പത്തനംതിട്ടയില്‍ യുഡിഎഫ് കോട്ടകള്‍ തകര്‍ന്നു; പടര്‍ന്നു കയറി എല്‍ഡിഎഫ്

പത്തനംതിട്ട: തദ്ദേശ തിരഞ്ഞെടുപ്പില്‍ യുഡിഎഫ് കോട്ടയായ പത്തനംതിട്ടയില്‍ എല്‍ഡിഎഫ് മുന്നേറ്റം. കഴിഞ്ഞ തവണ യുഡിഎഫ് വിജയിച്ച പത്തനംതിട്ട ജില്ലാ പഞ്ചായത്തില്‍ 10 വാര്‍ഡുകളില്‍ എല്‍ഡിഎഫ് ആണ് മുന്നിച്ച് നില്‍ക്കുന്നത്. ആകെ പതിനഞ്ച് വാര്‍ഡുകളാണ് ജില്ലാ പഞ്ചായത്തിലുള്ളത്. 5 സീറ്റില്‍ മാത്രമാണ് യുഡിഎഫിന് ലീഡ് ചെയ്യാന്‍ കഴിയുന്നത്. അതേസമയം, വലിയ മുന്നേറ്റമുണ്ടാക്കുമെന്ന് അവകാശപ്പെട്ട ബിജെപിക്ക് ഇതുവരെ ഒരു സീറ്റിലും വിജയിക്കാന്‍ സാധിച്ചിട്ടില്ല.

ബ്ലോക്ക് പഞ്ചായത്തുകളുടേയും ഗ്രാമ പഞ്ചായത്തുകളുടേയും എണ്ണത്തിലും എല്‍ഡിഎഫിന് മുന്നേറ്റം ഉണ്ടാക്കാന്‍ സാധിച്ചിട്ടുണ്ട്. നഗരസഭകളില്‍ യുഡിഎഫിനാണ് മുന്‍തൂക്കം. ജോസ് കെ മാണിയുടെ മുന്നണി മാറ്റം എല്‍ഡിഎഫിന് ഗുണം ചെയ്തുവെന്നതാണ് മലയോര മേഖലയിലെ ഫലം വ്യക്തമാക്കുന്നത്. അതേസമയം പന്തളം നഗരസഭയില്‍ ബിജെപിക്കാണ് മുന്നേറ്റം.

സംസ്ഥാനത്ത് ആകെയുള്ള ജില്ലാ പഞ്ചായത്തുകളുടെ കണക്ക് എടുത്താല്‍ യുഡിഎഫിന് വന്‍ തിരിച്ചടിയാണ് നേരിടേണ്ടി വന്നത്. കഴിഞ്ഞ തവണ ഏഴ് വീതം ഒപ്പം പിടിച്ചെങ്കില്‍ ഇത്തവണ 12 സീറ്റില്‍ എല്‍ഡിഎഫ് ആണ് മുന്നിട്ട് നില്‍ക്കുന്നത്. മലപ്പുറത്തും എറണാകുളത്തും മാത്രമാണ് യുഡിഎഫ് ഇപ്പോള്‍ മുന്നിട്ട് നില്‍ക്കുന്നത്. ആകെയുള്ള 6 കോര്‍പ്പറേഷനില്‍ 4 ഇടത്തും ഇടതിനാണ് ലീഡ്. തിരുവനന്തപുരം, കോഴിക്കോട്, കൊല്ലം, തൃശ്ശൂര്‍ കോര്‍പ്പറേഷനിലാണ് എല്‍ഡിഎഫ് മുന്നേറ്റം

English summary

kerala Local Body Election results 2020; LDF leads in Pathanamthitta district panchayat