തിരുവല്ല ബ്ലോക്ക് കോണ്ഗ്രസ് കമ്മിറ്റി യോഗത്തില് കൂട്ടയടി; മാധ്യമപ്രവര്ത്തകര്ക്ക് നേരെയും കയ്യേറ്റം
തിരുവല്ല: കോണ്ഗ്രസ് ബ്ലോക്ക് കമ്മിറ്റി യോഗത്തില് കൂട്ടയടി. തിരുവല്ല ബ്ലോക്ക് കോണ്ഗ്രസ് കമ്മിറ്റി യോഗത്തിലാണ് സംഭവം. കമ്മിറ്റി പ്രസിഡന്റിനെ നീക്കം ചെയ്തതിനെ തുടര്ന്നാണ് സംഘര്ഷം ഉടലെടുത്തത്. സമവായ ചര്ച്ച ആരംഭിക്കുന്നതിന് മുമ്പ് തന്നെ സംഘര്ഷം ആരംഭിക്കുകയായിരുന്നു.
തിരുവല്ല വൈഎംസിഎ ഹാളിലായിരുന്നു സംഘര്ഷം. ഇതിന്റെ ദൃശ്യങ്ങള് പകര്ത്തിയ മാധ്യമപ്രവര്ത്തകര്ക്ക് നേരെയും സംഘര്ഷമുണ്ടായി. വീഡിയോ ഇപ്പോള് സോഷ്യല് മീഡിയയില് പ്രചരിക്കുന്നുണ്ട്. ദിവസങ്ങള്ക്ക് മുമ്പ് എ ഗ്രൂപ്പിന്റെ നേതൃത്വത്തില് തിരുവല്ല സൗത്ത് ബ്ലോക്ക് കമ്മിറ്റിയെ തെരഞ്ഞെടുത്തിരുന്നു. എന്നാല്, വിഭാഗീയ പ്രവര്ത്തനത്തെ തുടര്ന്ന് മൂന്നു ദിവസത്തിനകം ഡി സി സി നേതൃത്വം ഇടപെട്ട് പിരിച്ചുവിടുകയും പുതിയ കമ്മിറ്റിയെ തെരഞ്ഞെടുക്കുകയും ചെയ്തിരുന്നു.
ഈ സാഹചര്യം വിശദീകരിക്കാനാണ് ഡി.സി.സി അധ്യക്ഷന് സതീഷ് കൊച്ചുപറമ്പില്, ജനറല് സെക്രട്ടറി അടക്കമുള്ള നേതാക്കള് യോഗം ചേര്ന്നത്. യോഗം നടക്കുന്നതിനിടെ ഒരു വിഭാഗം പ്രതിഷേധവുമായി രംഗത്തെത്തുകയായിരുന്നു. സംഭവത്തെ തുടര്ന്ന് പൊലീസ് സ്ഥലത്തെത്തി സ്ഥിതിഗതികള് ശാന്തമാക്കി.
കസഖ്സ്ഥാനില് കുടുങ്ങിക്കിടക്കുന്നവരെ നാട്ടിലെത്തിക്കണം: വിദേശകാര്യമന്ത്രിക്ക് പ്രതിപക്ഷ നേതാവ് കത്തയച്ചു
തിരുവനന്തപുരം: ആഭ്യന്തര കലാപം രൂക്ഷമായ കസഖ്സ്ഥാനില് കുടുങ്ങിക്കിടക്കുന്ന മലയാളികള് ഉള്പ്പെടെയുള്ളവരുടെ സുരക്ഷ ഉറപ്പാക്കാനും അവരെ നാട്ടിലെത്തിക്കാനും അടിയന്തിര ഇടപെടല് ആവശ്യപ്പെട്ട് പ്രതിപക്ഷ നേതാവ് വി.ഡി സതീശന് കേന്ദ്ര വിദേശകാര്യ വകുപ്പ് മന്ത്രി എസ്. ജയശങ്കറിന് കത്തയച്ചു.
പചകവാതക വില ഇരട്ടിയാക്കിയതില് പ്രതിഷേധിച്ച് ജനം തെരുവിലിറങ്ങിയതിനെ തുടര്ന്നാണ് കസഖ്സ്ഥാനില് കലാപമുണ്ടായത്. പൊലീസും പ്രതിഷേധക്കാരും തമ്മിലുണ്ടായ ഏറ്റുമുട്ടലില് നിരവധി പേര് മരിച്ചെന്ന വാര്ത്തയും പുറത്തുവന്നിട്ടുണ്ട്. കലാപം രൂക്ഷമായതോടെ രാജ്യത്തെ ഇന്റര്നെറ്റ് സേവനങ്ങള് ഉള്പ്പെടെയുള്ളവയും നിര്ത്തിവച്ചിരിക്കുകയാണ്. വിവിധ മേഖലകളില് പ്രവര്ത്തിക്കുന്ന നിരവധി ഇന്ത്യക്കാര് കസഖ്സ്ഥാനിലുണ്ട്. ഇതില് ഏറെയും മലയാളികളാണ്. ജോലി തേടിയെത്തിയവരെ കൂടാതെ നിരവധി മലയാളി വിദ്യര്ഥികളുമുണ്ട്. ഇന്റര്നെറ്റ് ഉള്പ്പെടെയുള്ള സേവനങ്ങള് നിര്ത്തലാക്കിയതോടെ ഇവര്ക്ക് നാട്ടിലുള്ള ബന്ധുക്കളുമായി സംസാരിക്കാന് പോലും സാധിക്കുന്നില്ല. വീടിന് പുറത്തിറങ്ങാന് കഴിയാത്ത അവസ്ഥയിലാണ് പലരും. ഇവരുടെ സുരക്ഷ ഉറപ്പാക്കാനും അവരെ സുരക്ഷിതമായി നാട്ടിലെത്തിക്കാനും അടിയന്തിരമായി ഇടപെടണമെന്നും ബന്ധുക്കള്ക്ക് വിവരങ്ങള് ലഭ്യമാക്കാന് വിദേശകാര്യ മന്ത്രാലയത്തിനു കീഴില് ഹെല്പ് ഡെസ്ക് ഉടന് ആരംഭിക്കണമെന്നും പ്രതിപക്ഷ നേതാവ് ആവശ്യപ്പെട്ടു.
Click it and Unblock the Notifications
Sign in with Google