഥ്യമാക്കാനുള്ള നടപടികളാണ് സർക്കാർ നടത്തിക്കൊണ്ടിരിക്കുന്നത്. റോപ്പ്‌വേയുമായി ബന്ധപ്പെട്ടു റവന്യൂ, വനം, ദേവസ്വം വകുപ്പു മന്ത്രിമാരുടെ മൂന്നുയോഗങ്ങൾ ഇതിനോടകം നടന്നു. ബന്ധപ്പെട്ട എല്ലാവരും ചേർന്ന അവസാനയോഗം കഴിഞ്ഞദിവസം പൂർത്തീകരിച്ചു. 2.7 കിലോമീറ്ററാണ് റോപ്‌വേ വരാൻ പോകുന്നത്.

റോപ്‌വേയ്ക്ക് എടുക്കുന്നതിന് പകരം ഭൂമി വനം വകുപ്പിന് നൽകണം. കൊല്ലം ജില്ലയിൽ പകരം ഭൂമി നൽകാൻ റവന്യൂവകുപ്പ് അന്തിമതീരുമാനമെടുത്തിട്ടുണ്ട്. ഈ തീർഥാടനകാലത്ത് റോപ്‌വേ യാർഥാർഥ്യമായില്ലെങ്കിലും തുടങ്ങിവയ്ക്കാനാകുമെന്നും മന്ത്രി പറഞ്ഞു. പമ്പയിൽ നിന്ന് സന്നിധാനം വരെയാകും റോപ്‌വേ. തീർഥാടകരെയും രോഗികളായവരെയും പല്ലക്കിൽ ചുമന്നുകൊണ്ടുപോകുന്നത് അവസാനിപ്പിക്കാൻ കഴിയുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു.

ഈ സീസണിലെ ശബരിമല തീർഥാടനം കുറ്റമറ്റതാക്കാൻ സർക്കാർ എല്ലാ മുന്നൊരുക്കങ്ങളും നേരത്തേതന്നെ തുടങ്ങിയിട്ടുണ്ട്. മുമ്പൊരിക്കലും നടത്തിയിട്ടില്ലാത്ത മുന്നൊരുക്കങ്ങളാണ് നടത്തിക്കൊണ്ടിരിക്കുന്നത്. കഴിഞ്ഞ കാലങ്ങളിലുണ്ടായ ചെറിയ പോരായ്മകൾ പരിഹരിക്കുന്നതിന് വിവിധ വകുപ്പുകളുടെ നേതൃത്വത്തിലുള്ള കൂട്ടായ പരിശ്രമങ്ങളാണ് നടക്കുന്നത്. ഒക്‌ടോബർ 29ന് പമ്പയിൽ ശബരിമല മുന്നൊരുക്കങ്ങളുമായി ബന്ധപ്പെട്ട യോഗം നടക്കുമെന്നും വി എന്‍ വാസവന്‍ കൂട്ടിച്ചേർത്തു.