നരബലിയും സ്ത്രീകള് ഇരകളായി മാറ്റപ്പെടുന്നതും അതീവ ഗൗരവമേറിയ വിഷയം: പി സതീദേവി
പത്തനംതിട്ട: അന്ധവിശ്വസത്തിന്റെ ഭാഗമായി നടത്തിയ നരബലിയും ഇതിന് സ്ത്രീകള് ഇരകളായി മാറ്റപ്പെടുന്നതും അതീവ ഗൗരവമേറിയ വിഷയങ്ങളാണെന്ന് വനിതാ കമ്മീഷന് ചെയര്പേഴ്സണ് അഡ്വ. പി. സതീദേവി. പത്തനംതിട്ട ഇലന്തൂരില് നരബലി നടന്ന സ്ഥലം സന്ദര്ശിച്ച് സംസാരിക്കുകയായിരുന്നു ചെയര്പേഴ്സണ്. വിദ്യാഭ്യാസമേറെയുള്ള കേരള സമൂഹത്തില് അന്ധവിശ്വാസങ്ങളുടെ ഭാഗമായിട്ട് നരബലി അടക്കമുള്ള ക്രൂര കൃത്യങ്ങള് നടക്കുന്നുവെന്നത് ഭയപ്പെടുത്തുന്നതാണെന്നും വനിത കമ്മീഷന് അധ്യക്ഷ വ്യക്തമാക്കി.
വിദ്യാസമ്പന്നരെന്ന് അഭിമാനിക്കുന്ന കേരളത്തില് അന്ധവിശ്വാസങ്ങള്ക്ക് അടിമപ്പെടുവാന് സ്ത്രീകള് തയാറാകുന്നുവെന്നതും ചര്ച്ച ചെയ്യേപ്പെടേണ്ട വിഷയമാണ്. ഉത്തരേന്ത്യന് സംസ്ഥാനങ്ങളില് നടക്കുന്ന നരബലി അടക്കമുള്ള ഹീനകൃത്യങ്ങളെക്കുറിച്ചാണ് ഇതുവരെ ചര്ച്ച ചെയ്തിരുന്നത്. ഇപ്പോള് സാക്ഷര കേരളത്തില് അന്ധവിശ്വാസങ്ങള്ക്ക് അടിമപ്പെട്ട് ഇത്തരം ഹീനകൃത്യങ്ങളില് ഏര്പ്പെടുന്നത് വിഷമകരമായ കാര്യമാണ്.
അന്ധവിശ്വാസങ്ങള്ക്കും അനാചാരങ്ങള്ക്കും എതിരായി ബോധവത്ക്കരണ പ്രവര്ത്തനങ്ങള് നടത്തേണ്ടതുണ്ട്. പോലീസ് നടത്തിയ ജാഗ്രതയോടു കൂടിയുള്ള അന്വേഷണത്തിന്റെ ഫലമായാണ് നാടിനെ നടുക്കിയ കൊലപാതകം പുറത്തു വരാന് ഇടയായതെന്നും ചെയര്പേഴ്സണ് പറഞ്ഞു. വനിതാ കമ്മീഷന് അംഗം ഷാഹിദ കമാല് ചെയര്പേഴ്സനൊപ്പം സ്ഥലം സന്ദര്ശിച്ചു
മനുഷ്യ മനസ്സാക്ഷിയെ ഞെട്ടിക്കുന്ന സംഭവമാണ് പത്തനംതിട്ട ജില്ലയിലെ ഇലന്തൂരിൽലുണ്ടായതെന്നായിരുന്നു മുഖ്യമന്ത്രി പിണറായി വിജയന്റെ പ്രതികരണം. രണ്ടു സ്ത്രീകളെ കഴുത്തറുത്ത് കൊന്നു കുഴിച്ചു മൂടി എന്ന വിവരമാണ് പുറത്തു വന്നിട്ടുള്ളത്. രോഗാതുരമായ മനസാക്ഷിയുള്ളവർക്കേ ഇത്തരം കൃത്യങ്ങളിൽ ഏർപ്പെടാൻ കഴിയുകയുള്ളൂ. പരിഷ്കൃത സമൂഹത്തോടുള്ള വെല്ലുവിളിയായി മാത്രമേ ഇത്തരം ദുരാചാരങ്ങളേയും ആഭിചാരക്രിയകളേയും കാണാൻ കഴിയൂവെന്നും അദ്ദേഹം പ്രസ്താവനയിലൂടെ വ്യക്തമാക്കി.
Click it and Unblock the Notifications
Sign in with Google