ജസ്‌ന ജീവിച്ചിരിപ്പുണ്ടോ മരിച്ചോ എന്ന് തീരുമാനമായി; പക്ഷേ... അന്വേഷണത്തിന്റെ പുതിയ വിവരം

പത്തനംതിട്ട: രണ്ടര വര്‍ഷം മുമ്പാണ് ജസ്‌ന എന്ന കാഞ്ഞിരപ്പള്ളി കോളജിലെ ഡിഗ്രി വിദ്യാര്‍ഥിനിയെ കുടുംബവീട്ടിലേക്കുള്ള യാത്രയ്ക്കിടെ കാണാതായത്. കുടുംബ വീട്ടില്‍ എത്തിയിട്ടില്ലെന്ന് അറിഞ്ഞതോടെ വീട്ടുകാര്‍ പോലീസിനെ സമീപിച്ചു. ആദ്യം ലോക്കല്‍ പോലീസ് അന്വേഷിച്ചെങ്കിലും എവിടെയുമെത്തിയില്ല. പിന്നീട് അന്വേഷണം ക്രൈംബ്രാഞ്ച് ഏറ്റെടുത്തു. സംസ്ഥാനം വിട്ട് അന്വേഷണം നടന്നു. ബെംഗളൂരുവിലും മൈസൂരുവിലും തമിഴ്‌നാട്ടിലുമെല്ലാം അന്വേഷണ ഉദ്യോഗസ്ഥര്‍ പോയി. എവിടെയും കണ്ടില്ല.

സമീപ സംസ്ഥാനങ്ങളിലേക്ക് ജസ്‌നയുടെ ചിത്രം കൈമാറിയിരുന്നു. ചിലയിടങ്ങളില്‍ കണ്ടു എന്ന വിവരം വന്നു. തുടര്‍ന്ന് പോലീസ് ഉദ്യോഗസ്ഥര്‍ സിസിടിവി പരിശോധിച്ചു. ചില സൂചനകള്‍ ലഭിക്കുമെങ്കിലും കൂടുതല്‍ വിവരങ്ങള്‍ കിട്ടിയില്ല. പത്തനംതിട്ട എസ്പി കെജി സൈമണ്‍ അന്വേഷണം ഏറ്റെടുത്തതോടെ പ്രതീക്ഷയുണ്ടായിരുന്നു. ഒട്ടേറെ കേസുകളില്‍ നിര്‍ണായകമായ തെളിവുകള്‍ ശേഖരിക്കുന്നതില്‍ മിടുക്ക് കാണിച്ച ഓഫീസറാണ് അദ്ദേഹം. ഈ മാസം 31ന് സൈമണ്‍ വിരമിക്കുകയാണ്. അദ്ദേഹം അന്വേഷണം ഏറ്റെടുത്ത വേളയില്‍ വലിയ പുരോഗതിയുണ്ടായി എന്നാണ് മുന്‍ ക്രൈംബ്രാഞ്ച് മേധാവി ടോമിന്‍ തച്ചങ്കരി പറയുന്നത്. എന്നാല്‍ കൊറോണ കാരണം ഇതര സംസ്ഥാനങ്ങളിലേക്കുള്ള അന്വേഷണം മുടങ്ങുകയായിരുന്നുവെന്നും തച്ചങ്കരി മാതൃഭൂമിയോട് പറഞ്ഞു.

മൊബൈല്‍ ഫോണ്‍ കോളുകളുടെ അടിസ്ഥാനത്തിലാണ് അന്വേഷണം നടന്നത്. ജസ്‌ന പോയ വാഹനത്തെ കുറിച്ച് ധാരണയുണ്ടായി. ജീവിച്ചിരിപ്പുണ്ടോ മരിച്ചോ എന്ന് തീരുമാനമായി. തമിഴ്‌നാട്ടിലേക്ക് അന്വേഷണ സംഘം പോകാനിരിക്കുകയായിരുന്നു. പിന്നീട് കൊറോണ എല്ലാം മന്ദഗതിയിലാക്കി. കുടുംബത്തിന് പ്രതീക്ഷയ്ക്ക് വകയുണ്ട് എന്നും തച്ചങ്കരി പറയുന്നു. ജസ്‌നയുടെ സഹപാഠികള്‍, ബന്ധുക്കള്‍ എന്നിവരില്‍ നിന്നെല്ലാം വിവരങ്ങള്‍ ശേഖരിച്ച പോലീസ് യാത്രാ സാധ്യതയുള്ള സ്ഥലങ്ങളിലും പോയിരുന്നു. സമാനമായ രീതിയില്‍ കോട്ടയത്ത് നിന്ന് കാണാതായ ദമ്പതികളെ കുറിച്ചുള്ള അന്വേഷണവും എവിടെയുമെത്തിയിട്ടില്ല.

English summary

Pathanamthitta Jesna Missing case details reveals by Police Officer