മാധ്യമങ്ങളിലെ തിരഞ്ഞെടുപ്പ് പരസ്യങ്ങള്ക്ക് മുന്കൂര് അനുമതി വാങ്ങണം: പത്തനംതിട്ട ജില്ലാകളക്ടര്
പത്തനംതിട്ട: ലോക്സഭാ തെരഞ്ഞെടുപ്പുമായി ബന്ധപ്പെട്ട പരസ്യങ്ങള് മാധ്യമങ്ങള്ക്ക് നല്കുന്നതിനു മുമ്പ് ജില്ലാതല മീഡിയ സര്ട്ടിഫിക്കേഷന് ആന്ഡ് മോണിട്ടറിംഗ് കമ്മിറ്റിക്ക് (എംസിഎംസി)സമര്പ്പിച്ച് അംഗീകാരം നേടണമെന്ന് ജില്ലാ തെരഞ്ഞെടുപ്പ് ഓഫീസര് കൂടിയായ ജില്ലാ കളക്ടര് പിബി നൂഹ് അറിയിച്ചു. ടെലിവിഷന് ചാനലുകള്, കേബിള് നെറ്റ് വര്ക്കുകള്, സ്വകാര്യ എഫ്.എം ചാനലുകള് ഉള്പ്പെടെയുള്ള റേഡിയോകള്, സിനിമാ ശാലകള്, പൊതുസ്ഥലങ്ങളിലെയും സാമൂഹ മാധ്യമങ്ങളിലെയും ഓഡിയോ വിഷ്വല് ഡിസ്പ്ലേകള്, ബള്ക്ക് എസ്എംഎസുകള്, വോയ്സ് മെസേജുകള് ഇ-പേപ്പറുകള് എന്നിവയ്ക്ക് ഇത് ബാധകമാണ്.
പാര്ട്ടികളുടെ പ്രതിനിധികളും സ്ഥാനാര്ഥികളും പ്രക്ഷേപണം ചെയ്യുന്നതിന് മൂന്നു ദിവസം മുന്പെങ്കിലും പരസ്യം കളക്ടറേറ്റിലെ എംസിഎംസി സെല്ലില് സമര്പ്പിക്കണം. പരസ്യം നല്കുന്നത് മറ്റ് സംഘടനകളാണെങ്കില് ടെലികാസ്റ്റിന് ഏഴു ദിവസം മുന്പ് സമര്പ്പിക്കണം. പരസ്യത്തിന്റെ ഇലക്ട്രോണിക് പതിപ്പിന്റെ രണ്ട് പകര്പ്പുകളും സാക്ഷ്യപ്പെടുത്തിയ ട്രാന്സ്ക്രിപ്റ്റും അപേക്ഷയ്ക്കൊപ്പം സമര്പ്പിക്കണം. പരസ്യത്തിന്റെ നിര്മാണചെലവ്, ടെലികാസ്റ്റ് ചെയ്യുന്നതിനുള്ള ചെലവ് തുടങ്ങിയവ വ്യക്തമാക്കുന്ന നിശ്ചിത ഫോറത്തിലാണ് അപേക്ഷ നല്കേണ്ടത്. പരസ്യം പ്രദര്ശിപ്പിക്കുന്നതിനുള്ള പണം ചെക്കായോ, ഡിമാന്ഡ് ഡ്രാഫ്റ്റായോ മാത്രമേ നല്കുവെന്നു വ്യക്തമാക്കുന്ന പ്രസ്താവനയും ഇതോടൊപ്പം ഉണ്ടാകണം.
ഇലക്ട്രോണിക് മാധ്യമങ്ങളിലെ രാഷ്ട്രീയ പരസ്യങ്ങള് അംഗീകാരം ലഭിച്ചവയാണോയെന്ന് എം.സി.എം.സി സെല് പരിശോധിക്കും. മറ്റു മാധ്യമങ്ങളിലെ പരസ്യങ്ങളും തെരഞ്ഞെടുപ്പ് ചെലവുമായി ബന്ധപ്പെട്ട നിര്ദേശങ്ങളുടെ അടിസ്ഥാനത്തില് വിലയിരുത്തും. ടി.വി ചാനലുകളിലെയും കേബിള് ചാനലുകളിലെയും പരസ്യങ്ങള്ക്കുള്ള നിയമങ്ങള് ബള്ക്ക് എസ്.എം.എസുകള്ക്കും വോയിസ് മെസേജുകള്ക്കും ബാധകമായിരിക്കും.
അച്ചടി മാധ്യമങ്ങളില് സ്ഥാനാര്ഥിയുടെ അറിവോടെയും അനുമതിയോടെയും വരുന്ന പരസ്യങ്ങളുടെ ചെലവ് സ്ഥാനാര്ഥിയുടെ തെരഞ്ഞെടുപ്പ് ചെലവില് ഉള്പ്പെടുത്തും. സ്ഥാനാര്ഥിയുടെ അറിവില്ലാതെയാണ് പരസ്യം പ്രസിദ്ധീകരിച്ചതെങ്കില് പ്രസാധകനെതിരെ നിയമ നടപടിക്ക് ശിപാര്ശ ചെയ്യും. തെരഞ്ഞെടുപ്പുമായി ബന്ധപ്പെട്ട് പ്രസിദ്ധീകരിക്കുന്ന ലഘുലേഖകളിലും പോസ്റ്ററുകളിലും മറ്റ് രേഖകളിലും പ്രസാധകന്റെ പേരും വിലാസവും ആകെ കോപ്പികളുടെ എണ്ണവും ഉണ്ടായിരിക്കണം.
അംഗീകാരത്തിനായി സമര്പ്പിക്കപ്പെടുന്ന പരസ്യങ്ങള് വിലയിരുത്തി കമ്മിറ്റി 24 മണിക്കൂറിനകം തീരുമാനമറിയിക്കും. നിബന്ധനകള് പാലിക്കപ്പെടുന്നില്ലെന്ന് കണ്ടാല് പരസ്യത്തിന് പ്രദര്ശനാനുമതി നിഷേധിക്കാന് കമ്മിറ്റിക്ക് അധികാരമുണ്ട്. ജില്ലാതല എം.സി.എം.സി കമ്മിറ്റിയുടെ തീരുമാനത്തിനെതിരെ അപേക്ഷകര്ക്ക് സംസ്ഥാന കമ്മിറ്റിക്ക് അപ്പീല് നല്കാവുന്നതാണെന്നും ജില്ലാ കളക്ടര് അറിയിച്ചു.
Click it and Unblock the Notifications
Sign in with Google